ʻO KA ʻEPISETOLE A PAULO KA LUNAʻŌLELO I KO ROMA 9 - Ka Baibala Hemolele

1 No ko ke Akua pono i ke koho mai i poʻe kānaka no kona lokomaikaʻi; a ʻo ia kāna i hana mau ai.

MOKUNA IX.

¹ ¶ Ke ʻōlelo aku nei au i ka ʻoiaʻiʻo ma Kristo, ʻaʻole oʻu hoʻopunipuni, a ʻo kuʻu lunamanaʻo kekahi e hōʻike nei iaʻu, ma ka ʻUhane Hemolele;

² he kaumaha nui koʻu a me ka ʻehaʻeha mau ma kuʻu naʻau.

³ No ka mea, he pono i kuʻu manaʻo e ʻoki ʻia mai au, mai o Kristo mai, no kuʻu poʻe hoahānau, nā hanauna oʻu ma ke kino.

⁴ He poʻe ʻIseraʻela lākou, iā lākou ka hoʻokama ʻia, a me ka nani, a me nā berita, a me ka hāʻawi ʻana mai i ke kānāwai, a me ka hoʻomana, a me nā ʻōlelo pōmaikaʻi;

⁵ no lākou hoʻi ka poʻe kūpuna, a na lākou mai hoʻi ʻo Kristo ma ke kino, ʻo ia nō ma luna o nā mea a pau, ke Akua hoʻomaikaʻi mau loa ʻia. ʻĀmene.

⁶ ¶ ʻAʻole naʻe i hāʻule wale ka ʻōlelo a ke Akua. No ka mea, ʻaʻole ka poʻe ʻIseraʻela lākou a pau na ʻIseraʻela mai;

⁷ ʻaʻole hoʻi he poʻe keiki lākou a pau ka poʻe mamo na ʻAberahama mai; akā, “«Ma loko o ʻIsaʻaka e koho ʻia ai kāu poʻe mamo».”

⁸ ʻO ia hoʻi ʻo nā keiki ma ke kino, ʻaʻole lākou ka poʻe keiki na ke Akua; akā, ʻo nā keiki a ka ʻōlelo hoʻopōmaikaʻi e helu ʻia nā mamo.

⁹ No ka mea, penei ka ʻōlelo hoʻopōmaikaʻi, “«I kēia wā e hoʻi mai ana au, a e loaʻa iā Sara he keiki kāne».”

¹⁰ ʻAʻole hoʻi kēia wale nō; akā, ʻo Rebeka kekahi, hāpai aʻela ia na kekahi, na ʻIsaʻaka ko kākou kupuna kāne;

¹¹ no ka mea, (ʻaʻole lāua i hānau, ʻaʻole hoʻi i hana i ka mea maikaʻi, ʻaʻole hoʻi i ka hewa, i kūpaʻa ai ka manaʻo o ke Akua, ma ka wae ʻana, ʻaʻole no ka hana; akā, no ka Mea nāna i koho mai,)

¹² Ua haʻi ʻia mai kēia iā ia, “«E hoʻokauā aku ke kaikuaʻana na ke kaikaina».”

¹³ Me ka mea i palapala ʻia mai, “«ʻO Iakoba kaʻu i aloha ai, a ʻo ʻEsau hoʻi kaʻu i hoʻowahāwahā ai».”

¹⁴ ¶ He aha hoʻi kā kākou e ʻōlelo nei? He hewa anei ko ke Akua? ʻAʻole loa!

¹⁵ No ka mea, ua ʻōlelo maila ʻo ia iā Mose, “«E aloha ana au i kaʻu mea e aloha aku ai, a e menemene ana au i kaʻu mea e menemene aku ai».”

¹⁶ No ia hoʻi, ʻaʻole na ka mea e makemake ana, ʻaʻole hoʻi na ka mea e holo ana; akā, na ke Akua nō, nāna i aloha mai.

¹⁷ No ka mea, ʻōlelo maila ka Palapala Hemolele iā Paraʻo, “«No kēia wahi mea ua hoʻāla mai au iā ʻoe, i hōʻike aku au i koʻu mana ma ou lā, a i kaulana ai koʻu inoa ma ka honua a pau».”

