ZEKARIA 13 - Ka Baibala Hemolele

1 Ka pūnāwai holoi iā Ierusalema. 2 Ka pau ʻana o ka hoʻomana kiʻi. 7 Ka ʻeha ʻana o ke Kahu Hipa a me ka puehu o nā hipa.

MOKUNA XIII.

¹ ¶ “Ia lā hoʻi, e hoʻohuaʻi ʻia auaneʻi he pūnāwai no ka ʻohana a Dāvida, a no nā kānaka o Ierusalema, no ka hewa a me ka haumia.

² ¶ “Eia hoʻi kekahi ia lā,” wahi a Iēhova o nā kaua, “e ʻānai aku au i nā inoa o nā kiʻi mai ka ʻāina aku, i hoʻomanaʻo hou ʻole ʻiā lākou; a e hoʻokuke aku hoʻi au i nā kāula a me ka ʻuhane haukaʻe mai ka ʻāina aku.

³ “A e hiki auaneʻi, inā e wānana kekahi kanaka, a laila e ʻī aku ai kona makua kāne a me kona makuahine nāna ia i hānau, ‘ʻAʻole ʻoe e ola; no ka mea, he ʻōlelo hoʻopunipuni kāu ma ka inoa ʻo Iēhova’; a ʻo kona makua kāne a me kona makuahine nāna ia i hānau, e hou iho lāua iā ia, i kāna wānana ʻana.

⁴ “Eia hoʻi kekahi ia lā, e hilahila nō kēlā kāula kēia kāula, i kona hihiʻo, iā ia i wānana mai ai; ʻaʻole hoʻi ia e hōʻaʻahu aʻe i ka ʻaʻahu hulu i mea e hoʻopunipuni ai;

⁵ akā, e ʻōlelo auaneʻi ʻo ia, ‘ʻAʻole au he kāula; akā, he kanaka mahi ʻai au; no ka mea, na ke kanaka au i kūʻai ai mai kuʻu wā kamaliʻi mai.’

⁶ “A e ʻōlelo aku kekahi iā ia, ‘ʻO ke aha kēia mau wahi ʻeha ma kou mau lima?’ e ʻī mai kēlā, ‘ʻO ia kahi aʻu i hōʻeha ʻia ai, i loko o ka hale o ka poʻe i aloha mai iaʻu.’

⁷ ¶ “E ka pahi kaua, e ala kūʻē ʻoe i kuʻu Kahu Hipa, I ke kanaka Hoa oʻu,” wahi a Iēhova o nā kaua. “E hahau i ke Kahu Hipa, a e hoʻoʻauheʻe ʻia nā hipa; E hoʻohuli aku au i kuʻu lima ma luna o ka poʻe liʻiliʻi.

⁸ “A i loko o ka ʻāina a pau,” wahi a Iēhova, “E hōʻoki ʻia ai nā hapakolu ʻelua o ka poʻe i loko, a make; Akā, e hoʻokoe ʻia kekahi hapa i laila.

⁹ “A e alakaʻi au i kekahi hapakolu i waena o ke ahi, A e hoʻoheheʻe au iā lākou e like me ka hoʻoheheʻe ʻia ʻana o ke kālā, E hoʻāʻo hoʻi au iā lākou e like me ka hoʻāʻo ʻana i ke gula; E kāhea mai ia poʻe i kuʻu inoa, a e hoʻolohe au iā lākou; E ʻōlelo auaneʻi au, ‘ʻO koʻu poʻe kānaka kēia’; A e ʻōlelo hoʻi lākou, ‘ʻO Iēhova koʻu Akua.’”