ʻO KA ʻEPISETOLE A PAULO KA LUNAʻŌLELO I KO ROMA 11 - Ka Baibala Hemolele

1 ʻAʻole ke Akua i kiola loa i kā ʻIseraʻela. 25 E hoʻohuli ʻia mai lākou me ka nui o ko nā ʻāina ʻē. 33 Ka manaʻo mahalo o Paulo.

MOKUNA XI.

¹ ¶ No ia hoʻi, ke nīnau aku nei au, “Ua kiola anei ke Akua i kona poʻe kānaka ponoʻī?” ʻAʻole loa; no ka mea, he mamo na ʻIseraʻela au, no nā hua o ʻAberahama, no ka ʻohana hoʻi a Beniamina.

² ʻAʻole nō ke Akua i kiola i kona poʻe kānaka āna i ʻike mua ai. ʻAʻole anei ʻoukou i ʻike i kā ka Palapala Hemolele i haʻi mai ai iā ʻElia, iā ia i hoʻopiʻi aku ai i ke Akua i kā ʻIseraʻela, i ka ʻī ʻana,

³ “E ka Haku, «ua pepehi lākou i kāu poʻe kāula, ua wāwahi lākou i kou mau kuahu, ʻo wau wale nō koe, a ke ʻimi nei lākou e kāʻili i kuʻu ola»?”

⁴ A pehea mai kā ke Akua ʻōlelo iā ia? “«Ua hoʻāna ʻē au» noʻu «i ʻehiku tausani kānaka ʻaʻole i kukuli iho iā Baʻala».”

⁵ Pēlā hoʻi i kēia manawa, ua koe mai kekahi poʻe ma ka wae ʻana o ka lokomaikaʻi.

⁶ A inā ma ka lokomaikaʻi, a laila ʻaʻole ma nā hana. A i ʻole pēlā, a laila ʻo ka lokomaikaʻi, ʻaʻole ia he lokomaikaʻi. Akā inā ma nā hana, ʻaʻole ma ka lokomaikaʻi, a i ʻole pēlā, a laila, ʻo ka hana ʻaʻole ia he hana.

⁷ He aha hoʻi i laila? ʻAʻole i loaʻa i kā ʻIseraʻela ka mea āna i ʻimi aku ai; akā, ua loaʻa aʻela i ka poʻe i wae ʻia, a ua hoʻomakapō ʻia ka poʻe i koe;

⁸ (e like me ka mea i palapala ʻia, “«Ua hāʻawi mai ke Akua iā lākou i naʻau hiamoe, A me nā maka ʻike ʻole, a me nā pepeiao lohe ʻole,) A hiki i kēia lā».”

⁹ ʻŌlelo maila hoʻi ʻo Dāvida, “E lilo ko lākou papa ʻaina i pahele e hei ai lākou, I mea e hina ai hoʻi, a i uku hoʻi no lākou.

¹⁰ “E hoʻopouli ʻia ko lākou mau maka, i ʻole ai lākou e ʻike, A e hoʻokūlou mau ʻia ko lākou kua».”

¹¹ ¶ Ke nīnau aku nei hoʻi au, “Ua ʻōkupe anei lākou i hina loa ai?” ʻAʻole loa; akā, ʻo ko lākou hina ʻana, he mea ia e ola ai ko nā ʻāina ʻē, i mea e hoʻoikaika hou ai iā lākou.

¹² Inā hoʻi ʻo ko lākou hina ʻana ka mea e waiwai ai ke ao nei, a ʻo ko lākou kiola ʻia ka mea e waiwai ai ko nā ʻāina ʻē, ʻaʻole anei e nui aku ia ma ko lākou pōmaikaʻi hou ʻana?

¹³ (No ka mea, ke ʻōlelo nei au iā ʻoukou, e ko nā ʻāina ʻē; no ka mea, he lunaʻōlelo wau no nā kānaka ʻē, a ke hoʻomaikaʻi nei au i kuʻu ʻoihana;

¹⁴ i hoʻoikaika aʻe au i koʻu poʻe hoahānau ma ke kino, a e hoʻōla au i kekahi poʻe o lākou.)

¹⁵ No ka mea, inā ʻo ka hemo ʻana o lākou ka mea e hoʻomaluhia ai ke ao nei, he aha hoʻi ka loaʻa hou ʻana mai o lākou, ʻaʻole anei ia ʻo ke ola mai ka make mai?

¹⁶ A inā i laʻa ka hua mua, pēlā aku hoʻi ka pōpō palaoa; a inā i laʻa ke kumu, pēlā aku hoʻi nā lālā.

