ʻO KA ʻEPISETOLE A PAULO KA LUNAʻŌLELO I KO ROMA 7 - Ka Baibala Hemolele

1 ʻO ka poʻe ma lalo o ke kānāwai ʻaʻole e hiki iā lākou ke hoʻokaʻawale ʻia aʻe i laila, mai ka hewa aku. 7 ʻAʻole naʻe he hewa ke Kānāwai, he pono nō a me ka hemolele.

MOKUNA VII.

¹ ¶ ʻAʻole anei i ʻike ʻoukou, e nā hoahānau, (no ka mea, ke ʻōlelo aku nei au i ka poʻe i ʻike i ke kānāwai,) e kau ana ke kānāwai ma luna o ke kanaka i kona wā a pau e ola nei?

² No ka mea, ʻo ka wahine mea kāne, ua paʻa ia i kāna kāne ma ke kānāwai, i kona wā a pau e ola ana kāna kāne; a make ke kāne, ua kuʻu ʻia ʻo ia mai ke kānāwai aku o kāna kāne.

³ No ia hoʻi, e kapa ʻia ʻo ia he wahine moekolohe ke mare ʻia i ke kāne hou i ka wā e ola ana kāna kāne; akā, inā i make ke kāne, ua kuʻu ʻia ʻo ia mai ke kānāwai aku; ʻaʻole ia he wahine moekolohe ke mare ʻia i ke kāne ʻē.

⁴ Pēlā hoʻi ʻoukou, e nā hoahānau oʻu, ua make ʻoukou i ke Kānāwai, ma ke kino o Kristo, i mare ʻia ai ʻoukou i ka mea i hoʻāla hou ʻia mai waena mai o ka poʻe make, i hoʻohua kākou i ka hua no ke Akua.

⁵ No ka mea, i ka wā i noho ai kākou ma ke kino, ʻo ko kākou mau kuko hewa no ke Kānāwai, ua hoʻoikaika ma loko o ko kākou mau lālā e hoʻohua mai i ka hua no ka make.

⁶ ʻĀnō hoʻi ua kuʻu ʻia kākou mai ke Kānāwai, ka mea i paʻa pio ai kākou; no ka mea, ua make kākou ia mea; i hoʻokauā hoʻi kākou me ka hou ʻana o ka ʻUhane, ʻaʻole ma ka mea kahiko o ke kānāwai.

⁷ ¶ He aha hoʻi kā kākou e ʻōlelo nei? He hewa anei ke Kānāwai? ʻAʻole loa; akā, ma ke Kānāwai wale nō i ʻike ai au i ka hewa; no ka mea, inā ʻaʻole i pāpā mai ke Kānāwai, “«Mai kuko wale aku ʻoe»,” inā ʻaʻole au i ʻike i ke kuko ʻana.

⁸ Akā, ma ke kauoha i loaʻa ai i ka hewa ka wā maopopo, hoʻāla aʻela ia i kēlā kuko wale i kēia kuko wale i loko oʻu. No ka mea, me ke Kānāwai ʻole, ua make ka hewa.

⁹ No ia hoʻi, ola nō au ma mua me ke Kānāwai ʻole, a hiki mai ke kauoha, ala aʻela ka hewa, a make ihola au.

¹⁰ ʻO ia, ʻo ke kauoha e ola ai, ua loaʻa iaʻu he mea ia e make ai.

¹¹ No ka mea, loaʻa aʻela i ka hewa ka wā maopopo ma ke kauoha, ua puni au iā ia, a ua make au iā ia ma ia mea.

¹² No laila, ua hemolele ke Kānāwai, a ua hemolele hoʻi, ua pono, ua maikaʻi ke kauoha.

¹³ Ua lilo anei ka mea maikaʻi i make noʻu? ʻAʻole loa ia; akā, ʻo ka hewa, i ʻike ʻia hoʻi ia he hewa ʻiʻo, e hana ana i ka make i loko oʻu ma ka mea maikaʻi, i akāka aʻela ma ke kauoha he mea lawehala loa ka hewa.

¹⁴ No ka mea, ua ʻike nō au ma ko ka ʻuhane ke Kānāwai; akā, ma ko ke kino wau, ua kūʻai ʻia na ka hewa.

¹⁵ No ka mea, ʻo ka mea aʻu i hana ai, ʻaʻole au e hoʻāpono; no ka mea, ʻaʻole ka mea aʻu i makemake ai kaʻu i hana ai; akā, hana nō wau i ka mea aʻu i hoʻowahāwahā ai.

¹⁶ Inā hoʻi e hana wau i ka mea aʻu i makemake ʻole ai, ua ʻae aku au i ke Kānāwai, he pono.

¹⁷ ʻĀnō hoʻi ʻaʻole naʻu ia i hana; akā, na ka hewa e noho ana i loko oʻu.

¹⁸ No ka mea, ua ʻike au, ʻaʻole e noho ana i loko oʻu, ʻo ia hoʻi i loko o koʻu kino, kekahi mea maikaʻi; no ka mea, ʻo ka makemake eia nō iaʻu ia; akā, ʻo ka hana i ka pono, ʻaʻole i loaʻa iaʻu.

¹⁹ No ka mea, ʻaʻole au i hana i ka pono aʻu i makemake ai; akā, ʻo ka hewa aʻu i hoʻowahāwahā ai, ʻo ia kaʻu i hana ai.

²⁰ A inā i hana au i ka mea aʻu i makemake ʻole ai, ʻaʻole naʻu ia i hana; akā, na ka hewa nō e noho ana i loko oʻu.

²¹ Ua loaʻa hoʻi iaʻu he kānāwai noʻu, i koʻu wā e makemake ai e hana pono, ua kokoke mai nō ka hewa.

²² No ka mea, ua ʻoluʻolu nō wau i ke kānāwai o ke Akua, ma ke kanaka o loko;

²³ akā, ua ʻike au i kekahi kānāwai i loko o koʻu mau lālā e hakakā ana me ke kānāwai o koʻu manaʻo, a e hoʻolilo ana iaʻu i pio no ke kānāwai o ka hewa i loko o koʻu mau lālā.

²⁴ Auē hoʻi au ke kanaka pōʻino! Na wai au e hoʻopakele aʻe i ke kino nona kēia make?

²⁵ Ke aloha aku nei au i ke Akua ma o Iesū Kristo lā ʻo ko kākou Haku. No ia hoʻi, ʻo wau nei lā, ua mālama wau i ke kānāwai o ke Akua; akā ma koʻu kino i ke kānāwai o ka hewa.