Titili Takarata a Jean ko̱ dé 5 - Féké Testament 1947

¹ Njoukou on ko̱ mi la bilaou ko̱ Jésus ba Christ, Ouone mi mboung nè, da njoukou on ko̱ mi sé hang a Ouone ko̱ mboung nè, njoukou on mi ndé sé hang a kè on ko̱ Ouone mi mboung nè kéng.

² Ka mboro on ko̱ name toutou ba name sé hang a goundi a Ouone, tokoré name sé hang a Ouone da pèng bina baïnjaka guingna nèli.

³ Baï ko̱ on ba sénahang a Ouone, ko̱ name pèng bina baïnjaka guingna nèli mi tane ti ba fèn tana toula njoukou ya,

⁴ baï fènli on ko̱ Ouone mi mboung mi gnèrèn bilkaou koukoula; da tounassaon na ba njéna ko̱ mi gnèrèn bilkaou koukoula aïn.

⁵ Guème ko̱ gnèrèn bilkaou koukoula aïn baï njéna lé, tokoré mi tane ti ba kè on ko̱ mi la bilaou ko̱ Jésus ba Goune a Ouone ya lé?

⁶ On ba, Jésus‐Christ ko̱ mi gui ka mboro mbi tèn séme; da mi tane ti jing ba mbi ka ho̱kè bo̱l ya, da jing mbi tèn séme kéng. Da ba Esprit fènè ko̱ mi sa bongbaï baï ko̱ Esprit ba babaï.

⁷ Baï ko̱ kli saï mi sa bongbaï.

⁸ Esprit fènè, da mbi tèn séme, da baï kli saï bon mi na mbéo.

⁹ Tokoré name la bongbaï a njoukouli, bongbaï a Ouone mi ta toulkè; baï ko̱ on ba bongbaï a Ouone ko̱ kème sa bongbaï toula Ouone nè tou.

¹⁰ Kè ko̱ mi la bilaou a Goune a Ouone kème jing bongbaï an bilè fènè; kè ko̱ mi tane ga la bilaou a Ouone ya, kème nding Ouone tèn njou‐bana wo̱ko̱, baï ko̱ kème tane ga la bilaou bongbaï on ko̱ Ouone mi sa toula Goune nè ya.

¹¹ Da on ba sana bongbaï ko̱ Ouone mi hi yana kambèlè jinguèl hi na, da yana on mi na an bila Goune nè.

¹² Kè ko̱ jing Goune a Ouone kème jing yana; da kè ko̱ mi tane ga ti jing Goune a Ouone ya kème tane ti jing yana ya.

¹³ Mè dé fèn aïnli bi takarata hi oui tou, an oui on ko̱ la bilaou ling a Goune a Ouone, mi toutou ko̱ ouime jing yana kambèlè.

¹⁴ Da baï on name bi laou na toulè baï ko̱ tokoré name oui fèn on ko̱ mi na mara fal toulè, kème la baï na.

¹⁵ Da tokoré name toutou ko̱ kème la baï na jing fèn on ko̱ name oui nè, name toutou ko̱ name jing fènli on bon ko̱ name oui jing nè.

¹⁶ Tokoré njoukouna mi ko̱ yine nè ko̱ nding békéfèn on ko̱ mi tane ga hi houl ya, dadaon an kème sa jo̱jo̱ Ouone, da yé Ouone ma hi yana hi kli on ko̱ mi tane ga nding ba békéfèn on ko̱ mi hi houl ya. Békéfèn hana mbéo mana ko̱ mi hi houl; tane ti ba baï békéfèn on ko̱ mème sa baï sana jo̱jo̱ Ouone ya.

¹⁷ Ndingna bèlya bon ba békéfèn, da békéfèn hana mbéo mana ko̱ mi tane ga hi houl ya.

¹⁸ Name toutou ko̱ kè on ko̱ Ouone mi mboung nè mi tane ga nding békéfèn ya; da kè on ko̱ Ouone mi mboung nè mi pèng monè fènè, da njou‐béké mi tane ga hèdi nè ya.

¹⁹ Name toutou ko̱ na ba a Ouone da koukoula aïn bon mi na an bo̱ko̱ njèran a njou‐békékè.

²⁰ Da na toutou Goune a Ouone mi gui, ka hi cho̱kna hi na tou baï an name tou kè on ko̱ ba gba kè; da name kaou an bila kè on ko̱ ba gba‐kè tèn an bila Goune nè Jésus‐Christ. Kème ko̱ ba gba Ouone, da yana kambèlè.

²¹ Lélé goundi, oui pèng mone baï fèn baï ka mboro fèn ndamli.