¹⁷ A inā i haʻihaʻi ʻia kekahi mau lālā, a ʻo ʻoe he ʻoliva ulu wale, i pākuʻi ʻia, ma ko lākou wahi, e loaʻa pū ana iā ʻoe ko ke kumu, a me ka momona o ka ʻoliva;

¹⁸ mai hoʻokiʻekiʻe aʻe ʻoe ma luna o nā lālā; akā, inā hoʻokiʻekiʻe aʻe ʻoe, ʻaʻole e kau ke kumu ma luna ou; akā, ʻo ʻoe ma luna o ke kumu.

¹⁹ A laila e ʻōlelo nō ʻoe, “Ua haʻihaʻi ʻia nā lālā i pākuʻi ʻia aku ai au.”

²⁰ ʻO ia, ua haʻihaʻi ʻia nā lālā no ka manaʻoʻiʻo ʻole, a ma ka manaʻoʻiʻo e kū nei ʻoe. Mai hoʻonaʻau kiʻekiʻe ʻoe, e hopohopo naʻe;

²¹ no ka mea, inā i hoʻokoe ʻole ke Akua i nā lālā maoli, e ao o hoʻokoe ʻole ʻo ia iā ʻoe.

²² No ia mea, e nānā ʻoe i ka lokomaikaʻi a me ka ʻoʻoleʻa o ke Akua; he ʻoʻoleʻa i ka poʻe i hāʻule; akā, he lokomaikaʻi nō iā ʻoe ke noho mau ʻoe ma ka pono; a i ʻole, e ʻoki ʻia auaneʻi ʻoe.

²³ A ʻo lākou nei hoʻi, i ʻole lākou e noho mau ma ka manaʻoʻiʻo ʻole, e pākuʻi hou ʻia auaneʻi lākou; no ka mea, e hiki nō i ke Akua ke pākuʻi hou iā lākou.

²⁴ No ka mea, inā i ʻoki ʻia ʻoe no luna mai o ka ʻoliva ulu wale ma ke ʻano maoli, a ua pākuʻi ʻia ma ka ʻoliva maikaʻi me ke ʻano ʻē, ʻaʻole anei e pākuʻi ʻiʻo ʻia nā lālā maoli i ko lākou ʻoliva ponoʻī?

²⁵ ¶ No ka mea, ʻaʻole au makemake e ʻike ʻole ʻoukou, e nā hoahānau, i kēia pohihihi, o akamai ʻoukou i ko ʻoukou manaʻo; ua loaʻa ka moʻowini i kekahi poʻe o kā ʻIseraʻela a hiki i ka manawa e komo mai ai ka nui o ko nā ʻāina ʻē.

²⁶ A laila e hoʻōla ʻia kā ʻIseraʻela a pau; e like me ka mea i palapala ʻia, “«No loko mai o Ziona e puka mai ai ka Hoʻōla, A e pale aku ia i ka ʻaiā ʻana, mai o Iakoba aku.”

²⁷ A ʻo kēia kaʻu berita me lākou, I ka manawa e kala aku ai au i nā hewa o lākou».”

²⁸ No ʻoukou hoʻi i lilo ai lākou i poʻe ʻenemi, ma ka ʻeuanelio; akā, no nā kūpuna, he poʻe aloha, ma ka wae ʻana.

²⁹ No ka mea, ʻo nā haʻawina a me ke koho ʻana a ke Akua, me ka luli ʻole nō ia.

³⁰ Me ʻoukou i hoʻolohe ʻole ai i ke Akua ma mua, a i kēia manawa ua loaʻa iā ʻoukou ke aloha ʻia mai, ma ko lākou hoʻolohe ʻole;

³¹ pēlā hoʻi lākou i hoʻolohe ʻole ai i kēia manawa, i loaʻa iā lākou ke aloha ʻia ma ko ʻoukou aloha ʻia.

³² No ka mea, ua kuʻu iho ke Akua iā lākou a pau i ka manaʻoʻiʻo ʻole, i aloha mai ai ʻo ia iā lākou.

³³ ¶ Nani ka hohonu o ka waiwai a me ke akamai, a me ka ʻike o ke Akua! Nani hoʻi ke kupanaha o kona mau manaʻo, a me ka ʻike ʻole ʻia aku o kona mau ʻaoʻao!

³⁴ No ka mea, «ʻo wai lā ka mea i ʻike i ka naʻau o ka Haku? ʻO wai akula hoʻi kona hoa kūkākūkā?

³⁵ ʻO wai lā hoʻi ka mea i hāʻawi ʻē aku iā ia e uku hou ʻia mai ai ia»?

³⁶ No ka mea, nāna mai, a ma ona lā, a nona nō hoʻi nā mea a pau; iā ia ka hoʻonani mau loa ʻia aku. ʻĀmene.