ZEPANIA 2 - Ka Baibala Hemolele

1 Ua aʻo ʻia lākou e ʻimi koke i ke Akua, i maluhia ai. 4 He wānana no ko Pilisetia, ko Moaba, ko ʻAmona, ko ʻAitiopa, a no ko ʻAsuria.

MOKUNA II.

¹ ¶ E hoʻāʻo iā ʻoukou iho, a e hoʻāʻo ʻia hoʻi, E ka lāhui kanaka hilahila ʻole;

² Ma mua o ka hiki ʻana mai o ka ʻōlelo paʻa, Ma mua o ka hele ʻana o ka lā e like me ka ʻōpala; Ma mua mai o ke kau ʻana mai o ka inaina ʻenaʻena o Iēhova iā ʻoukou; Ma mua mai o ke kau ʻana mai o ka lā o ko Iēhova inaina iā ʻoukou.

³ E ʻimi ʻoukou iā Iēhova, E ka poʻe akahai a pau o ka honua, Ka poʻe i hahai i kona makemake; E ʻimi i ka pono, e ʻimi i ke akahai; I maluhia ai paha ʻoukou I ka lā o ko Iēhova inaina.

⁴ ¶ No ka mea, e haʻalele ʻia auaneʻi ʻo Gaza, E neoneo auaneʻi hoʻi ʻo ʻAsekelona. E hoʻokuke ʻia auaneʻi ʻo ʻAsedoda i ka wā awakea, A e hoʻokahuli ʻia ʻo ʻEkerona.

⁵ Auē ka poʻe e noho ana ma kahakai! ʻO ka poʻe Kereti! Ke kūʻē nei ka ʻōlelo a Iēhova iā ʻoukou. E Kanaʻana, ka ʻāina o ko Pilisetia, E hoʻopau auaneʻi au iā ʻoe I koe ʻole kekahi kanaka.

⁶ A e lilo auaneʻi ka ʻāina kahakai I wahi no nā hale kahu hipa, a me nā pā hipa.

⁷ A e lilo ua ʻāina lā No ke koena o ka ʻohana a Iuda; E ʻai auaneʻi lākou i loko o laila; A i ke ahiahi, e moe lākou i loko o nā hale o ʻAsekelona; No ka mea, e ʻike mai auaneʻi ʻo Iēhova ko lākou Akua iā lākou, A e hoʻihoʻi mai i ko lākou poʻe pio.

⁸ ¶ “Ua lohe au i ka hoʻohewa ʻana mai a kā Moaba, A me ka ʻōlelo hōʻino ʻana a kā ʻAmona, I ka mea a lākou i hōʻino ai i koʻu poʻe kānaka, A hoʻokiʻekiʻe aʻela e kūʻē mai i ko lākou palena ʻāina.

⁹ “No laila, ma kuʻu ola ʻana,” wahi a Iēhova o nā kaua, ʻO ke Akua no kā ʻIseraʻela, “E like auaneʻi ʻo Moaba me Sodoma, A ʻo kā ʻAmona e like me Gomora, He nāhelehele ʻoʻoi, me nā lua paʻakai, A me ka neoneo mau loa; Na ke koena o koʻu poʻe kānaka lākou e hao aku, A e lilo lākou no ke koena o koʻu poʻe kānaka.”

¹⁰ E hiki nō ia mea iā lākou, no ko lākou hoʻohanohano ʻana, no ka ʻōlelo hōʻino ʻana a lākou i haʻanoʻu ai, a me ka hoʻokiʻekiʻe kūʻē i ka poʻe kānaka o Iēhova o nā kaua.

¹¹ He mea hoʻoweliweli auaneʻi ʻo Iēhova iā lākou; no ka mea, e hoʻohoka auaneʻi ʻo ia i nā akua a pau o ka honua; a e hoʻomana aku iā ia ko nā ʻāina a pau o kānaka ʻē, ʻo kēlā mea kēia mea ma kona wahi iho.

¹² ¶ “ʻOukou nō hoʻi, e ko ʻAitiopa, e hou ʻia auaneʻi hoʻi ʻoukou i kuʻu pahi kaua.”

¹³ E ʻō aku hoʻi ʻo ia i kona lima e kūʻē i ke kūkulu ʻākau, A e luku aku iā ʻAsuria; A e hoʻoneoneo iā Nineva, A panoa e like me ka wao akua.

¹⁴ E moe iho nā ʻohana hipa i loko ona, A me nā holoholona a pau o nā ʻāina; E moe nō hoʻi ka pelikana, a me ke kipoda Ma luna o nā kia pōhaku ona; E hoʻokani ko lākou leo ma nā puka makani ona; He neoneo ma nā paepae puka; no ka mea, e wehe ʻia auaneʻi nā papa kedera ona.

¹⁵ ʻO kēia ke kūlanakauhale ʻoliʻoli I noho nanea, Ka mea i ʻōlelo iho i loko o kona naʻau, “ʻO wau wale nō, ʻaʻohe lua!” Nani kona lilo ʻana i mea neoneo, Kahi e moe ai nā holoholona hihiu! ʻO ka mea e māʻalo aʻe ana ia wahi, E kāhāhā ia me ka hoʻoluliluli aku i kona lima.