ZEKARIA 14 - Ka Baibala Hemolele

1 Ka lilo ʻana o Ierusalema i kona poʻe ʻenemi. 4 Ka huli ʻana o nā kānaka ʻē i ke Akua. 9 Kū hou ʻo Ierusalema, a piha i kānaka. 20 E laʻa nā mea a pau no Iēhova.

MOKUNA XIV.

¹ ¶ Aia hoʻi, e hele mai ana ka lā o Iēhova, e puʻunaue ʻia ai kou waiwai pio ma waena ou.

² E hōʻuluʻulu auaneʻi au i nā lāhui kanaka a pau e kūʻē iā Ierusalema i ke kaua; a e hoʻopio ʻia auaneʻi ke kūlanakauhale, e hao ʻia nā hale, a e moe wale ʻia nā wāhine; a e hele pio aku kekahi hapalua a ko ke kūlanakauhale; akā, ʻaʻole e hōʻoki ʻia aʻe ke koena o kānaka mai ke kūlanakauhale aku.

³ A laila hoʻi, e hele aku ai ʻo Iēhova, a e kaua aku i kēlā mau lāhui kanaka, e like me kāna i kaua aku ai i ka lā hoʻouka kaua.

⁴ A e kū kona mau wāwae ia lā ma luna o ka Mauna ʻOliveta, e kū ana i ke alo o Ierusalema ma ka hikina; a e nahā iho ka Mauna ʻOliveta, ma waenakonu ona, mai ka hikina a ke komohana, he awāwa nui loa; a e neʻe aku kekahi hapalua o ka mauna ma ke kūkulu ʻākau, a ʻo kekahi ma ke kūkulu hema.

⁵ A e holo aku ʻoukou i ke awāwa o nā mauna oʻu; no ka mea, e hiki aku ana ke awāwa o nā mauna i ʻAzala; a e holo ʻoukou e like me ko ʻoukou holo ʻana i ke ōlaʻi, i nā lā o ʻUzia, ʻo ke aliʻi o kā Iuda; a e hele mai ana ʻo Iēhova ʻo koʻu Akua, a me nā haipule a pau me ia.

⁶ Eia hoʻi kekahi ia lā, ʻaʻole nō he mālamalama, nalowale nā hōkū nani.

⁷ Hoʻokahi nō ia lā, e ʻikea auaneʻi ia e Iēhova, ʻaʻohe ao, ʻaʻohe pō; a i ka wā ahiahi e mālamalama auaneʻi ia.

⁸ E hiki nō ia lā, e kahe aku ka wai ola mai Ierusalema aku, ʻo kekahi hapa ma ke kai hikina, a ʻo kēlā hapa ma ke kai komohana; a pēlā nō ia i ke kau a me ka hoʻoilo.

⁹ ¶ A e lilo auaneʻi ʻo Iēhova i Aliʻi ma luna o ka honua a pau; ia lā hoʻi e hoʻokahi auaneʻi ʻo Iēhova, hoʻokahi hoʻi kona inoa.

¹⁰ E hoʻololi ʻia ka ʻāina a pau a like me ka pāpū mai o Geba aku a hiki i Rimona ma ke kūkulu hema o Ierusalema; e hoʻokiʻekiʻe ʻia aʻe ia, a e hoʻonoho paʻa ia ma kona wahi, mai ka ʻĪpuka o Beniamina a hiki i kahi o ka Puka Mua, a i ka Puka Kihi; a mai ka Hale Kiaʻi o Hananela a hiki i nā lua waina o ke aliʻi.

¹¹ A e noho lākou i loko ona, ʻaʻole hoʻi e luku hou ʻia ʻo ia; akā, e noho ʻia ʻo Ierusalema me ka maluhia.

¹² ¶ Eia hoʻi ka maʻi a Iēhova e hahau mai ai, i nā kānaka a pau i kaua aku ai iā Ierusalema; e hoʻowīwī auaneʻi ʻo ia i ko lākou kino, iā lākou e kū ana ma luna o ko lākou wāwae, a e emi iho ko lākou mau maka ma loko o ko lākou mau lua, a e pau iho ko lākou alelo ma loko o ko lākou waha.

¹³ E hiki hoʻi ia lā he haunaele nui no Iēhova mai, i waena o lākou; a e lālau aku kekahi i ka lima o kona hoa, a e kūʻē kona lima i luna i ka lima o kona hoa.

¹⁴ A e kaua aku hoʻi kā Iuda iā Ierusalema; akā, e hōʻuluʻulu ʻia ka waiwai o ko nā ʻāina ʻē a puni, ʻo ke gula, ke kālā, a me nā lole ʻaʻahu he nui loa.

¹⁵ A pēlā hoʻi ka maʻi ʻana o nā lio, ʻo nā hoki, ʻo nā kāmelo, ʻo nā miula, a ʻo nā holoholona a pau, i loko o kahi a lākou e hoʻomoana ai, e like me kēlā maʻi.

¹⁶ ¶ Eia hoʻi kēia, ʻo nā mea a pau e koe, ʻo nā lāhui kanaka a pau i hele kūʻē mai iā Ierusalema, e piʻi aʻe lākou i kēlā makahiki i kēia makahiki, e hoʻomana i ke Aliʻi iā Iēhova o nā kaua, a e mālama i ka ʻAhaʻaina Kauhalelewa.

¹⁷ A ʻo ka mea piʻi ʻole i Ierusalema, ʻo nā lāhui kanaka o ka honua e hoʻomana i ke Aliʻi iā Iēhova o nā kaua, ma luna ona e hāʻule ʻole ai ka ua.

¹⁸ Inā paha hoʻi e piʻi ʻole mai, ʻaʻole hoʻi e hele mai ko ʻAigupita, kahi e ʻole ai ka ua, i laila nō e loʻohia ai ka maʻi a Iēhova e kau mai ai ma luna o nā lāhui kanaka, i piʻi ʻole e mālama i ka ʻAhaʻaina Kauhalelewa.

¹⁹ ʻO ia ka hoʻohewa ʻia o ko ʻAigupita, a me ka hoʻohewa ʻia o nā lāhui kanaka a pau, i piʻi ʻole aku e mālama i ka ʻAhaʻaina Kauhalelewa.

²⁰ Ia lā nō, e kākau ʻia ai ma luna o nā kāhiko ʻana o nā lio, “UA LAʻA NO IĒHOVA”; a e like auaneʻi nā ipu i loko o ka hale o Iēhova me nā kīʻaha i mua o ke kuahu.

²¹ A e lilo nā ipu a pau i loko o Ierusalema a i loko o kā Iuda, i laʻa no Iēhova o nā kaua; a e hele mai ka poʻe mōhai a pau, a e lawe i kēia mau mea, a e hoʻolapalapa i loko; ia lā hoʻi, ʻaʻole e komo hou aku ko Kanaʻana, i loko o ka hale o Iēhova o nā kaua.