ʻO KA ʻEPISETOLE A PAULO KA LUNAʻŌLELO I KO ROMA 4 - Ka Baibala Hemolele

1 Ua aʻo maila ka Palapala no ʻAberahama, ua hoʻāpono ʻia ke kanaka ma ka manaʻoʻiʻo.

MOKUNA IV.

¹ ¶ A laila, he aha lā kā kākou mea e ʻōlelo ai, ua loaʻa iā ʻAberahama ko kākou makua ma ke kino?

² A, inā ua hoʻāpono ʻia mai ʻo ʻAberahama ma nā hana, he mea kāna e kaena ai, ʻaʻole naʻe i mua o ke Akua.

³ He aha ka mea a ka Palapala Hemolele i ʻōlelo mai ai? “«Ua manaʻoʻiʻo ʻo ʻAberahama i ke Akua, a ua hoʻolilo ʻia hoʻi ia i pono nona».”

⁴ A ʻo ka mea e hana ana, ʻaʻole i manaʻo ʻia kona uku no ka lokomaikaʻi ʻia; akā, no ka ʻaiʻē.

⁵ Akā, ʻo ka mea hana ʻole, a i manaʻoʻiʻo aku i ka mea nāna e hoʻāpono mai i ka mea pono ʻole, ua hoʻolilo ʻia mai, kona manaʻoʻiʻo i pono nona.

⁶ Pēlā nō hoʻi ʻo Dāvida i ʻōlelo mai ai i ka pōmaikaʻi ʻana o ke kanaka, iā ia ko ke Akua hoʻolilo ʻana i ka pono me ka hana ʻole:

⁷ “«Pōmaikaʻi ka poʻe i kala ʻia ko lākou hala, A i uhi ʻia ko lākou hewa.

⁸ “Pōmaikaʻi ke kanaka ke hoʻopili ʻole ka Haku i ka hewa iā ia».”

⁹ Ma luna o ka poʻe i ʻoki poepoe ʻia wale nō anei kēia pōmaikaʻi? A ma luna anei o ka poʻe ʻoki poepoe ʻole ʻia kekahi? No ka mea, ke ʻōlelo nei mākou, “«Ua hoʻolilo ʻia ka manaʻoʻiʻo i pono no ʻAberahama».”

¹⁰ I hea lā ia i hoʻolilo ʻia ai? I kona noho ʻoki poepoe ʻia anei? A i kona noho ʻoki poepoe ʻole ʻia anei? ʻAʻole i kona noho ʻoki poepoe ʻia; akā, i kona noho ʻoki poepoe ʻole ʻia.

¹¹ A ua loaʻa iā ia ke ʻoki poepoe ʻia i hōʻailona no ka pono o kona manaʻoʻiʻo ʻana i kona wā i ʻoki poepoe ʻole ʻia ai; i lilo ai ʻo ia i makua no ka poʻe a pau e manaʻoʻiʻo ana me ke ʻoki poepoe ʻole ʻia, i hoʻolilo ʻia ai ka pono iā lākou;

¹² a i makua no ka poʻe i ʻoki poepoe ʻia kekahi, ʻaʻole ka poʻe i ʻoki poepoe wale ʻia nō; akā, e hele ana hoʻi ma nā kapuaʻi o ko kākou makua ʻo ʻAberahama i kona noho ʻoki poepoe ʻole ʻia.

¹³ No ka mea, ʻo ka ʻōlelo mai iā ʻAberahama a i kāna mamo, e lilo ia i hoʻoilina no ke ao nei, ʻaʻole ia ma ke Kānāwai; akā, ma ka pono o ka manaʻoʻiʻo.

¹⁴ No ka mea, inā i lilo ka poʻe ma ke Kānāwai i poʻe hoʻoilina, inā ua lilo ka manaʻoʻiʻo i mea ʻole, a ua ʻole nō hoʻi ka mea i ʻōlelo ʻia mai;

¹⁵ no ka mea, ʻo ke Kānāwai ke kumu o ka inaina; no ka mea, ma kahi kānāwai ʻole, ʻaʻole he ʻae ʻana ma luna.

¹⁶ No laila, ma ka manaʻoʻiʻo ia, i hāʻawi lokomaikaʻi ʻia mai ia; i ʻoiaʻiʻo ai ka ʻōlelo hoʻopōmaikaʻi na ka poʻe mamo a pau, ʻaʻole na nā mea ma ke Kānāwai wale nō; akā, na nā mea hoʻi ma ka manaʻoʻiʻo o ʻAberahama; ʻo ia ka makua o kākou a pau,

¹⁷ (e like me ka mea i palapala ʻia, “«Ua hoʻolilo au iā ʻoe i makua no nā lāhui kanaka he nui nō»,”) i mua o ke alo o ke Akua āna i manaʻoʻiʻo ai, ka mea i hāʻawi i ke ola no ka poʻe make, a i ʻōlelo hoʻi i nā mea i hana ʻole ʻia, me he mau mea lā i hana ʻia.

¹⁸ ʻO ia ka mea, i mua o ka manaʻolana, i paulele ai me ka manaʻolana, e lilo ia i makua no nā lāhui kanaka he nui nō; e like me ka mea i ʻōlelo ʻia, “«Pēlā nō kāu poʻe mamo».”

¹⁹ A i kona nāwaliwali ʻole ʻana ma ka manaʻoʻiʻo, ʻaʻole ia i manaʻo i kona kino iho me he mea make lā, i kona kokoke ʻana i ka haneri o kona mau makahiki, ʻaʻole hoʻi i ka make o ka ʻōpū o Sara;

²⁰ ʻaʻole hoʻi ia i kānalua i ka ʻōlelo ʻana mai a ke Akua, ma ka hoʻomaloka; akā, ua ikaika ia ma ka manaʻoʻiʻo, e hoʻonani ana i ke Akua;

²¹ a ua maopopo leʻa kona manaʻo e hiki nō iā ia ke hoʻokō mai i ka mea āna i ʻōlelo mai ai.

²² No ia mea, «ua hoʻolilo ʻia ia i pono nona».

²³ ʻAʻole nona wale nō i palapala ʻia ai, ua hoʻolilo ʻia ia nona;

²⁴ akā, no kākou kekahi, ka poʻe e hoʻolilo ʻia mai ai ia, ka poʻe e manaʻo ana i ka Mea nāna i hoʻāla mai iā Iesū ko kākou Haku mai waena mai o ka poʻe make,

²⁵ ka Mea i hāʻawi ʻia no ko kākou hewa, a ua hoʻāla hou ʻia mai i hoʻāpono ʻia ai kākou.