ZEKARIA 9 - Ka Baibala Hemolele

1 Ka pōʻino ʻana o ko Suria, ko Turo, a me ko Pilisetia. 9 Ke komo ʻana o Kristo i loko o Ziona ma luna o ka hoki. 16 Ka lanakila ʻana o ka ʻekalesia.

MOKUNA IX.

¹ ¶ Ka wānana o ka ʻōlelo a Iēhova i ka ʻāina ʻo Haderaka, a ʻo Damaseko kona wahi e hoʻomaha ai; no ka mea, ua kau pono ʻia nā maka o nā kānaka, a me nā ʻohana a pau o kā ʻIseraʻela ma luna o Iēhova;

² A ʻo Hamata hoʻi kona palena; ʻO Turo hoʻi, a me Zidona; no ka mea, ua naʻauao loa ia.

³ A kūkulu ihola ʻo Turo i pā kaua nona, A ahu ihola i ke kālā e like me ka lepo, A me ke gula e like me ka naele o nā alanui.

⁴ Aia hoʻi, na ka Haku ia e hoʻokuke aku, A e hoʻolei aku i kona waiwai i loko o ke kai; A e hoʻopau ʻia auaneʻi ʻo ia i ke ahi.

⁵ E ʻike auaneʻi ʻo ʻAsekelona me ka makaʻu; ʻO Gaza hoʻi, a e haʻalulu nui loa ia; A me ʻEkerona; no ka mea, e pohō auaneʻi kona manaʻolana; E make ke aliʻi o Gaza, A e kanaka ʻole auaneʻi ʻo ʻAsekelona.

⁶ A e noho ka malihini ma ʻAsedoda, A e hōʻoki iho nō wau i ke kiʻekiʻe o ka poʻe Pilisetia.

⁷ E lawe aku hoʻi au i kona koko mai loko mai o kona waha, A me kona mau mea hoʻopailua mai waena o kona mau niho. Akā, ʻo ka mea i waiho ʻia, no ko kākou Akua ia, E like auaneʻi ia me ka luna ʻāina, ma kā Iuda, A ʻo ʻEkerona hoʻi me he Iebusa lā.

⁸ E hoʻomoana nō wau a puni ka hale oʻu, no ka poʻe kaua, I ko lākou hele ʻana aʻe a i ka hoʻi ʻana mai; ʻAʻole hoʻi e puka hou aʻe kekahi aliʻi hoʻoluhi i waena o lākou; No ka mea, ua ʻike nō kaʻu mau maka.

⁹ E hauʻoli nui, e ke kaikamahine o Ziona, E hoʻōho ʻoliʻoli, e ke kaikamahine o Ierusalema; Aia hoʻi, e hele mai ana kou aliʻi i ou lā; He hoʻopono, a he hoʻōla nō kona; He akahai nō, a e noho ana ma luna o ka hoki, ʻo ke keiki hoʻi a ka hoki.

¹⁰ E hoʻopau auaneʻi hoʻi au i nā hale kaʻa mai ko ʻEperaima aku, A me ka lio mai Ierusalema aku; E hōʻoki ʻia hoʻi ke kakaka kaua; A e haʻi aku auaneʻi ʻo ia i ka maluhia i nā lāhui kanaka; A mai kekahi kai a hiki i kēlā kai kona aupuni, A mai ka Muliwai aku a hiki i nā palena o ka honua.

¹¹ ¶ ʻO ʻoe hoʻi, no ke koko o kāu berita, E hoʻokuʻu aku nō au i kou poʻe paʻahao, Mai loko aʻe o ka lua meki, ʻo kahi wai ʻole.

¹² E huli aʻe ʻoukou i ka pā kaua, e ka poʻe pio manaʻolana; No ka mea, ke haʻi aku nei au i nēia lā, E uku pālua aku nō au nāu.

¹³ No ka mea, e lena auaneʻi au i kā Iuda noʻu, E lena hoʻi au i kā ʻEperaima e like me ke kakaka, A laila e hōʻeuʻeu aʻe hoʻi au i kāu mau keiki, e Ziona; E kūʻē i kāu mau keiki, e Iavana, A e hoʻolilo au iā ʻoe e like me ka pahi kaua a ke kanaka koa.

¹⁴ A e ʻikea auaneʻi ʻo Iēhova ma luna o lākou, A e lele aku kona pua e like me ka uila; A e hoʻokani ʻo Iēhova ka Haku i ka pū, A e hele aku nō ia i loko o nā makani ʻino o ke kūkulu hema.

¹⁵ Na Iēhova o nā kaua lākou e hoʻomalu mai; E ʻai iho lākou, a e hehi lākou ma luna o nā ʻalā o ka maʻa; A e inu lākou, a e walaʻau e like me ka poʻe inu waina; A e hoʻopiha ʻia lākou e like me nā bola, A me nā kihi o ke kuahu.

¹⁶ A e mālama mai ʻo Iēhova ko lākou Akua iā lākou ia lā, E like me ka ʻohana hipa, i poʻe kānaka nona; No ka mea, e lilo auaneʻi lākou i mau pōhaku maikaʻi o ka pāpale aliʻi, I hoʻokiʻekiʻe ʻia ma luna o kona ʻāina.

¹⁷ Nani ka nui o kona lokomaikaʻi! Nani hoʻi ka nui o kona maikaʻi! ʻO ka palaoa ka mea e hoʻoulu ai i nā keiki kāne, A ʻo ka waina hou i nā kaikamāhine.