ZEKARIA 8 - Ka Baibala Hemolele

1 E piha hou ʻo Ierusalema i kānaka. 9 Paipai nā kānaka e hana i ka luakini. 16 No ka ʻoiaʻiʻo, ka pono a me ka haipule. 20 Ka huli o nā lāhui kanaka i ke Akua.

MOKUNA VIII.

¹ ¶ A hiki hou maila ka ʻōlelo a Iēhova o nā kaua, ʻī maila,

² “Penei kā Iēhova o nā kaua e ʻōlelo mai nei, ʻI lili nō au iā Ziona me ka manaʻo nui, a i lili hoʻi au nona me ka inaina nui.’

³ “Ke ʻōlelo mai nei Iēhova penei, ‘Ua hoʻi mai nei au i Ziona, a e noho auaneʻi au i waena o Ierusalema; a e kapa ʻia ʻo Ierusalema, he Kūlanakauhale no ka ʻOiaʻiʻo, a ʻo ka mauna o Iēhova o nā kaua, he Mauna Hoʻāno.

⁴ “Ke ʻōlelo mai nei ʻo Iēhova o nā kaua, ‘Ma ia hope e noho nā ʻelemākule a me nā luāhine ma nā kuamoʻo o Ierusalema, a e lawe kēlā kanaka kēia kanaka i kona koʻokoʻo ma kona lima no ka nui o nā lā.

⁵ ‘A e paʻapū nā kuamoʻo o ua kūlanakauhale nei i nā keiki kāne, a me nā kaikamāhine e pāʻani ana ma nā alanui ona.’

⁶ “Ke ʻōlelo mai nei ʻo Iēhova o nā kaua penei, ‘Inā he paʻakikī kēia i mua o kēia koena kanaka i kēlā manawa, he mea paʻakikī hoʻi anei ia i mua oʻu?’ wahi a Iēhova o nā kaua.

⁷ “Ke ʻōlelo mai nei ʻo Iēhova o nā kaua, ‘Aia hoʻi, e hoʻopakele auaneʻi au i oʻu poʻe kānaka, mai ka ʻāina hikina mai, a mai ka ʻāina komohana mai;

⁸ a e alakaʻi mai au iā lākou, e noho lākou i waena o Ierusalema; e lilo mai nō lākou i kānaka noʻu, a ʻo wau auaneʻi ko lākou Akua ma ka ʻoiaʻiʻo a ma ka pono.’

⁹ ¶ “Ke ʻōlelo mai nei ʻo Iēhova o nā kaua penei, e hoʻoikaika i kā ʻoukou mau lima, e ka poʻe lohe i kēia mau lā ia mau ʻōlelo, ma ka waha o nā kāula, ʻo ka poʻe e noho ana i ka wā i hoʻokumu ʻia ai ka hale o Iēhova o nā kaua, i kūkulu ʻia ai ka luakini.

¹⁰ ‘No ka mea, ma mua o ia mau lā, ʻaʻole i loaʻa i ke kanaka ka uku, ʻaʻole hoʻi he uku no ka holoholona; ʻaʻole hoʻi i maluhia ka mea i hele aku i waho a i hoʻi mai i loko, no ka ʻenemi; no ka mea, hoʻokūʻēʻē akula au i nā kānaka a pau i ko lākou mau hoalauna.

¹¹ ‘Akā, i nēia manawa, ʻaʻole au e hana aku i kēia koena kanaka, e like me kaʻu i nā lā ma mua,’ wahi a Iēhova o nā kaua.

¹² ‘No ka mea, e maluhia ka hua kanu, a e hua mai ke kumu waina i kona hua, a e hoʻoulu mai hoʻi ka honua i kāna mea ulu, a e hāʻawi mai hoʻi ka lani i kona hau, a e hāʻawi auaneʻi au i kēia mau mea a pau no kēia koena kanaka.

¹³ ‘No ka mea, me ʻoukou i hōʻino ʻia i waena o ko nā ʻāina ʻē, e ka ʻohana a Iuda, a me ka ʻohana a ʻIseraʻela, pēlā nō au e hoʻōla ai iā ʻoukou, a e hoʻopōmaikaʻi iā ʻoukou; mai makaʻu ʻoukou, e hoʻoikaika hoʻi i ko ʻoukou mau lima.’

¹⁴ ¶ “No ka mea, penei ka ʻōlelo ʻana mai a Iēhova o nā kaua, ‘Me kaʻu i manaʻo ai e hoʻopaʻi aku i ko ʻoukou hewa, i ka wā o ko ʻoukou mau mākua i hoʻonāukiuki mai ai iaʻu,’ wahi a Iēhova o nā kaua, ‘ʻaʻole hoʻi au i hoʻololi hou i ka manaʻo;

¹⁵ pēlā hoʻi, manaʻo iho au i nēia mau lā, e lokomaikaʻi aku iā Ierusalema, a i ka ʻohana a Iuda; mai makaʻu ʻoukou.

¹⁶ ‘Eia nā mea a ʻoukou e hana ai; e ʻōlelo ʻoiaʻiʻo aku kēlā kanaka kēia kanaka i kona hoalauna; a e hoʻokolokolo ma ka ʻoiaʻiʻo, a ma ka mea e malu ai i loko o nā ʻīpuka o ʻoukou.

¹⁷ ‘Mai manaʻo ʻino aku kekahi o ʻoukou i kona hoalauna ma loko o ko ʻoukou naʻau; mai makemake hoʻi i ka hōʻike wahaheʻe ʻana; no ka mea, ʻo kēia mau mea a pau kaʻu e inaina nei,’ wahi a Iēhova.”

¹⁸ ¶ Hiki maila hoʻi ka ʻōlelo a Iēhova i oʻu nei, i ka ʻī ʻana mai,

¹⁹ “Penei kā Iēhova a nā kāua e ʻōlelo nei, ‘ʻO ka hoʻokē ʻai ʻana o ka malama ʻahā, me ka hoʻokē ʻai ʻana o ka ʻalima, me ka hoʻokē ʻai ʻana o ka ʻahiku, a me ka hoʻokē ʻai ʻana o ka ʻumi, e lilo ia i mea ʻoliʻoli a me ka hauʻoli, a i mau ʻahaʻaina ʻoliʻoli i ka ʻohana a Iuda; no laila e makemake ʻoukou i ka ʻoiaʻiʻo a me ke kuʻikahi.’

²⁰ “Penei ka ʻōlelo ʻana a Iēhova o nā kaua, ‘Ma ia hope aku nō, e hele mai ai nā kānaka, a me nā kamaʻāina o nā kūlanakauhale he nui.

²¹ ‘A e hele aku nā kamaʻāina o kekahi wahi i kekahi, me ka ʻī aku, “E haele pū kākou e pule i mua o Iēhova, a e ʻimi aku iā Iēhova o nā kaua; ʻo wau hoʻi kekahi e hele.”

²² ‘A e hele mai nā kānaka he nui loa, a me nā lāhui kanaka ikaika, e ʻimi iā Iēhova o nā kaua ma Ierusalema, a e pule i mua o Iēhova.’

²³ “Penei ka ʻōlelo ʻana mai o Iēhova o nā kaua, ‘Ia manawa, e lālau mai nā kānaka he ʻumi no nā lāhui kanaka o nā ʻōlelo a pau, e lālau mai auaneʻi lākou i ke kapa o ke kanaka Iudaio, me ka ʻī ʻana mai, “E hele pū mākou me ʻoe; no ka mea, ua lohe mākou, me ʻoe pū nō ke Akua.”’”