ʻO KA ʻEPISETOLE A PAULO KA LUNAʻŌLELO I KO ROMA 3 - Ka Baibala Hemolele

1 He ʻōlelokīkē me kā Iudaio hoʻomaloka. 9 Nā mea ʻē aʻe e hewa ai ka poʻe Iudaio. 21 Ma ka manaʻoʻiʻo wale nō e hoʻāpono ʻia ai, ʻaʻole ma ke Kānāwai.

MOKUNA III.

¹ ¶ No ia hoʻi, he aha anei ka mea e ʻoi aku ai kā Iudaio? He aha hoʻi ka pōmaikaʻi o ke ʻoki poepoe ʻana?

² He nui nō ma kēlā mea, ma kēia mea; eia hoʻi ka mua, ua hāʻawi ʻia mai iā lākou nā kānāwai o ke Akua.

³ He aha hoʻi i manaʻoʻiʻo ʻole kekahi poʻe? E hiolo anei ka ʻoiaʻiʻo o ke Akua i ko lākou hoʻomaloka?

⁴ ʻAʻole loa ia; akā, e hōʻoiaʻiʻo ʻia aku ke Akua ke hoʻopunipuni nā kānaka a pau: me ka mea i palapala ʻia, “«I hoʻāpono ʻia ai ʻoe i kāu ʻōlelo ʻana mai, A i lanakila hoʻi ʻoe i kou hoʻāhewa ʻana mai».”

⁵ A inā e hoʻākāka aʻe ko kākou hewa i ka pono o ke Akua, he aha kā kākou mea e ʻōlelo ai? He pono ʻole anei ke Akua ke hoʻoili mai i ka inaina? (Ke ʻōlelo nei au ma kā ke kanaka.)

⁶ ʻAʻole loa: inā pēlā, pehea lā e hoʻopaʻi mai ai ke Akua i ko ke ao nei?

⁷ A inā i lilo ka ʻoiaʻiʻo o ke Akua i mea e nui ai kona nani, no koʻu hoʻopunipuni ʻana; no ke aha lā e hoʻohewa ʻia mai ai au e like me ke kanaka hewa?

⁸ E ʻōlelo anei kākou, e like me kā mākou i ʻōlelo ʻino ʻia mai ai, a e like me kā kekahi poʻe i ʻōlelo no mākou, “E hana hewa kākou e hiki mai ai ka maikaʻi?” He pono ko lākou hoʻohewa ʻia.

⁹ ¶ He aha hoʻi? Ua ʻoi aku anei kākou? ʻAʻole loa; no ka mea, ua hoʻākāka mākou ma mua, ʻo nā Iudaio a me nā Helene, ua pau pū lākou i ka hewa;

¹⁰ e like me ka mea i palapala ʻia, “«ʻAʻole loa he mea pono, ʻaʻole hoʻokahi.

¹¹ “ʻAʻole nō he mea i ʻike, ʻAʻole hoʻi he mea i ʻimi i ke Akua.

¹² “Ua pau lākou i ka hele hewa, ua lilo lākou i poʻe pono ʻole; ʻAʻole loa he mea e hana ana i ka maikaʻi, ʻAʻole loa hoʻokahi.”

¹³ “ʻO ko lākou kaniʻāʻī he lua kupapaʻu hāmama; Ua hoʻopunipuni lākou me ko lākou mau alelo;” “Aia ma lalo o ko lākou mau lehelehe ka mea make a nā moʻo niho ʻawa.”

¹⁴ “Ua piha ko lākou waha i ka hāʻiliʻili a me ka mea ʻawahia.”

¹⁵ “Ua māmā ko lākou mau wāwae i ka hoʻokahe koko.

¹⁶ Aia ma ko lākou mau alanui ka luku ʻana a me ka pōpilikia.

¹⁷ ʻAʻole hoʻi lākou i ʻike i ke alanui e malu ai.”

¹⁸ “ʻAʻole he weliweli i ke Akua i mua o ko lākou mau maka».”

¹⁹ ¶ Ua ʻike nō kākou, ʻo nā mea a ke Kānāwai i ʻōlelo mai ai, ua ʻōlelo nō ia i ka poʻe ma lalo o ke kānāwai; i paʻa nā waha a pau, a i lilo hoʻi ko ke ao nei a pau i hewa i mua o ke Akua.

²⁰ No laila ma ka hana ʻana ma ke Kānāwai, ʻaʻohe kanaka e hoʻāpono ʻia i mua ona; no ka mea, ma ke Kānāwai ka ʻike ʻana i ka hewa.

²¹ ¶ ʻĀnō hoʻi, ua hoʻākāka ʻia mai ko ke Akua hoʻāpono ʻana ʻaʻole ma ke Kānāwai; ua hōʻike ʻia mai ia e ke Kānāwai a me nā Kāula.

²² ʻO ia hoʻi ka hoʻāpono ʻana o ke Akua, ma ka manaʻoʻiʻo aku iā Iesū Kristo, no nā mea a pau, a ma luna hoʻi o ka poʻe a pau e manaʻoʻiʻo ana; ʻaʻole mea ʻokoʻa;

²³ no ka mea, ua lawehala nā mea a pau, ua nele hoʻi i ka nani o ke Akua,

²⁴ ua hoʻāpono wale ʻia mai ma kona lokomaikaʻi, no ka hoʻōla ʻana ma o Kristo Iesū lā;

²⁵ ʻo ia kā ke Akua i hāʻawi mai ai i mōhai kala hewa ma ka hilinaʻi i kona koko, i mea e hoʻākāka ai i kona hoʻāpono ʻana, i ke kala ʻana i nā hewa i hana ʻē ʻia ma mua, i ke ahonui ʻana o ke Akua;

²⁶ i mea e hoʻākāka ai i kona hoʻāpono ʻana, i kēia manawa; i pono ʻo ia, a i mea hoʻāpono hoʻi i ka mea manaʻoʻiʻo iā Iesū.

²⁷ ʻAuhea lā hoʻi ke kaena ʻana? Ua pale ʻia aku ia. Ma ke kānāwai hea? ʻO nā hana anei? ʻAʻole; ma ke kānāwai nō hoʻi o ka manaʻoʻiʻo ʻana.

²⁸ No laila, ke manaʻo nei mākou, ua hoʻāpono ʻia mai ke kanaka ma ka manaʻoʻiʻo, ʻaʻole ma nā hana o ke Kānāwai.

²⁹ ʻO ke Akua nō anei ia no ka poʻe Iudaio wale nō? ʻAʻole no nā kānaka ʻē kekahi? ʻO ia, no nā kānaka ʻē kekahi.

³⁰ No ka mea, ʻo ia hoʻokahi nō ke Akua nāna e hoʻāpono i ka poʻe i ʻoki poepoe ʻia, ma ka manaʻoʻiʻo, a i ka poʻe i ʻoki poepoe ʻole ʻia hoʻi ma ka manaʻoʻiʻo.

³¹ ¶ Ke hoʻohiolo nei anei mākou i ke Kānāwai, ma ka manaʻoʻiʻo? ʻAʻole loa; ke hoʻokūpaʻa nei nō mākou i ke Kānāwai.