ZEPANIA 3 - Ka Baibala Hemolele

1 Nā pōʻino o Ierusalema, no ka hewa o ia wahi. 8 Nā ʻōlelo hoʻomaikaʻi i nā haipule. 14 Ua hōʻike ʻia nā mea e ʻoliʻoli ai.

MOKUNA III.

¹ ¶ Auē ka mea e kipi ana, a me ka mea haumia, Ke kūlanakauhale hoʻokoʻikoʻi.

² ʻAʻole ia i hoʻolohe i ka leo, ʻAʻole hoʻi i ʻae aku i ke aʻo ʻia mai; ʻAʻole hoʻi ia i paulele iā Iēhova, ʻAʻole ia i hoʻokokoke aku i kona Akua.

³ ʻO nā aliʻi i loko ona, he poʻe liona uō lākou; ʻO nā luna kānāwai ona, he poʻe ʻīlio hae o ke ahiahi; ʻAʻole lākou e hoʻokoe a hiki i ke kakahiaka.

⁴ He poʻe haʻaheo nā kāula ona, nā kānaka hoʻopunipuni; Ua hoʻohaumia nā kāhuna ona i ke keʻena kapu, Ua haʻihaʻi lākou i ke kānāwai.

⁵ I waenakonu o lākou ʻo Iēhova ka mea hoʻopono, ʻAʻole ia e hana i ka pono ʻole; E hoʻākāka mai ana ia i kona pono ia kakahiaka aʻe, ia kakahiaka aʻe, ʻAʻole hāʻule; Akā, ʻo ka mea hana hewa, ʻaʻole ia i hoʻomaopopo i ka hilahila.

⁶ “Ua hōʻoki iho au i nā lāhui kanaka; Ua hoʻohiolo ʻia nā pā kaua o lākou; Ua hoʻoneoneo au i ko lākou mau alanui, I māʻalo ʻole aʻe kekahi i laila; Ua hoʻohina ʻia nā kūlanakauhale o lākou, A koe ʻole kekahi, ʻaʻole hoʻi e noho ana kekahi kanaka i loko.

⁷ “ʻŌlelo ihola au, ‘Inā ʻoe e makaʻu mai iaʻu, A e ʻae mai i ke aʻo ʻia,’ I hōʻoki ʻole ʻia ai kona noho ʻana, E like me nā mea aʻu e ʻōlelo mua ai nona; Akā, ua ala lākou i ka wanaʻao, e hoʻohaumia i kā lākou hana a pau.

⁸ ¶ “No ia mea, e kali ʻoukou iaʻu,” wahi a Iēhova, “A hiki i ka lā aʻu e kū aʻe ai i ka waiwai pio; No ka mea, ʻo kuʻu manaʻo nō e hōʻuluʻulu i nā lāhui kanaka, E hoʻākoakoa i ko nā aupuni, E ninini iho i kuʻu inaina ma luna o lākou, I ka wela a pau o koʻu huhū; No ka mea, e pau auaneʻi ka honua a pau I ke ahi o kuʻu lili.

⁹ “A laila au e hāʻawi aku ai i nā kānaka i ka lehelehe maikaʻi, I kāhea aku ai lākou a pau i ka inoa ʻo Iēhova, A e hoʻokauā aku ai nāna me ka poʻohiwi hoʻokahi.

¹⁰ “Mai nā ʻāina mai o ka muliwai ʻo ʻAitiopa, E lawe mai ana koʻu poʻe haipule, ʻo ke kaikamahine o koʻu poʻe hele liʻiliʻi, I ʻālana naʻu.

¹¹ “Ia lā nō, ʻaʻole ʻoe e hilahila I kāu hana ʻana a pau, I nā mea āu i lawehala ai iaʻu; No ka mea, a laila au e lawe aku ai mai ou aku lā I kou poʻe e ʻoliʻoli i ka hoʻokiʻekiʻe; I ʻole ai ʻoe e hoʻokiʻekiʻe hou aku Ma kuʻu mauna hoʻāno.

¹² “A e hoʻolilo au i nā kānaka i koe i waena o ʻoukou I poʻe haʻahaʻa, a me ka ʻilihune, A e paulele auaneʻi lākou i ka inoa ʻo Iēhova.

¹³ “ʻAʻole e hana ʻino ke koena o kā ʻIseraʻela, ʻAʻole hoʻi e ʻōlelo hoʻopunipuni lākou; ʻAʻole nō hoʻi e loaʻa ka elelo wahaheʻe I loko o ko lākou waha; Akā, e ʻai auaneʻi lākou, a e moe iho, ʻAʻole kekahi mea e hoʻoweliweli ana iā lākou.”

¹⁴ ¶ E mele ʻoe, e ke kaikamahine o Ziona, E hoʻōho aku, e kā ʻIseraʻela, e ʻoliʻoli, E hauʻoli hoʻi me kou naʻau a pau, E ke kaikamahine o Ierusalema.

¹⁵ Ua lawe akula ʻo Iēhova i kou hoʻohewa ʻia ʻana, Ua kipaku akula i kou poʻe ʻenemi; ʻO Iēhova ke Aliʻi o kā ʻIseraʻela, ʻo ia nō i waena ou; ʻAʻole hoʻi ʻoe e ʻike hou i ka hewa.

¹⁶ Ia lā lā, e ʻōlelo ʻia auaneʻi iā Ierusalema, “Mai makaʻu ʻoe, e Ziona; Mai hoʻonāwaliwali i kou mau lima.

¹⁷ “ʻO Iēhova ʻo kou Akua i waena ou, He mana kona, e hoʻōla mai ana ʻo ia; E ʻoliʻoli auaneʻi ʻo ia nou me ka hauʻoli, E noho mālie ʻo ia i kona aloha, E hauʻoli ʻo ia nou me ka mele ʻana.

¹⁸ “E hōʻuluʻulu ana au i ka poʻe e ʻū ana no kāu mau ʻahaʻaina, I lilo ai lākou nou, Ka poʻe kaumaha i ka hōʻino ʻia nona.

¹⁹ “Aia hoʻi, e hōʻauheʻe auaneʻi au i ka poʻe a pau i hoʻopilikia iā ʻoe ia manawa; A e mālama nō au i ka mea ʻoʻopa, A e hoʻihoʻi mai ana nō au i ka mea i kipaku ʻia aku; A e hāʻawi au iā lākou i ka hoʻomaikaʻi ʻia, a me ka inoa kaulana, Ma nā ʻāina a pau i hoʻohilahila ʻia ai lākou.

²⁰ “Ia manawa nō naʻu ʻoukou e alakaʻi mai, I ka manawa aʻu e hōʻuluʻulu ai iā ʻoukou; A e hoʻokaulana au i ko ʻoukou inoa no ka hoʻomaikaʻi ʻia i waena o nā kānaka a pau o ka honua, I kuʻu wā e hoʻihoʻi mai ai i ko ʻoukou pio ʻana, i mua o ko ʻoukou mau maka,” wahi a Iēhova.