Titili Takarata a Jean ko̱ dé 4 - Féké Testament 1947

¹ Oui on ko̱ mème sé hang baï ta, oui tane la bilaou a espritli bon ya; da oui lé espritli on baï touna kong kli ba a Ouone baï ko̱ kassénaï wo̱ko̱ prophèteli nyèta mi sèrè an koukoula aïn.

² Ka mboro aïn ko̱ oui ma toutou Esprit a Ouone; esprit on ko̱ mi sa bi kala ba Jésus‐Christ mi gui jinguèl an naïn‐mone mi ko̱ ba a Ouone;

³ da esprit on ko̱ mi tane ga sa bi kala toula Jésus ya, mi tane ti ba a Ouone ya, on ba esprit a antichrist, ko̱ ouime ti lala jinguèl ka tang ambèl baï toul guina nè da kè makaou an koukoula aïn kassénaï.

⁴ Lélé goune nili, oui ba a Ouone, da ouime gnèrèn kli jing njèran tou, baï ko̱ kè on ko̱ kaou an bil baï, kème ta kè on ko̱ mi kaou an koukoula aïn.

⁵ Akli, kli ba an koukoula aïn; baï on mi ko̱ klime sa baï a koukoula aïn, da njou‐koukoula aïnli mi la baï kli.

⁶ Ama, na ba a Ouone. Kè on ko̱ mi toutou Ouone kème la baï na; da kè on ko̱ mi tane ga ti ba a Ouone ya, kème tane la baï na ya. Ka ba mboro on mi ko̱ na toutou esprit babaï tèn esprit a wo̱ko̱.

⁷ Oui on ko̱ mème sé hang baï ta, dadaon an name sé hang hana; baï ko̱ sénahang ba a Ouone, da njoukou on bon ko̱ mi sé hang, Ouone mi mboung nè, da kème toutou Ouone.

⁸ Kè on ko̱ mi tane sé hang ya, kè tane ga tou Ouone ya, baï ko̱ Ouone ba sénahang.

⁹ Da ka mboro on ko̱ sénahang a Ouone mi wéré nonkè bi kala hi na jinguèl, baï ko̱ Ouone mi pi pomboï Goune nè gui koukoula aïn, baï an name jing yana mbo̱lkè.

¹⁰ Da on ba sénahang, tane ti ba name ko̱ sé hang a Ouone ti dambèl ya, da ba kème ko̱ sé hang na, ka pi Goune nè, baï tèna ba sacrifice‐cho̱ko̱kè baï chona békéfèn nali.

¹¹ Oui on ko̱ mème sé hang baï ta, tokoré Ouone mi sé hang na mahana ka on, dadaon an name ndé sé hang hana kéng.

¹² Njoukouna mbéo tane ga ko̱ Ouone bo̱ko̱ mbéo ya. Tokoré name sé hang hana, Ouone mi bi an bila da sénahang nè ma gui guédék an bila.

¹³ Ka mboro on ko̱ name toutou ba name bi an bilè, da kème bi an bila, baï ko̱ kème hi Esprit nè hi na tou.

¹⁴ Da na, name ko̱ tou, ka sa bongbaï on ko̱ Baba mi pi ba Goune fènè baï guina Njou‐yana‐baï‐toul a njou‐koukoulali.

¹⁵ Kè on ko̱ mi sa bi kala ko̱ Jésus ba Goune a Ouone, Ouone mi bi an bilè, da kème bi an bila Ouone.

¹⁶ Da name toutou, sénahang on ko̱ mi na jing Ouone baï toula, da name bi hang na ndourou, Ouone ba sénahang, da kè on ko̱ mi bi an bil sénahang mi bi an bila Ouone, da Ouone mi bi an bilè.

¹⁷ Ka mboro on mi ko̱ sénahang gui guédék jing na: Mono on an name guè monè ndo̱t tane waou, ka name walabaï, baï mahana ko̱ kème ndé kaou mi ko̱ name ndé kaou an koukoula aïn kéng.

¹⁸ Waou mi tane ti jing sénahang ya, da sénahang on guédék mi ni waou; baï ko̱ waou ba fèn to̱ko̱nassé, da kè on ko̱ mi ngou waou kème tane ga ti guédék jing sénahang ya.

¹⁹ Ama name sé hang baï ko̱ kème ti sé hang na jinguèl ka titilikè.

²⁰ Tokoré njoukouna mi sa ba: Mème sé hang a Ouone, da kème jèk yine nè, kè ba njou‐bana wo̱ko̱; baï kè on ko̱ mi tane ga sé hang a yine nè ya, kè on ko̱ kème ko̱ko̱ nè tou, da yé ka mboro hani mi ko̱ kè ma sé hang a Ouone, kè on ko̱ kème tane ga ko̱ nè ya lé?

²¹ Da name jing bina baïnjaka guingna a kè on ba: njoukou on ko̱ sé hang a Ouone dadaon an kème ndé sé hang a yine nè kéng.