ZEKARIA 6 - Ka Baibala Hemolele

1 He hihiʻo no nā hale kaʻa ʻehā. 9 Nā pāpale aliʻi i kau ʻia ma luna o ke poʻo o Iosua.

MOKUNA VI.

¹ ¶ Nānā hou aʻela au i luna, ʻike akula, aia hoʻi, puka maila nā hale kaʻa ʻehā mai waena mai o nā mauna ʻelua, a he mau mauna keleawe melemele lāua.

² Ma ka hale kaʻa mua he mau lio ʻulaʻula; ma ka lua o ka hale kaʻa he mau lio ʻeleʻele;

³ i ke kolu o ka hale kaʻa, he mau lio keʻokeʻo, a i ka hā o ka hale kaʻa he mau lio kaliko a he mākuʻe.

⁴ A laila, nīnau akula au, ʻī akula i ka ʻānela i kamaʻilio me aʻu, “E ka haku, he aha kēia mau mea?”

⁵ ʻŌlelo maila ka ʻānela, i maila iaʻu, “Eia nā ʻuhane ʻehā o ka lani, e hele aʻe ana mai kahi a lākou i kū aku ai i mua o ka Haku o ka honua a pau.

⁶ “A hele aku nō ko laila mau lio ʻeleʻele i ka ʻāina kūkulu ʻākau; a hele aku nā mea keʻokeʻo ma muli o lāua; a hele aku hoʻi nā mea kaliko ma ka ʻāina kūkulu hema.

⁷ “Akā, hele ihola nā mea mākuʻe e ʻimi e holoholo ma luna o ka honua”; ʻī akula kēlā iā lākou, “Ō uhaele, e holoholo aʻe ʻoukou mai ʻō a ʻō, ma ka honua.” A holoholo aʻela lākou mai ʻō a ʻō, ma ka honua.

⁸ A laila kāhea maila kēlā iaʻu, ʻī maila iaʻu, “Aia hoʻi, ʻo ka poʻe i hele ma ka ʻāina kūkulu ʻākau, ua hoʻomālielie lākou i kuʻu inaina ma ka ʻāina kūkulu ʻākau.”

⁹ ¶ Hiki hou maila ka ʻōlelo a Iēhova iaʻu, ʻī maila,

¹⁰ “E kono ʻoe i kekahi poʻe i lawe pio, i ko Heledai, i ko Tobiia, a i ko Iedaia, i ko ka poʻe i hoʻi mai, mai Babulona mai, a hele ʻoe a e komo ia lā i loko o ka hale o Iosia, ʻo ke keiki a Zepania.

¹¹ “E lawe hoʻi ʻoe i ke kālā a me ke gula, a e hana i nā pāpale aliʻi, a e kau ia mau mea ma luna o ke poʻo o Iosua, ʻo ke keiki a Iosedeka ke kahuna nui;

¹² “Penei hoʻi e ʻōlelo aku ai iā ia, ‘Ke ʻōlelo mai nei ʻo Iēhova o nā kaua, penei, “Aia hoʻi ke kanaka ua kapa ʻia kona inoa, ʻo ka Lālā; e kupu auaneʻi ʻo ia mai loko aʻe o kona wahi, nāna nō e hana ka luakini o Iēhova.

¹³ “Nāna nō e hana ka luakini o Iēhova; a nāna hoʻi e lawe ka hanohano, a e aliʻi mai nō ʻo ia e noho ana ma luna o kona noho aliʻi; a e kahuna nō auaneʻi ʻo ia ma luna o kona noho aliʻi; a ma waena o lāua auaneʻi ka mea e malu ai.”’

¹⁴ “A e lilo nā pāpale aliʻi no Helema, no Tobiia, no Iedaia, a no Hena ke keiki a Zepania, i mea hoʻomanaʻo ai i loko o ka luakini o Iēhova.

¹⁵ “A e hele mai auaneʻi ka poʻe mamao, a e hana lākou i ka luakini o Iēhova. “A e ʻike auaneʻi ʻoukou, ua hoʻouna mai ʻo Iēhova o nā kaua iaʻu i o ʻoukou lā; a e kō auaneʻi kēia, ke hoʻolohe pono ʻoukou i ka leo o Iēhova ko ʻoukou Akua.