ʻO KA ʻEPISETOLE A PAULO KA LUNAʻŌLELO I KO ROMA 15 - Ka Baibala Hemolele

1 He ʻōlelo paipai i ke aloha a me ke ahonui. Ko Paulo manaʻoʻiʻo aloha i nā hoahānau o Roma, a me kona makemake e ʻike iā lākou.

MOKUNA XV.

¹ ¶ He pono nō hoʻi no kākou ka poʻe ikaika e hoʻomanawanui i ka nāwaliwali o ka poʻe ikaika ʻole, ʻaʻole hoʻi e hōʻoluʻolu iho iā kākou iho.

² E hōʻoluʻolu aku kēlā mea kēia mea o kākou i kona hoalauna ma ka pono, i hoʻokūpaʻa ʻia ai ia.

³ No ka mea, ʻaʻole i hōʻoluʻolu iho ʻo Kristo iā ia iho; akā, me ka mea i palapala ʻia, “«ʻO nā ʻōlelo hōʻino a ka poʻe hōʻino iā ʻoe ua hāʻule mai ia ma luna iho oʻu».”

⁴ No ka mea, ʻo nā mea a pau i palapala ʻē ʻia ma mua, ua palapala ʻia ia i mea e aʻo mai ai iā kākou, i loaʻa iā kākou ka manaʻolana ma ke ahonui, a me ka hōʻoluʻolu ʻana o ka Palapala Hemolele.

⁵ A na ke Akua nona mai ke ahonui, a me ka hōʻoluʻolu ʻana, e hāʻawi iā ʻoukou i manaʻo like kekahi me kekahi ma muli o Kristo Iesū;

⁶ i hoʻonani aku ʻoukou me ka lōkahi o ka manaʻo, a me ka leo hoʻokahi i ke Akua, i ka Makua hoʻi o ko kākou Haku ʻo Iesū Kristo.

⁷ ¶ No laila e lokomaikaʻi aku kekahi i kekahi, me Kristo hoʻi i lokomaikaʻi mai ai iā ʻoukou, i hoʻonani ʻia ai ke Akua.

⁸ Ke ʻōlelo aku nei nō hoʻi au, he lawehana nō ʻo Iesū Kristo no ka poʻe i ʻoki poepoe ʻia, no ka pono a ke Akua, i hoʻokō ʻia ai nā ʻōlelo hoʻopōmaikaʻi i ka poʻe kūpuna;

⁹ e hoʻonani aʻe hoʻi nā kānaka ʻē i ke Akua no kona lokomaikaʻi; e like me ka mea i palapala ʻia, “«No laila au e hoʻomaikaʻi aku ai iā ʻoe ma waena o ko nā ʻāina ʻē, A e hoʻoleʻa aku hoʻi au i kou inoa».”

¹⁰ A ua ʻōlelo hou mai nō ia, “«E ʻoliʻoli ʻoukou e nā lāhui kanaka me kona poʻe kānaka».”

¹¹ Eia hou, “«E hoʻoleʻa aku ʻoukou iā Iēhova, e nā lāhui kanaka a pau, A e hoʻonani aku ʻoukou iā ia, e nā kānaka a pau».”

¹² A ua ʻōlelo hou mai ʻo ʻIsaia, “«E kupu ana ka mole o Iese, A e kū mai kekahi i aliʻi no nā lāhui kanaka, A iā ia e paulele ai ko nā ʻāina ʻē».”

¹³ Na ke Akua nona mai ka manaʻolana e hoʻopiha iā ʻoukou me ka ʻoliʻoli, a me ka malu i ka manaʻoʻiʻo ʻana, i nui ai hoʻi ko ʻoukou manaʻolana ʻana ma ka mana o ka ʻUhane Hemolele.

¹⁴ ¶ Ua maopopo leʻa hoʻi ko ʻoukou iaʻu, e nā hoahānau, ua piha ʻoukou i ka lokomaikaʻi, ua nui hoʻi ko ʻoukou ʻike, a e hiki nō iā ʻoukou ke aʻo aku kekahi i kekahi.

