ZEKARIA 3 - Ka Baibala Hemolele

1 No Iosua ke kahuna nui i mua o ka ʻānela. 8 He wānana no ka Lālā a me ka pōhaku.

MOKUNA III.

¹ ¶ A hōʻike maila ʻo ia iaʻu iā Iosua ke kahuna nui e kū ana i mua o ka ʻānela o Iēhova, a kū maila ʻo Sātana ma kona lima ʻākau, e kūʻē iā ia.

² ʻĪ akula ʻo Iēhova iā Sātana, “Na Iēhova ʻoe e pāpā aku, e Sātana; na Iēhova nāna i koho ʻo Ierusalema, e pāpā aku iā ʻoe; ʻaʻole anei kēia he momoku ahi i unuhi ʻia aʻe mai loko mai o ke ahi?”

³ A ua ʻaʻahu ʻia ʻo Iosua i nā kapa ʻinoʻino, iā ia i kū ai i mua o ka ʻānela.

⁴ ʻŌlelo maila kēlā, ʻī maila i ka poʻe e kū ana i mua ona, penei, “E lawe aku i nā kapa ʻinoʻino mai ona aku lā.” ʻĪ maila hoʻi ʻo ia iā ia, “Aia hoʻi, ke lawe aku nei au i kou hewa mai ou aku lā, a e hōʻaʻahu aku au iā ʻoe i nā ʻaʻahu nani.”

⁵ A laila ʻī akula au, “E kau aku lākou i pāpale kahuna maikaʻi ma luna o kona poʻo.” No laila, kau akula lākou i ka pāpale kahuna maikaʻi ma luna o kona poʻo, a hōʻaʻahu akula iā ia i nā ʻaʻahu; a kū maila ka ʻānela o Iēhova.

⁶ ¶ A laila, aʻo maila ka ʻānela o Iēhova iā Iosua, i ka ʻī ʻana,

⁷ “Penei kā Iēhova o nā kaua i ʻōlelo mai ai, ‘Inā e hele ʻoe ma kuʻu mau ʻaoʻao, a e mālama hoʻi i kaʻu mau kauoha iā ʻoe, a laila ʻoe e aliʻi ai ma luna o koʻu hale, a e mālama hoʻi i nā pā hale oʻu, a e hāʻawi hoʻi au nou i nā wahi e hele ai i waena o ka poʻe e kū nei.

⁸ ‘ʻĀnō hoʻi, e hoʻolohe mai ʻoe, e Iosua ke kahuna nui ē, ʻo ʻoe a me nā hoaaloha e noho ana i mua ou; no ka mea, he poʻe kānaka mea hōʻailona lākou; no ka mea, aia hoʻi, e kaʻi mai auaneʻi au i kuʻu kauā ʻo ka Lālā.

⁹ ‘Aia hoʻi ka pōhaku aʻu i waiho ai i mua o Iosua; a he ʻahiku nā maka ma ua pōhaku hoʻokahi lā; a naʻu nō e kālai iho i kāna kālai ʻia ʻana,’ wahi a Iēhova o nā kaua, ‘a e lawe aku au i ka hala o ia ʻāina i ka lā hoʻokahi.

¹⁰ ‘Ia lā lā, e kāhea aku kēlā kanaka kēia kanaka i kona hoalauna, ma lalo o ke kumu waina, a ma lalo o ka lāʻau fiku,’” wahi a Iēhova o nā kaua.