1 Titili Takarata a Pierre ko̱ dé 1 - Féké Testament 1947

¹ Pierre, njou‐mboro‐pina a Jésus‐Christ mi dé takarata aïn hi kli on ko̱ Ouone mi sane ko̱ yaïli ka bi akli an guèl Pont, da Galatie, da Cappadoce, da Asie, da Bithynie,

² ka mboro tounafèn a Ouone Baba ti dambèl, ko̱ wal kli bi baï nè ka mboro Esprit, an klime la baï bèlta, da an klime wèn séme a Jésus‐Christ toulkè: an ndingna mbo̱l da go̱ro̱ iki abaï mi taïnkon guèbambèl!

³ Mi same ba Ouone Baba a Nanjou na Jésus‐Christ, ko̱ ka mboro ndingna haïo nè nyèta kè mboung na ba aféké baï jingna oliya ko̱ yan, ka mboro tomnahoul a Jésus‐Christ an wora houli,

⁴ baï an name jing fèn yana pélé on ko̱ poume ya, maléba ti dakame ya, da ko̱ tane yéli ya, ko̱ mi pèng nonkala baï abaï.

⁵ Ko̱ ka njèran a Ouone mi pèng oui ka mboro tounassaon, baï an name jing yana‐baï‐toul on ko̱ mi mosso tou baï bina saoukè kala ka sèkèrè name!

⁶ Guèl on ko̱ hi jangnandaï hi oui ta, da tongna kassénaï bongkè diya tokoré mi mahana ka on, mi hi go̱ro̱ baï sé oui ta, an bil lénafènli toutoul toutoul,

⁷ baï léna tounassaon abaï ko̱ ba kakaïya fèn ta réme l’or on ko̱ limna (tongna ko̱ hèlè mi lé nè), mi wéré nonkè bi kala baï jona da hi jonafèn da dikna ka name guina a Jésus‐Christ,

⁸ kè on ko̱ oui sé hang‐è ta ko̱ ouime tane ga ko̱ nè ya, da baï ko̱ oui la nè bilaou, mahana ko̱ ouime pane ga ko̱ nè kassénaï ya, oui jangndaï nyèta jing ba wala on ko̱ mi ta njaka mi ma baï sanakè ya, da mi mbarou jing jonafèn.

⁹ Baï ko̱ ouime jing saon a tounassaon abaï, oui jing yana‐baï‐toul a laou baï.

¹⁰ Prophèteli on ko̱ to̱ko̱ bong njaka Ouone toul ndingna mbo̱l on ko̱ mi ma baï guina mone baï, kli oui saon baï toul none yana‐baï‐toul on jinguèl, kli nza mborokè pouta.

¹¹ Da kli koro ka nza baï aïn ba fèn, maléba namkèli ba fèn ko̱ Esprit a Christ on ko̱ na bil kli mi to̱ko̱ baï on, ko̱ kè sa bongkè ka kome jinguèl toul to̱ko̱nassé a Christ, da jonafèn ko̱ ma tèn afal.

¹² Mi to̱ko̱ hi kli on, ko̱ on ti ba baï akli fèn kli ya, da ba baï abaï ko̱ klime nding bakara fèn aïnli, ko̱ kassénaï kli on ko̱ sa mboura bèlabaï mi sa hi oui tou, ka bila Saint‐Esprit ko̱ kè pi ka nonkala, da fèn on ko̱ angeli mi bi hang kli baï ko̱na saonkè.

¹³ Baï on, oui gna ga bi kèrè kaou kèrafèn abaï da mang mone baï, oui oli guédék baï toula ndingna mbo̱l on ko̱ mi gui mone baï ka name wéra none a Jésus‐Christ bi kala.

¹⁴ Mahana ka mbéré goundi, oui joukourou mone baï ya, baï ndingna ka mboro nzala mone baï jinguèl ya, mahana ko̱ ouime pane ka tane ga tou fèn ya.

¹⁵ Da mahana ka kè on ko̱ di oui ba tangna fofoto, da oui ndé kaou ba tangna fofoto kéng, ka mboro séna abaï bon.

¹⁶ Baï Takarata a Ouone mi sa: Dadaon, an ouime kaou ba tangna fofoto, baï ko̱ mè ba tangna fofoto.

¹⁷ Da tokoré ouime di nè ba Baba, kè on ko̱ wal baï mane mboro ndingna pina an njoukou mbéo mbéo mbéo bon, da kè dik njoukou ta hana ya, oui sé mboro abaï ka ngou waou ko̱ ouime kaou an koukoula aïn.

¹⁸ Baï ko̱ oui toutou ko̱ mi cho oui ti jing fènli ko̱ poume maléba l’argent maléba l’or ya, ka mboro poulame séna abaï on ko̱ baba abaïli to̱ko̱ hi oui jinguèl.

¹⁹ Da kè cho oui jing kakaïya séme a Christ mahana ka goune badoua tane nongno da tane bila.

²⁰ Kè on ko̱ kè badi guina amè ka titilikè ambèl mossona koukoula, da kè tèn nè bi kala ka sèkèrè name aïn baï toul baï,

²¹ ko̱ mbo̱l kè oui ba njou‐lana bilaouli a Ouone, ko̱ tome nè an wora houli, da hi jonafèn hi nè, an tounassaon abaï da oliya mi na bila Ouone.

²² Baï ko̱ ouime tourou laou baï ka mboro lana babaï, da oui sé hang yindi mahana ka yine baïli ka babaï oui sé hang hana nyè maïya ka go̱ro̱ bon.

²³ Baï ko̱ ouime tèn ba aféké tou, ti ka mèrèn aïn ko̱ poume ya, da ba an kè on ko̱ mi ma baï poumna ya, ka mboro baïnjaka Ouone ko̱ mi yé jing yana da ko̱ mi kaou kambèlè.

²⁴ Baï Naïn‐mone na mahana ka pa, Da jonafèn bon mi na mahana ka founa pa. Pa mi rèn da founakè mi ta lé;

²⁵ Da baïnjaka a Nanjou mi kaou kambèlè, Da baïnjaka on ba bèlabaï on ko̱ klime sa mboura hi oui jinguèl tou.