Titili Takarata a Jean ko̱ dé 1 - Féké Testament 1947

¹ Fèn on ko̱ mi na jinguèl ka titilikè, fèn on ko̱ name la tou, fèn on ko̱ name ko̱ ka nona tou, fèn on ko̱ name ènrèn, ka da ka ndo̱ko̱ na, baï toul Baïnjaka a yana,

² da yana on mi wéré nonkè bi kala tou, da name ko̱ nè tou, da name sa bongbaï nè, da name to̱ko̱ yana on hi oui ko̱ ba yana kambèlè, ko̱ mi na jinguèl an bèl mona Baba fènè, da mi wéré nonkè bi kala hi na tou,

³ fèn on ko̱ name ko̱ tou, ka la tou, mi ko̱ name ndé sa hi oui kéng, baï an oui bon mi tou baï vona ka go̱ro̱ mbéo jing na. Da ka babaï, vona ka go̱ro̱ mbéo na mi na jing ba Baba fènè da jing Goune nè Jésus‐Christ.

⁴ Da name dé fèn aïnli bi takarata hi oui, baï an jangnandaï na mi yé mba.

⁵ Da on ba mboro pina on ko̱ name la an njakè, da name dala hi oui, ko̱ ba Ouone ba takanafèn, da yilime mi tane ti bilè gounfènakè ya.

⁶ Tokoré name sa ba name vo ka go̱ro̱ mbéo jing nè, da name sé an bil yilime, name ba ba wo̱ko̱, da name tane ga pane jing ndingna ka babaï ya.

⁷ Da tokoré name sé an bil takanafèn, mahana ko̱ kè fènè mi kaou an bil takanafèn, name vo ka go̱ro̱ mbéo an woro hana, da séme a Jésus Goune nè mi tourou békéfèn na bon guèfal.

⁸ Tokoré name sa ba békéfèn name tiya, name mong ba mona fèna, da babaï mi tane ti bila ya.

⁹ Tokoré name hèkè békéfèn nali bi kala, kè ba lodok da guédék baï yèngna bi mboro békéfèn nali ka tourou békéfèn na bon guèfal.

¹⁰ Tokoré name sa ba name tane ga nding békéfèn ya, name nding nè tèn ba njou‐bana wo̱ko̱, da baïnjakè mi tane ti bila ya.