ZEPANIA 1 - Ka Baibala Hemolele

1 Ua huhū ʻia kā Iuda a me Ierusalema no ka hoʻomana kiʻi. 7 No nā pōpilikia e kau mai ana ma luna o ka poʻe hewa.

MOKUNA I.

¹ ¶ ʻO ka ʻōlelo a Iēhova, ka mea i hiki mai i o Zepania lā i ke keiki a Kusi, ke keiki a Gedalia, ke keiki a ʻAmaria, ke keiki a Hizekia, i nā lā o Iosia ke keiki a ʻAmona, ke aliʻi o kā Iuda.

² ¶ “E lawe loa aku auaneʻi au i nā mea a pau Mai luna aku o ka ʻāina,” wahi a Iēhova.

³ “E lawe auaneʻi au i nā kānaka a me nā holoholona; E lawe auaneʻi au i nā manu o ka lewa, A me nā iʻa o ke kai, A me nā mea e hina ai, me ka poʻe hewa; A e hōʻoki iho hoʻi au i nā kānaka mai luna aku o ka ʻāina,” wahi a Iēhova.

⁴ “E kau aku hoʻi au i kuʻu lima ma luna o kā Iuda, A me nā kānaka a pau o Ierusalema; A e hōʻoki iho au i ke koena o ko Baʻala, mai kēia wahi aku, A me ka inoa o nā mea hoʻomana kiʻi a me nā kāhuna hoʻi.

⁵ “A me ka poʻe hoʻomana i ka pūʻali o ka lani ma luna o nā hale; A me ka poʻe hoʻomana, a hoʻohiki hoʻi ma Iēhova, a ma ka hoʻohiki ma Malekama;

⁶ “A me ka poʻe i hoʻi i hope mai o Iēhova aku; A me ka poʻe ʻaʻole i ʻimi iā Iēhova, ʻaʻole hoʻi i nīnau aku nona.”

⁷ ¶ E hāmau ʻoe ma ke alo o Iēhova ka Haku; No ka mea, ua kokoke mai nei ka lā o Iēhova; No ka mea, ua hoʻomākaukau maila ʻo Iēhova i ka mōhai, A ua hoʻolaʻa ihola ʻo ia i kona poʻe hoa ʻai.

⁸ “A i ka lā o ko Iēhova mōhai ʻana, E hoʻopaʻi auaneʻi au i nā aliʻi a me nā keiki a ke aliʻi, A me ka poʻe a pau i ʻaʻahu ʻia i nā kapa ʻē.

⁹ “Ia lā nō, e hoʻopaʻi au i ka poʻe a pau e lele ana ma luna o ka paepae puka, A e hoʻopiha i ka hale o ko lākou haku i nā mea i hao wale ʻia a me ka hoʻopunipuni.

¹⁰ “A ia lā nō,” wahi a Iēhova, “He leo nō ka uē ʻana mai ka Puka Iʻa mai, A he ʻaoa ʻana mai ka ʻĀpana ʻAlua mai, A me ka luku nui ʻana mai nā puʻu mai.

¹¹ “E kanikau ʻoukou, e nā kānaka o Maketesa; No ka mea, ua hōʻoki ʻia aʻe nā kānaka kūʻai a pau; ʻO ka poʻe a pau i kaumaha i ke kālā, ua ʻoki ʻia.

¹² “Ia manawa nō, E huli iho nō wau iā Ierusalema me nā kukui, A e hoʻopaʻi i ka poʻe e noho paʻakikī ana Ma luna o ko lākou mākū; E ʻōlelo ana i loko o ko lākou naʻau, ‘ʻAʻole e hana mai ana ʻo Iēhova i ka maikaʻi, ʻaʻole hoʻi e hana ia i ka ʻino.’

¹³ “No laila, e lilo auaneʻi ko lākou waiwai i pio, A me nā hale o lākou i neoneo; E kāpili lākou i nā hale, ʻaʻole hoʻi e noho i loko; E kanu lākou i nā māla waina, ʻaʻole hoʻi e inu i ka waina o laila.”

¹⁴ ¶ Ua kokoke mai ka lā nui o Iēhova, Ua kokoke mai, a e wikiwiki loa mai ana Ka leo no ka lā o Iēhova; I laila e uē nui ai ke kanaka ikaika.

¹⁵ He lā no ka inaina ua lā lā, He lā pōpilikia a me ka pōʻino, He lā e hao wale ʻia ai a me ka hoʻoneoneo, He lā pouli wale a me ka pōʻeleʻele, He lā e uhi mai ai nā ao a me ka pouli paʻapū,

¹⁶ He lā o ka pū kani a me ka hoʻokani ʻana, E kūʻē i nā kūlanakauhale i puni i ka pā, A ma nā hale kiaʻi kiʻekiʻe.

¹⁷ A e hoʻopilikia nō wau i nā kānaka, I hele ai lākou e like me nā makapō; No ka mea, ua hana hewa aku lākou iā Iēhova; A e ninini ʻia aku ko lākou koko e like me ka lepo, A ʻo ko lākou ʻiʻo e like me ka ʻōpala.

¹⁸ ʻAʻole hoʻi e hiki i kā lākou kālā, ʻaʻole hoʻi i kā lākou gula Ke hoʻopakele iā lākou I ka lā o ko Iēhova inaina; Akā, e pau auaneʻi ka ʻāina a pau I ke ahi o kona lili ʻana; No ka mea, e hoʻopau koke ana ʻo ia I ka poʻe a pau E noho ana ma ka ʻāina.