ZEKARIA 7 - Ka Baibala Hemolele

1 No nā lā e hoʻokē ʻai ai, a me ka hoʻokē ʻai ʻana me ka manaʻo ʻole i ke Akua. 8 Ua aʻo ʻia nā Iudaio, mai hoʻolike me ko lākou poʻe mākua i ka hana ʻana.

MOKUNA VII.

¹ ¶ A i ka hā o ka makahiki o ke aliʻi o Dariu, hiki maila ka ʻōlelo a Iēhova iā Zekaria, i ka pō ʻahā o ka iwa o ka malama ʻo Kiseleu.

² I ka wā i hoʻouna mai ai lākou iā Serezera lāua ʻo Regemeleka, a me nā kānaka o lāua i ka hale o ke Akua, e pule i mua o Iēhova.

³ A e nīnau aku i nā kāhuna o ka hale o Iēhova o nā kaua, a i nā kāula, penei, “E kanikau anei au i ka lima o ka malama e hoʻokē ʻai ana, me kaʻu i hana ai i kēia mau makahiki he nui?”

⁴ A laila, hiki maila ka ʻōlelo a Iēhova o nā kaua iaʻu, i ka ʻī ʻana mai,

⁵ “E haʻi aku ʻoe i kēia mau mea i nā kānaka a pau o ka ʻāina, a i nā kāhuna hoʻi, penei, ‘Iā ʻoukou i hoʻokē ʻai ai a i kanikau ai i ka lima a me ka hiku o ka malama, a pau kēlā mau makahiki he kanahiku, i hoʻokē ʻai iki anei ʻoukou noʻu?

⁶ ‘A iā ʻoukou i ʻai ai, a i inu ai hoʻi, ʻaʻole anei ʻoukou i ʻai no ʻoukou iho? A i ko ʻoukou inu ʻana, ʻaʻole anei ʻoukou i inu no ʻoukou iho?

⁷ ‘ʻAʻole anei kēia nā ʻōlelo a Iēhova i hea mai ai ma nā kāula mua, i ka wā i noho ʻia ai ʻo Ierusalema me ka maluhia, a me nā kūlanakauhale ona e kokoke ana, i ka wā i noho ai nā kānaka ma ka ʻAoʻao Hema a ma ka pāpū?’”

⁸ ¶ A hiki maila ka ʻōlelo a Iēhova iā Zekaria, ʻī maila,

⁹ “Penei kā Iēhova o nā kaua e ʻōlelo mai nei, ‘E hoʻopono ʻoukou, a e hoʻomaopopo kēlā kanaka kēia kanaka i ka lokomaikaʻi a me ke aloha i kona hoahānau.

¹⁰ ‘Mai hana ʻino i ka wahine kāne make, ʻaʻole hoʻi i ke keiki makua ʻole, ʻaʻole i ka malihini, ʻaʻole hoʻi i ka ʻilihune, ʻaʻole hoʻi e manaʻo ʻino aku ka naʻau o kekahi i kona hoahānau.’

¹¹ “Akā, hōʻole lākou i ka hoʻolohe, a hāʻawi i ka poʻohiwi kipi, a papani aʻela i nā pepeiao o lākou, i lohe ʻole ai lākou.

¹² “A hoʻopaʻakikī ihola i kā lākou mau naʻau pōhaku ʻadama, o lohe auaneʻi lākou i ke kānāwai, a me nā ʻōlelo a Iēhova o nā kaua i hoʻouna mai ma kona ʻUhane, ma nā kāula mua; no laila, kau maila ka inaina nui o Iēhova o nā kaua.

¹³ “No ia mea, me kā lākou i hoʻolohe ʻole ai ia e kāhea aku ana, pēlā hoʻi lākou i kāhea mai ai, ʻaʻole hoʻi au i hoʻolohe aku,” wahi a Iēhova o nā kaua.

¹⁴ “Akā, hoʻopuehu akula au iā lākou i waena o nā lāhui kanaka a pau a lākou i ʻike ʻole ai; a ua neoneo ka ʻāina ma hope o lākou, i hiki ʻole ai i kekahi e hele i laila, ʻaʻole hoʻi e hoʻi aʻe; no ka mea, ua hoʻoneoneo ʻia ka ʻāina maikaʻi.”