Titili Takarata a Jean ko̱ dé 2 - Féké Testament 1947

¹ Lélé goune nili, mè dé fèn aïnli bi takarata hi oui baï an ouime tane nding békéfèn ya. Da tokoré njoukouna mi nding békéfèn name jing Njou‐hiouna Baba baï toula an bèl monè, ko̱ ba Jésus‐Christ, kè ko̱ ba njou‐guédék.

² Da kè ba sacrifice‐cho̱ko̱kè baï chona békéfèn nali, da mi tane ti ba ama ka ho̱kè ya, da ndé tèn a njou‐koukoulali bon kéng.

³ Tokoré name pèng bina baïnjaka guingnali, ka mboro on na toutou ko̱ name tou nè.

⁴ Ké ko̱ sa ba: Mè toutou nè, da tane ga pèng bina baïnjaka guingna nèli ya, kè ba njou‐bana wo̱ko̱ da babaï tane ti bilè ya.

⁵ Da kè on ko̱ mi pèng baïnjakè, sénahang a Ouone mi gui guédék ka babaï an bilè; ka mboro on, name toutou ba na an bilè.

⁶ Kè on ko̱ sa ba kème bi an bilè, dadaon an kème ndé sé kéng mahana ko̱ kè fènè mi ti sé jinguèl.

⁷ Oui ko̱ mème sé hang baï ta, mè tane ga dé ba féké bina baïnjaka guingna hi oui ya, da ba tang bong bina baïnjaka guingna on ko̱ mi na jing oui ka titilikè; tang bina baïnjaka guingna aïn ba baïnjaka on ko̱ ouime lala bon tou.

⁸ Da mème dé féké bina baïnjaka guingna ba aféké hi oui, fèn on ko̱ mi na ba babaï an bilè mi ndé na bil baï kéng, baï ko̱ yilime mi fan da gba takanafèn mi taka kassénaï.

⁹ Kè on ko̱ mi sa ba kè an bil takanafèn, da jèk yine nè, kème pane an bil yilime.

¹⁰ Kè on ko̱ sé hang a yine nè mi bi an bil takanafèn, da fèn bèna mi tane ti bilè ya.

¹¹ Da kè on ko̱ mi jèk yine nè, kème kaou an bil yilime, da kème sé an bil yilime, da tane ga tou guèl on kème guè séna ya, baï ko̱ yilime mi foukourou nonè tou.

¹² Lélé goundi, mè dé takarata hi oui baï ko̱ mi yèng bi mboro bekéfèn abaïli tou baï toul ling‐è.

¹³ Mè dé takarata hi oui babali, baï ko̱ ouime toutou nè tou, kè on ko̱ mi kaou jinguèl ka titilikè. Mè dé takarata hi oui bala goundi, baï ko̱ ouime gnèrèn njou‐békékè tou. Mè dé takarata hi oui lélé goundi baï ko̱ ouime toutou Baba tou.

¹⁴ Mè ti dé takarata hi oui jinguèl, babali, baï ko̱ ouime tou nè tou, kè on ko̱ mi kaou jinguèl ka titilikè. Mè ti dé takarata hi oui jinguèl bala goundi, baï ko̱ ouime njèrèn ta, da baï ko̱ baïnjaka a Ouone mi bi an bil baï, tèn baï ko̱ ouime gnèrèn njou‐békékè tou.

¹⁵ Oui tane sé hang bilkaou koukoula aïn ya, tèn fènli on ko̱ na an bilkaou koukoula aïn ya. Tokoré njoukouna mi sé hang bilkaou koukoula aïn, sénahang a Baba mi tane ti bilè ya;

¹⁶ baï fènli on bon ko̱ na an bilkaou koukoula aïn, nzala naïn‐mone, nzala ko̱na fèn ka none, tèn ndoïna gnaïna a yana, mi tane ga gui ka mona Baba ya, da mi gui ka ba bilkaou koukoula aïn.

¹⁷ Da bilkaou koukoula aïn mi ndé ta jing nzala fèn nèli bon kéng: da kè on ko̱ mi kaou mara fal toula Ouone mi kaou kambèlè.

¹⁸ Lélé goundi, on ba sèkèrè name da mahana ko̱ ouime ti lala jinguèl ba yé antichrist ma gui, tongna kassénaï antichristli nyèta mi gui tou, da ka mboro aïn name toutou ko̱ on ba sèkèrè name.

¹⁹ Kli tèn kala an woro na tou, da klime tane ti ba dodok amali ya; baï ko̱ tokoré klime yé ba dodok amali, klime ti bi jing na, da fèn on mi tèn tou baï wéra nonkè bi kala ko̱ kli bon mi tane ti ba dodok amali ya.

²⁰ Da abaï, ouime jing samnafèn kon toul baï ka Njou‐tangna fofoto, da ouime toutou fènli bon.

²¹ Mè tane ga dé takarata hi oui ba baï ko̱ ouime tane ga tou babaï ya, da ba baï ko̱ ouime toutou babaï, da baï ko̱ wo̱ko̱ mbéo mi tane ga ti jing babaï ya.

²² Guème ko̱ ba njou‐bana wo̱ko̱, tokoré mi tane ti ba kè on ko̱ mi njé njaka ba Jésus mi tane ti ba Christ ya lé? Kè on ko̱ ba antichrist ko̱ mi njé njaka baï a Baba fènè tèn Goune.

²³ Kè on ko̱ mi njé njaka baï a Goune, mi tane ti jing Baba ya; da kè on ko̱ mi sa baï a Goune tang bi kala mi ndé jing Baba kéng.

²⁴ Da dadaon an fèn on ko̱ ouime ti la jinguèl ka titilikè mi bi an bil baï. Tokoré fèn on ko̱ ouime ti la ka titilikè tou mi bi an bil baï, yé oui kéng ma ndé bi an bila Goune tèn an bila Baba.

²⁵ Da aïn ba bina gonjaka on ko̱ kème bi hi na tou, ko̱ ba yana kambèlè.

²⁶ Mè dé fèn aïnli bi takarata hi oui tou, ba baï toula kli on ko̱ mi mong oui an ouime wol.

²⁷ Da baï abaï, baï toul ko̱na samnafèn on ko̱ ouime jing an ndo̱kè jinguèl mi bi an bil baï, da mi tane ma an njoukouna mi sa ba baï hi oui ya; da baï ko̱ baï samnafèn on mi to̱ko̱ fènli bon hi oui da baï on ba babaï ka tane ti ba wo̱ko̱ ya, mahana ko̱ baï on mi to̱ko̱ hi oui, oui bi an bilè.

²⁸ Da kassénaï lélé goundi oui bi an bilè. Mono on ko̱ tokoré kème tèn gui na ma guè monè ndo̱t, da chonron ba séna na an nonè tane tiya, ko̱ kème kaïn féré gui.

²⁹ Da tokoré ouime toutou ko̱ kè ba guédék, dadaon an ouime ndé toutou ba njoukouli on bon ko̱ mi pane ndingna guédék kème mboung kli tou.