¹⁵ Ua palapala aku hoʻi au iā ʻoukou, me ka maopopo, e nā hoahānau, e paipai ana iā ʻoukou ma kekahi mau mea, no ka haʻawina i hāʻawi ʻia mai iaʻu e ke Akua,

¹⁶ i lilo au i lawehana o Iesū Kristo no nā lāhui kanaka, e hana ana i ka ʻoihana kahuna, ma ka ʻeuanelio a ke Akua, i lilo nā lāhui kanaka i ʻālana pono i huikala ʻia e ka ʻUhane Hemolele.

¹⁷ No ia hoʻi, he mea koʻu e hauʻoli ai ma o Iesū Kristo lā i nā mea ma muli o ke Akua.

¹⁸ No ka mea, ʻaʻole au manaʻo e haʻi aku i nā mea ʻaʻole i hana ʻia e Kristo ma oʻu nei, i hoʻolohe ai nā lāhui kanaka ma ka ʻōlelo, a ma ka hana kekahi,

¹⁹ ma ka mana o nā hōʻailona, a me nā mea kupanaha, a ma ka mana o ka ʻUhane o ke Akua; ua hoʻolaha nui aku au i ka ʻeuanelio a Kristo, mai Ierusalema a puni, a hiki aku i ʻIluriko.

²⁰ Nui akula nō hoʻi koʻu makemake e haʻi aku i ka ʻeuanelio ma kahi i haʻi ʻole ʻia aku ai ka inoa ʻo Kristo, o kūkulu aku wau ma luna o ko haʻi kumu;

²¹ akā, e like me ka mea i palapala ʻia, “«ʻO ka poʻe i aʻo ʻole ʻia nona, e ʻike nō lākou, A ʻo ka poʻe i lohe ʻole, e hoʻomaopopo nō lākou».”

²² ¶ No laila, ua alalai nui ʻia au i kuʻu hele ʻana aku i o ʻoukou lā.

²³ Akā, ʻānō, ʻaʻole wahi e koe mai iaʻu i kēia mau ʻāina, a i koʻu makemake ʻana i kēia mau makahiki e hele i o ʻoukou lā;

²⁴ i koʻu hele ʻana aku i Sepania, manaʻo nō wau e ʻike iā ʻoukou i koʻu hele ʻana aʻe, a e kōkua ʻia e ʻoukou i koʻu hele ʻana i laila, ke loaʻa ʻē iaʻu kauwahi ʻoluʻolu iā ʻoukou.

²⁵ Akā, ʻānō, e hele ana au i Ierusalema e kōkua i ka poʻe haipule.

²⁶ No ka mea, he mea pono nō i ka manaʻo o ko Makedonia a me ko ʻAkaia, e hāʻawi i nā makana no ka poʻe ʻilihune ma Ierusalema.

²⁷ He mea pono ia manaʻo; no ka mea, he poʻe ʻaiʻē ʻiʻo lākou nei na lākou lā. No ka mea, inā i loaʻa i nā lāhui kanaka ko lākou waiwai ma ka ʻuhane, he pono ʻiʻo nō lākou nei e kōkua iā lākou lā ma nā mea o ke kino.

²⁸ A pau kēia i ka hana ʻia, a hōʻoiaʻiʻo aku au i kēia hua no lākou, e hele aku nō wau i waena o ʻoukou i Sepania.

²⁹ Ua ʻike nō hoʻi au, i koʻu hele ʻana i o ʻoukou lā, e hele nō wau me ka pono nui o ka ʻeuanelio a Kristo.

³⁰ ¶ Ke nonoi aku nei au iā ʻoukou, e nā hoahānau, no ko kākou Haku no Iesū Kristo, a no ke aloha o ka ʻUhane, e hoʻoikaika pū ʻoukou me aʻu i ka pule i ke Akua noʻu;

³¹ i hoʻopakele ʻia ai au i ka poʻe manaʻoʻiʻo ʻole ma Iudea, a i ʻoluʻolu hoʻi ka poʻe haipule i koʻu kōkua ʻana no Ierusalema;

³² i hele aku hoʻi au i o ʻoukou lā me ka ʻoliʻoli, ke makemake mai ke Akua, a e hōʻoluʻolu pū ʻia au me ʻoukou.

³³ E noho pū hoʻi ke Akua e malu ai me ʻoukou a pau. ʻĀmene.