1 Titili Takarata a Pierre ko̱ dé 2 - Féké Testament 1947

¹ Mono on, oui kon joungna go̱ro̱ bon pa, da vaïnafèn bon da ro̱ko̱nafèn bon da fanahang da béké baïli bon.

² Mahana ka foï goundi ko̱ tèn, oui bi hang baï toul pame a Esprit on ko̱ mi na déléng, an ouime hon jing rou ka kan yana‐baï‐toul,

³ tokoré ouime sanran jinguèl tou da toutou ko̱ Nanjou mi bèlta.

⁴ Oui guè mona kè on ko̱ ba kone ko̱ yan, ko̱ njoukouli mi pong nè ka babaï, da ko̱ kone on a nona Ouone, ko̱ kème same tou mi tèn ba kakaïyakè.

⁵ Da oui kéng, mahana ka kondi ko̱ mi ya, kè mosso oui baï guina voulou an Esprit baï guina tangna fofoto sacrificateurli, baï hina sacrificeli a Esprit on ko̱ mapélékè jing ba Ouone ka mboro Jésus‐Christ.

⁶ Baï ko̱ Takarata a Ouone mi sa: Oui ko̱, mè kane kone an voulou Sion, Kone on ko̱ mè kane bètè kouroukè tou ko̱ ba samna da kakaïyakè, Da kè on ko̱ la nè bilaou‐è yé chonron ba séna nè tane tiya.

⁷ Mono on, baï a oui ko̱ la nè bilaou kè ba kakaïyakè. Da, baï akli on ko̱ nding ka ndouri, Kone on ko̱ njou‐zana voulouli mi pong tou, Kone on gui ba loukou kone kouroukè.

⁸ Da kone on ko̱ ba fèn bèna; Da loukou kone on ko̱ ba fèn fana ka lé; kli bèn bo̱ko̱ kli fèn kli baï a baïnjaka, baï ko̱ kli fa baï, da mi di kli baï fèn on kéng.

⁹ Da oui ba mèrèn on ko̱ Ouone mi sane tou, oui ba njou‐pina gangna sacrificateurli, tangna fofoto pime pouli, dodok njoukouli a Ouone, an ouime to̱ko̱ guédék on a kè on ko̱ di oui tèn gui kala an bil yilime, da gui mona kakaïya takanaguèl amè.

¹⁰ Oui on jinguèl oui tane ti ba mèran njoukouli ya, da kassénaï oui ba njoukouli a Ouone, oui on ko̱ tane ga jing haïo jinguèl ya, da kassénaï oui jing haïo tou.

¹¹ Oui on ko̱ mème sé hang baï nyèta, mè sa hi oui jo̱jo̱ baï, mahana ka goni njoukouli da njoukouli ko̱ sèrè a koukoula, an ouime chang nzala naïn‐mone baï ko̱ rou béré kira laou baï.

¹² Da mboro séna a baï bèlta an wora gentili, mono on, ko̱ kli sa kon toul baï, yé ba njou‐ndingna bèlyali, kli ma jone Ouone ka name on ko̱ kè gui baï ko̱na kli, baï bèla pina abaï on ko̱ klime ko̱.

¹³ Oui la njèran baï bon a njoukouli baï a Nanjou, tongna kè ba nanjoukaou ko̱ na gangna ta afékéli bon,

¹⁴ maléba njou‐name gangnali, ko̱ kème pi baï sana kita hi njou‐ndingna bèlyali, da baï féra jona kli on ko̱ nding bèlta.

¹⁵ Da baï on ba kaouna mara fal toula Ouone, ko̱ ka mboro ndingna bèlta, oui ma baï gnana ngawa baï a njoukouli on ko̱ tou fèn ya.

¹⁶ Oui ba séna ka laou baï fèn baï, da ti ba bouna séna ka laou baï fèn baï vèvè on ya, mahana ka loukou la bouna ko̱ mou joungna go̱ro̱, da sé mahana ka koïli a Ouone.

¹⁷ Oui dik njoukouli bon; oui sé hang yine baïli bon; oui ngou waou nona Ouone; oui dik nanjoukaou.

¹⁸ Njou‐bakarali kaou bo̱ko̱ ndo̱ko̱ a njou‐to̱ko̱nafèn noli ka ngou waou, ti ba kli on ko̱ bèl da pan mone kli ho̱kè ya, da akli ko̱ fèn ndingna akli lata kéng.

¹⁹ Baï fèn aïn ba ndingna mbo̱l ko̱ njoukouna mi bou toulè rou an bil to̱ko̱nassé, to̱ko̱nassé on an bil fèn on tane ro̱ko̱kè, baï laou‐tounafèn an nona Ouone.

²⁰ Baï tokoré oui mi nding békéfèn da jing barabaï baï toul békéfèn abaï, da oui pan mone baï jona mone an hane dé? Da tokoré ouime bou toul baï an bil to̱ko̱nassé on baï bèla fèn, da oui pan mone baï, on ba ndingna mbo̱l a nona Ouone.

²¹ Mono baï on ko̱ kè di oui, baï ko̱ Christ mi ndé to̱ko̱ssé baï toul baï kéng, ka hi gba mèrènkè hi oui an ouime sé bong tiri bo̱kè,

²² Kè on ko̱ tane ga nding békéfèn bo̱ko̱ mbéo ya, Da kli tane ga jing rokonafèn an njakè ya.

²³ Kè on ko̱ klime poukou nè da kè tane féré poukou kli ya, ko̱ kè mi to̱ko̱ssé, kè tane ga féré to kli ya, da hi monè hi kè on ko̱ mi wal baï guédék;

²⁴ kè on ko̱ hol békéfèn nali bi monè fènè an toul di, mono on baï ko̱ na mi hou jing békéfènli, na mi yan baï ndingna guédék; mbo̱l nongno nè mi mone baï haï.

²⁵ Baï jinguèl oui wa domboro mahana ka badouali. Da kassénaï oui féré gui mona njou‐kora da Njou‐onatoul laou baïli.