ʻO KA ʻEPISETOLE A PAULO KA LUNAʻŌLELO I KO ROMA 12 - Ka Baibala Hemolele

1 He ʻōlelo hoʻoikaika, i mau ka haipule, ke aloha, ka lokomaikaʻi, a me ka hoʻomanawanui.

MOKUNA XII.

¹ ¶ No ia hoʻi, ke nonoi aku nei au iā ʻoukou, e nā hoahānau, ma ke aloha o ke Akua, e hāʻawi i ko ʻoukou mau kino i mōhai ola, hemolele, hōʻoluʻolu i ke Akua; ʻo ia kā ʻoukou hoʻomana naʻauao.

² Mai noho ʻoukou a hoʻohālike me ko ke ao nei; akā, e hoʻopāhaʻohaʻo ʻoukou ma ke ʻano hou ʻana o ko ʻoukou naʻau, i hoʻomaopopo ʻoukou i ko ke Akua makemake, ka pono, ka hōʻoluʻolu, a me ka hemolele.

³ ¶ No ka mea, ma ka haʻawina i hāʻawi ʻia mai iaʻu, ke ʻōlelo aku nei au i kēlā mea i kēia mea i waena o ʻoukou, mai manaʻo mahalo iho ʻo ia iā ia iho a pono ʻole ka manaʻo; akā, e manaʻo hoʻohaʻahaʻa, e like me ka haʻawina o ka manaʻoʻiʻo a ke Akua i hāʻawi mai ai i kēlā mea a i kēia mea.

⁴ No ka mea, e like me nā lālā o kākou he nui ma ke kino hoʻokahi, ʻaʻole naʻe he ʻoihana hoʻokahi na lākou a pau;

⁵ pēlā hoʻi kākou he nui wale, hoʻokahi hoʻi o kākou kino i loko o Kristo, a he mau lālā kākou kekahi no kekahi.

⁶ I ko kākou lako ʻana i nā haʻawina like pū ʻole, ma muli hoʻi o ka haʻawina i hāʻawi ʻia mai iā kākou; inā he wānana, ma ke ana ia o ka manaʻoʻiʻo;

⁷ inā he puʻukū, ma ka lawelawe puʻukū ʻana; a ʻo ka mea e aʻo aku, ma ke aʻo ʻana;

⁸ a ʻo ka mea ʻōlelo hoʻoikaika, ma ka ʻōlelo hoʻoikaika ʻana; ʻo ka mea hāʻawi, me ka naʻau kūpono; ʻo ka luna, me ka moloā ʻole; ʻo ka mea hana lokomaikaʻi aku, me ka hoihoi.

⁹ ¶ ʻO ke aloha, mai hoʻokamani ia. E hoʻowahāwahā i ka ʻino; e hoʻopili aku i ka maikaʻi.

¹⁰ E launa aku hoʻi kekahi i kekahi, ma ke aloha hoahānau; e hoʻopakela aku kekahi i kekahi ma ka hoʻomaikaʻi ʻana.

¹¹ I ka hana mau ʻana, mai hoʻopalaleha; i ikaika hoʻi ʻoukou ma ka naʻau; e mālama ana i ka Haku.

¹² E hauʻoli nō ka manaʻolana; e hoʻomanawanui i ka pōpilikia; e hoʻomau ana ma ka pule.

¹³ E hāʻawi aku no ka nele o nā haipule. E hoʻokipa nō.

¹⁴ E hoʻomaikaʻi aku i ka poʻe e hoʻomaʻau mai iā ʻoukou. E hoʻomaikaʻi aku, mai hōʻino aku.

¹⁵ E hauʻoli pū me ka poʻe e hauʻoli ana, a e uē pū me ka poʻe e uē ana.

¹⁶ I hoʻokahi ko ʻoukou manaʻo ko kekahi me ko kekahi. Mai manaʻo aku i nā mea kiʻekiʻe; akā, e alakaʻi ʻia e nā mea haʻahaʻa. Mai manaʻo iho iā ʻoukou iho, ua akamai.

¹⁷ Mai hana ʻino aku i kekahi no ka hana ʻino mai. E ʻimi i ka pono i mua o nā kānaka a pau.

¹⁸ Inā he mea hiki, ma kahi e hiki ai ʻoukou, e kuʻikahi ʻoukou me nā kānaka a pau.

¹⁹ Mai hoʻopaʻi ʻoukou no ʻoukou iho, e ka poʻe i aloha ʻia; akā, e hoʻokaʻawale aku no ka inaina; no ka mea, ua palapala ʻia, “«Noʻu nō ka hoʻopaʻi ʻana, naʻu nō e uku aku»,” wahi a ka Haku.

²⁰ “«No ia hoʻi, inā pōloli kou ʻenemi, e hānai iā ia; inā e make wai ia, e hoʻohāinu iā ia. No ka mea, i kāu hana ʻana pēlā e hoʻāhu ʻoe i nā lānahu ahi ma luna iho o kona poʻo».”

²¹ E ao o lanakila ka hewa ma luna ou; akā, e hoʻolanakila i ka pono ma luna o ka hewa.