¹⁸ No laila hoʻi, ua aloha mai ai ʻo ia i kāna mea i manaʻo ai, a ua hoʻopaʻakikī hoʻi ʻo ia i kāna mea i manaʻo ai.

¹⁹ ¶ A e nīnau mai nō hoʻi ʻoe iaʻu, “No ke aha lā ia i hoʻohewa mai ai? Na wai lā hoʻi kona makemake i pale aku?”

²⁰ Kāhāhā, “E ke kanaka, ʻo wai lā hoʻi ʻoe ke pākīkē aku i ke Akua? E pono anei i ka mea i hana ʻia, ke ʻōlelo aku i ka mea nāna i hana, No ke aha lā ʻoe i hana mai ai iaʻu pēlā?”

²¹ ʻAʻole anei e hiki i ka potera ke hana iho no loko o ka pōpō lepo hoʻokahi i kekahi ipu no ka mahalo ʻia, a i kekahi no ka mahalo ʻole ʻia?

²² He aha hoʻi, inā, e manaʻo ana ke Akua, e hoʻomaopopo i kona huhū, a e hōʻike hoʻi i kona mana, ua hoʻomanawanui mai ia me ke ahonui loa i nā ipu e huhū ʻia i hoʻomākaukau ʻia no ka luku?

²³ A e hōʻike mai hoʻi i ka nui o kona lokomaikaʻi mai i nā ipu e aloha ʻia āna i hoʻomākaukau mua ai no ka nani,

²⁴ iā kākou hoʻi ka poʻe āna i koho mai ai, ʻaʻole ma waena o ka poʻe Iudaio wale nō, ma waena o nā kānaka ʻē kekahi.

²⁵ E like me kāna i ʻōlelo mai ai ma Hosea, “«E kapa ana au i ka poʻe kānaka ʻaʻole noʻu, ‘i poʻe kānaka noʻu,’ A me ka mea i aloha ʻole ʻia, ‘i mea aloha.’”

²⁶ “A ma kahi i ʻōlelo ʻia ai iā lākou, ‘ʻAʻole ʻo koʻu poʻe kānaka ʻoukou;’ Ma laila e kapa ʻia ai lākou he poʻe keiki lākou a ke Akua ola».”

²⁷ Ua ʻōlelo mai hoʻi ʻo ʻIsaia no kā ʻIseraʻela, “«Inā he lehulehu nā mamo a ʻIseraʻela», e like me ke one o ke kai, he hapa ka poʻe e hoʻōla ʻia.

²⁸ “No ka mea, e hoʻokō ana ʻo ia i kāna ʻōlelo, a ua paʻa ia ma ka pono; no ka mea, e hana ana ka Haku ma ka honua i kāna mea i haʻi maopopo ai».”

²⁹ E like hoʻi me kā ʻIsaia i ʻōlelo mua mai ai, “«Inā i waiho ʻole mai Iēhova Sābāōta i koena no kākou, Inā, ua like pū kākou me Sodoma, a ua hoʻohālike ʻia hoʻi me Gomora».”

³⁰ ¶ He aha kā kākou e ʻōlelo nei no ia? ʻO ko nā ʻāina ʻē, ka poʻe i ʻimi ʻole i ka hoʻāpono ʻia, ua loaʻa iā lākou ka hoʻāpono ʻia, ʻo ka hoʻāpono ʻia ma ka manaʻoʻiʻo.

³¹ Akā, ʻo kā ʻIseraʻela, ka poʻe i ʻimi i ke kānāwai e hoʻāpono ʻia ai, ʻaʻole loaʻa iā lākou ke kānāwai e hoʻāpono ʻia ai.

³² No ke aha? No ka mea, ʻaʻole ʻimi ma ka manaʻoʻiʻo; akā, ma nā hana ʻana o ke kānāwai; no ka mea, ua kū ʻia lākou i kēlā pōhaku e kū ʻia ai;

³³ e like me ka mea i palapala ʻia, “«Eia hoʻi, ke waiho nei au ma Ziona i ka pōhaku e kū ʻia ai, A i ka pōhaku e hina ai; a ʻo ka mea i manaʻoʻiʻo iā ia, ʻaʻole ia e hoka».”