Titili Takarata a Jean ko̱ dé 3 - Féké Testament 1947

¹ Oui ko̱ sénahang on ko̱ Baba fènè mi hi na, baï an kème di na ba goundi a Ouone! Da na mono. Baï on ko̱ njou‐koukoulali mi tane ga tou na ya, ba baï ko̱ klime tane tou nè jinguèl ya.

² Oui ko̱ mème sé hang baï ta, kassénaï na ba goundi a Ouone. Da mi tane ga wéré nonkè bi kala hi na kong ba na ma tèn ane dé ya. Da name toutou on ko̱ kème gui, yé na ma tèn mabahana ka kè, baï ko̱ yé na ma ko̱ nè mahana ka on ko̱ kè makaou.

³ Da njoukou on ko̱ mi jing oliya aïn an bilè, kè on mi njomo monè fènè jing békéfèn nè, mahana ka kè ko̱ kaou tang fofoto.

⁴ Njoukou on ko̱ nding békéfèn mi ndé sél guingna kéng, da békéfèn ba séla guingna.

⁵ Da oui toutou ko̱ Jésus mi gui ba baï ko̱na békéfènli pa. Da békéfèn mi tane ti bilè gounfènakè ya.

⁶ Njoukou on ko̱ bi an bilè mi tane nding békéfèn ya; da njoukou on ko̱ nding békéfèn mi tane ga ko̱ nè ya, da tane ga tou nè ya.

⁷ Lélé goundi, an njoukouna mbéo mi tane mong oui ya. Kè on ko̱ mi pane ndingna guédék, kè ba guédék, mahana ka kè fènè ko̱ ba guédék.

⁸ Kè on ko̱ mi nding békéfèn, kè ba a zabolo, baï ko̱ zabolo mi ti nding békéfèn jinguèl ka titilikè. Baï on mi ko̱ Goune a Ouone mi gui baï bona pina a zabolo.

⁹ Njoukou on ko̱ Ouone mi mboung mi tane ga pane jing ndingna békéfèn ya, baï ko̱ mèrèn a Ouone mi bi an bilè; da kème tane ma baï ndingna békéfèn ya, baï ko̱ Ouone mi mboung nè tou.

¹⁰ Ka mboro on ko̱ kli ma toutou goundi a Ouone tèn goundi a zabolo. Njoukou on ko̱ mi tane pane jing ndingna guédék ya, kè tane ti ba a Ouone ya, maléba njoukou ko̱ mi tane ga sé hang a yine nè ya.

¹¹ Baï ko̱ on ba mboro pina on ko̱ ouime lala tou jinguèl ka titilikè, ba mi ma an name sé hang hana,

¹² da tane ti mabahana ka Caïn ya, kè on ko̱ ba a njou‐békékè, ka i yine nè. Da ba baïfèn da kème i nè lé? Baï ko̱ pina nèli mi bèlya, da on a yine nè mi na guédék.

¹³ Laou baï mi tane sé siya ya, yindi, ko̱ tokoré bilkaou koukoula aïn mi jèk oui.

¹⁴ Na toutou ko̱ name ta houl tou, da kan yana, baï ko̱ name sé hang yindi. Kè on ko̱ mi tane sé hang ya, kème bi an bil houl.

¹⁵ Njoukou on ko̱ jèk yine nè ba njou‐ina njoukou, da oui toutou ko̱ njou‐ina njoukou hana mbéo mi tane ga ti jing yana kambèlè an bilè ya.

¹⁶ Ka mboro on mi ko̱ name toutou sénahang, baï ko̱ kème ti hi yana nè jinguèl baï toula; dadaon an name ndé hi yana na baï toula yindi.

¹⁷ Da tokoré njoukouna mi jing fènli a koukoula aïn, da kème ko̱ yine nè ko̱ fèna mi nak nè da kème rima nonè jing nè baï ko̱na nè passé, sénahang a Ouone mi bi an bilè ane dé?

¹⁸ Lélé goundi, an name tane sé hang jing ba baïnjaka maléba ka ba léme sél bo̱on ya, da jing ba fèn ndingnakè jing babaï da.

¹⁹ Ka mboro on mi ko̱ na toutou ko̱ na ba a babaï, da yé go̱ro̱ na ma iki an nonè;

²⁰ baï ko̱ tokoré go̱ro̱ na mi sa baï kon toula, Ouone mi ko̱ ta toul go̱ro̱ na, da kème toutou fènli bon.

²¹ Oui on ko̱ mème sé hang baï ta, tokoré go̱ro̱ na mi tane ga sa baï kon toula ya, name guè mona Ouone ndo̱t tane waou.

²² Da fèn on ko̱ name oui, na mi ya an ndo̱kè, baï ko̱ name pèng bina baïnjaka guingna nèli, ka nding fènli on ko̱ mi bi wélé toulè.

²³ Da on ba bina baïnjaka guingna nè: dadaon an name la bilaou ling a Goune nè Jésus‐Christ, da sé hang hana, mabahana ka bina baïnjaka on ko̱ kème bi hi na tou.

²⁴ Njoukou on ko̱ pèng bina baïnjaka guingna nèli mi bi an bilè da kème bi an bila njoukou on. Da name toutou ko̱ kème bi an bila, ka mboro Esprit on ko̱ kème hi na tou.