ZEKARIA 11 - Ka Baibala Hemolele

1 Ka hoʻoneoneo ʻana iā Ierusalema, no ko lākou manaʻoʻiʻo ʻole ʻana iā Kristo. 8 Ka haʻalele ʻana o ke Akua i ka poʻe Iudaio. 15 Ka pōʻino ʻana o ke kahu hipa naʻaupō.

MOKUNA XI.

¹ ¶ E wehe aʻe i kou mau puka, e Lebanona, I ʻai aku ai ke ahi i kou mau kedera.

² E ʻaoa ʻoe, e ka lāʻau kaʻa; No ka mea, ua hina ihola ke kedera; No ka mea, ua hao ʻia ka poʻe hanohano; E ʻaoa ʻoukou, e nā ʻoka o Basana, No ka mea, ua kulaʻina iho ka ulu lāʻau ikaika.

³ He leo ʻaoa o nā kahu hipa, No ka mea, ua hoʻopau ʻia ko lākou mea hanohano; He leo o nā liona ʻōpiopio e uō ana; No ka mea, ua hoʻopau ʻia ka nani o Ioredane.

⁴ ¶ Penei i ʻōlelo mai ai ʻo Iēhova ʻo koʻu Akua, “E hānai i ka ʻohana hipa no ka make.

⁵ “ʻO nā kahu o lākou ke pepehi nei iā lākou, a ke manaʻo nei iā lākou iho ua hala ʻole; ke ʻōlelo nei ka poʻe kūʻai lilo aku iā lākou, ‘E hoʻomaikaʻi ʻia ke Akua; no ka mea, ua waiwai au’; ʻaʻole hoʻi i minamina iho ko lākou poʻe kahu iā lākou.

⁶ “No ka mea, ʻaʻole au e minamina hou i ka poʻe kānaka o kēia ʻāina,” wahi a Iēhova; “aia hoʻi, e hoʻolilo auaneʻi au i kēlā kanaka i kēia kanaka i loko o ka lima o kona hoa, a i loko o ka lima o kona aliʻi; a e pepehi lākou i ko ka ʻāina, ʻaʻole hoʻi au e hoʻopakele aʻe mai loko aku o ko lākou lima.”

⁷ Ua hānai hoʻi au i ka ʻohana hipa no ka make, iā ʻoukou, e ka ʻohana pōʻino! A lawe aʻela au noʻu i ʻelua koʻokoʻo, a kapa akula au i kekahi o lāua, ʻo Nani, a i kekahi kapa akula au, ʻo Nāapo; a hānai akula au i ka ʻohana hipa.

⁸ ʻEkolu mau kahu hipa aʻu i hōʻoki iho ai i ka malama hoʻokahi; no ka mea, ua pauaho kuʻu naʻau iā lākou; a ua inaina mai hoʻi ko lākou naʻau iaʻu.

⁹ ʻĪ ihola hoʻi au, “ʻAʻole au e hānai iā ʻoukou; ʻo ka mea no ka make, e make nō ia, a ʻo ka mea no ka hōʻoki ʻia, e hōʻoki ʻia nō ʻo ia; a ʻo ka poʻe e koe, e ʻai iho kēlā mea kēia mea o lākou i ka ʻiʻo o kona hoa.”

¹⁰ A laila, lālau akula au i kuʻu koʻokoʻo iā Nani, a haʻihaʻi ihola iā ia, no ka haʻihaʻi ʻana i ka berita aʻu i hoʻopaʻa ai me nā kānaka a pau.

¹¹ A e uhaʻi ʻia auaneʻi ia i ua lā lā; a pēlā e ʻike ai ka ʻohana ʻilihune, ka poʻe i mālama mai iaʻu, ʻo ka ʻōlelo ia a Iēhova.

¹² ʻŌlelo akula au iā lākou, “Inā he maikaʻi ia i mua o ko ʻoukou maka, e hāʻawi mai i kaʻu uku; a i ʻole, uoki hoʻi.” No ia mea, kaupaona ihola lākou no kuʻu uku i kanakolu ʻāpana kālā.

¹³ ʻĪ maila ʻo Iēhova iaʻu, “E hoʻolei aku ia mea no ka potera; he kumu kūʻai nui kā kaʻu i kūʻai ʻia ai e lākou!” No laila, lālau akula au i ua mau ʻāpana kālā lā he kanakolu, a hoʻolei akula i ka potera i loko o ka hale o Iēhova.

¹⁴ A laila, uhaʻi ihola au i kēlā koʻokoʻo oʻu, iā Nāapo, no ka uhaʻi ʻana i ka launa hoahānau i waena o kā Iuda a ʻo kā ʻIseraʻela.

¹⁵ ¶ ʻŌlelo maila hoʻi ʻo Iēhova iaʻu, “E lawe ʻoe nāu i nā mea hōʻailona o ke kahu hipa naʻaupō.

¹⁶ “No ka mea, eia hoʻi au e hoʻokū aʻe auaneʻi i kahu hipa ma ka ʻāina, ʻaʻole ia e manaʻo i ka poʻe e make wale ana, ʻaʻole ia e ʻimi i ka mea i ʻauana, ʻaʻole hoʻi e lapaʻau i ka mea i haki, ʻaʻole hoʻi e hānai i ka mea māloʻeloʻe; akā, e ʻai iho ʻo ia i ka ʻiʻo o nā mea momona, a e haehae aʻe ia i ko lākou mau māiʻuʻu.

¹⁷ “Auē ke kahu hipa lapuwale! Ka mea haʻalele i ka ʻohana! E kū kona lima A me kona maka ʻākau i ka pahi kaua; E maloʻo auaneʻi kona lima, A e pouli hoʻi kona maka ʻākau.”