ZEKARIA 5 - Ka Baibala Hemolele

1 Nā hihiʻo, no ka ʻōwili pepa e lele ana, 5 no ka ʻepa, a me ka wahine.

MOKUNA V.

¹ ¶ ʻAlawa hou aʻela koʻu mau maka i luna, ʻike akula au, aia hoʻi, he ʻōwili pepa e lele ana.

² ʻĪ maila kēlā iaʻu, “He aha kāu mea ʻike?” ʻĪ akula au, “Ke ʻike aku nei au i ka ʻōwili pepa e lele ana; he iwakālua haʻilima ka loa, a he ʻumi haʻilima ka laulā.”

³ ʻŌlelo maila kēlā iaʻu, “Eia ka hoʻāhewa ʻana e hele aku ma luna o ka ʻili a pau o ka honua. No ka mea, ʻo kēlā mea kēia mea ʻaihue, e hōʻoki ʻia auaneʻi ʻo ia ma kēia ʻaoʻao, e like me kā kēia; a ʻo kēlā mea kēia mea e hoʻohiki wahaheʻe ana, e hōʻoki ʻia aʻe ʻo ia ma kēlā ʻaoʻao, e like me kā kēlā.

⁴ “Ua lawe mai nei au ia,” wahi a Iēhova o nā kaua, “a e komo aku ia i loko o ka hale o ka ʻaihue, a ʻo ka hale o ka mea e hoʻohiki wahaheʻe ana ma koʻu inoa; e noho ia i loko o kona hale, a e hoʻopau ʻo ia ia mea me ka lāʻau a me ka pōhaku ona.”

⁵ ¶ A laila, hele akula ka ʻānela i kamaʻilio pū me aʻu, a ʻī maila iaʻu, “E nānā aʻe ʻoe i luna, a e ʻike i kēlā mea e hele aku ana.”

⁶ ʻĪ akula au, “He aha ia mea?” ʻĪ maila kēlā, “He ʻepa ia mea e hele aku ana.” ʻĪ maila hoʻi ʻo ia, “Eia ko lākou helehelena ma ka honua a pau.

⁷ “Aia hoʻi, ua kaʻikaʻi ʻia aʻe he pōpō kēpau; a ʻo ka mea e noho ana i waenakonu o ka ʻepa, he wahine ia.”

⁸ ʻĪ maila kēlā, “ʻO kēia ka ʻAiā!” A hoʻolei akula ʻo ia ia mea ma waenakonu o ka ʻepa; a hoʻolei ihola ia i ka pōhaku kēpau ma luna iho o kona waha.

⁹ A laila, nānā aʻela au i luna, ʻike akula, aia hoʻi, puka maila nā wāhine ʻelua i waho, a i loko o ko lāua mau ʻēheu ka makani; no ka mea, he mau ʻēheu iā lāua e like me nā ʻēheu o ka setoreka; a kaʻikaʻi aʻela lākou i ka ʻepa i luna i waena o ka honua a me ka lani.

¹⁰ Nīnau akula au i ka ʻānela i kamaʻilio me aʻu, “Ma hea lā lāua nei e lawe aku ai i ka ʻepa?”

¹¹ ʻĪ maila kēlā iaʻu, “No ka hana i hale nona ma ka ʻāina i Sinara; i laila ia e hoʻonoho ʻia ai, a e kau ia ma luna o kona kumu.”