ZEKARIA 12 - Ka Baibala Hemolele

1 Lilo ʻo Ierusalema i mea e pōʻino ai ka poʻe kūʻē iā ia. 10 No ka ninini ʻana mai i ka ʻUhane ma luna o ka poʻe Iudaio.

MOKUNA XII.

¹ ¶ Ka wānana o ka ʻōlelo a Iēhova no kā ʻIseraʻela, wahi a Iēhova, ka Mea nāna e hohola aʻe i nā lani, a me ka hoʻokumu iho i ka honua, a i hana hoʻi i ka ʻuhane o ke kanaka ma loko ona,

² “Aia hoʻi, e hoʻolilo nō au iā Ierusalema i kīʻaha hoʻīnu a ʻona i nā kānaka a pau e puni ana; pēlā nō i kā Iuda, i ka hoʻopilikia ʻana iā Ierusalema.

³ “Ia lā hoʻi, e hoʻolilo au iā Ierusalema i pōhaku kaumaha no nā kānaka a pau; a ʻo ka poʻe a pau i kaʻikaʻi ia mea, e haehae ʻia lākou; a e hoʻākoakoa ʻia auaneʻi nā lāhui kanaka a pau o ka honua e kūʻē ia wahi.

⁴ “Ia lā hoʻi,” wahi a Iēhova, “e hahau auaneʻi au i nā lio a pau i ka makaʻu, a me ka mea e noho ana ma luna i ka hehena; a e hoʻokaʻakaʻa au i kuʻu mau maka e nānā i ka ʻohana a Iuda; akā, e hoʻomakapō auaneʻi au i nā lio a pau o kānaka.

⁵ “A e ʻōlelo nā luna o kā Iuda i loko o ko lākou naʻau, ‘ʻO nā kānaka o Ierusalema kuʻu ikaika, i loko o Iēhova Sābāōta ʻo ko lākou Akua.’

⁶ “Ia lā lā, e hoʻolilo au i nā luna o kā Iuda e like me ke kapuahi i waena o ka wahie, a e like hoʻi me ka lama ahi i loko o ka pūʻā pili; a e hoʻopau auaneʻi lākou i nā kānaka a pau e puni ana ma ka ʻākau a ma ka hema; a e hoʻonoho hou ʻia ʻo Ierusalema ma kona wahi, ma Ierusalema.

⁷ “E hoʻōla hoʻi ʻo Iēhova i nā halelewa o Iuda ma mua, o hoʻokiʻekiʻe auaneʻi ka nani o ka ʻohana a Dāvida a me ka nani o nā kānaka o Ierusalema ma luna o kā Iuda.

⁸ “Ia lā hoʻi, e hoʻomalu iho ʻo Iēhova i nā kānaka o Ierusalema; a ʻo ka mea nāwaliwali i waena o lākou ia lā, e like ia me Dāvida; a e like hoʻi ka ʻohana a Dāvida me kā ke Akua, a me ka ʻānela o Iēhova i mua o lākou.

⁹ Eia hoʻi kekahi ia lā, e ʻimi auaneʻi au e hoʻopau ai i nā lāhui kanaka a pau, e hele kūʻē mai ana iā Ierusalema.

¹⁰ ¶ “A e ninini iho au ma luna o ka ʻohana a Dāvida, a ma luna o nā kānaka o Ierusalema, i ka ʻUhane o ke aloha a me ka pule; a e nānā mai lākou iaʻu i ka mea a lākou i hou mai ai, a e kanikau lākou nona, e like me ke kanikau ʻana i ke keiki ponoʻī, a e ʻehaʻeha loa lākou nona, e like me ka ʻehaʻeha ʻana o kekahi i kāna keiki hānau kahi.

¹¹ “Ia lā hoʻi, e nui auaneʻi ke kanikau ʻana ma Ierusalema, e like me ke kanikau ʻana o Hadaderimona ma ka pāpū ʻo Megido.

¹² “E kanikau hoʻi ko ka ʻāina, ʻo kēlā ʻohana ʻo kēia ʻohana ma ke kaʻawale, ʻo ka ʻohana o ka hale o Dāvida ma ke kaʻawale, a ʻo kā lākou mau wāhine ma ke kaʻawale; ʻo ka ʻohana no ka hale o Natana ma ke kaʻawale, a me kā lākou mau wāhine ma ke kaʻawale;

¹³ ʻo ka ʻohana no ka hale o Levi ma ke kaʻawale, a me kā lākou mau wāhine ma ke kaʻawale, ʻo ka ʻohana no ka hale o Simei ma ke kaʻawale, a me kā lākou mau wāhine ma ke kaʻawale.

¹⁴ ʻO nā ʻohana a pau e koe, ma ke kaʻawale, kēlā ʻohana kēia ʻohana, a ʻo kā lākou mau wāhine ma ke kaʻawale.