ʻO KA ʻEPISETOLE A PAULO KA LUNAʻŌLELO I KO ROMA 10 - Ka Baibala Hemolele

1 No ka hoʻomaloka o nā Iudaio, a me ka lilo ʻana o kānaka ʻē i poʻe manaʻoʻiʻo.

MOKUNA X.

¹ ¶ E nā hoahānau, eia ka makemake ʻiʻo o koʻu naʻau, a me kaʻu pule i ke Akua, no lākou, e ola lākou.

² No ka mea, ke hōʻike aku nei nō wau no lākou, he manaʻo ikaika ko lākou no ke Akua, ʻaʻole naʻe ma muli o ka ʻike.

³ No ka mea, i ko lākou ʻike ʻole ʻana i ka hoʻāpono ʻia mai e ke Akua, a i ko lākou ʻimi ʻana e hoʻokūpaʻa i ko lākou pono iho, ʻaʻole lākou i noho aku ma muli o ka hoʻāpono ʻana mai a ke Akua.

⁴ No ka mea, ʻo Kristo ko ke kānāwai mea e pau ai, e hoʻāpono ʻia ai nā mea a pau i manaʻoʻiʻo.

⁵ No ka mea, ua hoʻākāka mai ʻo Mose i ka hoʻāpono ʻana ma ke kānāwai, ʻo ke kanaka e hana ana ia mau mea, e ola ia i laila.

⁶ Akā, ke ʻōlelo nei ka hoʻāpono ʻana ma ka manaʻoʻiʻo, “«Mai ʻōlelo ʻoe i loko o kou naʻau, ‘ʻO wai lā ke piʻi aku i ka lani»?’ ʻO ia kēia, e lawe mai iā Kristo i lalo nei,

⁷ a, ‘ʻO wai lā ke iho i lalo i ka hohonu»?’ ʻO ia kēia, e lawe mai iā Kristo mai waena mai o ka poʻe make.”

⁸ He aha hoʻi kāna i ʻōlelo mai nei? “«Ua kokoke i ou lā ka ʻōlelo, aia i loko o kou waha a me kou naʻau».” ʻO ia ka ʻōlelo a ka manaʻoʻiʻo a kākou e haʻi aku nei;

⁹ no ka mea, inā e hōʻoiaʻiʻo ʻoe me kou waha i ka Haku iā Iesū, a e manaʻoʻiʻo hoʻi i loko o kou naʻau, ua hoʻāla mai ke Akua iā ia mai waena mai o ka poʻe make, e ola ʻoe.

¹⁰ No ka mea, ma ka naʻau ka manaʻoʻiʻo e hoʻāpono ʻia ai; a ma ka waha ka hōʻoiaʻiʻo āna e ola ai.

¹¹ No ka mea, ke ʻōlelo nei ka Palapala Hemolele, “«ʻO ka mea e manaʻoʻiʻo iā ia, ʻaʻole ia e hoka».”

¹² No ka mea, ʻaʻole he ʻokoʻa kā Iudaio a me kā Helene; no ka mea, hoʻokahi nō Haku ma luna o nā mea a pau, he waiwai nui kona no ka poʻe a pau i kāhea aku iā ia.

¹³ No ka mea, “«ʻO ka mea e kāhea aku i ka inoa o ka Haku, e ola ia».”

¹⁴ A pehea lā hoʻi lākou e kāhea aku ai i ka Mea a lākou i manaʻoʻiʻo ʻole ai? A pehea lā hoʻi lākou e manaʻoʻiʻo aku ai i ka Mea a lākou i lohe ʻole ai? A pehea lā hoʻi lākou e lohe ai ke ʻole ka mea nāna e haʻi?

¹⁵ A pehea lā hoʻi e haʻi aku ai lākou ke hoʻouna ʻole ʻia aku? Penei hoʻi i palapala ʻia ai, “«Nani nā wāwae o ka poʻe i hōʻike mai i ka ʻeuanelio, i haʻi mai hoʻi i ka nūhou maikaʻi»!”

¹⁶ ¶ Akā, ʻaʻole mālama nā mea a pau i ka ʻeuanelio; no ka mea, ke ʻōlelo mai nei ʻo ʻIsaia, “«E ka Haku, ʻo wai lā ka mea i manaʻo mai i kā mākou i haʻi aku ai»?”

¹⁷ No ia hoʻi, ma ka lohe ʻana ka manaʻoʻiʻo, a ma ka ʻōlelo a ke Akua ka lohe ʻana.

¹⁸ A ke nīnau nei au, ʻaʻole anei lākou i lohe? ʻOiaʻiʻo: “«Ua kuʻi akula ko lākou leo i nā ʻāina a pau, A, ʻo kā lākou mau ʻōlelo i nā palena o ka honua».”

¹⁹ Ke nīnau hou nei au, ʻaʻole anei i ʻike ʻo kā ʻIseraʻela? Eia mua, ke ʻī mai nei ʻo Mose, “«E hoʻonāukiuki au iā ʻoukou ma ka poʻe ʻaʻole he lāhui kanaka, A e hoʻohuhū iā ʻoukou ma ka lāhui kanaka naʻaupō».”

²⁰ Akā, ʻo ʻIsaia kai hoʻākāka leʻa mai, ʻī maila, “«Ua loaʻa aku au i ka poʻe i ʻimi ʻole mai iaʻu; Ua hōʻike ʻia aku au i ka poʻe i nīnau ʻole mai noʻu».”

²¹ Akā, ke ʻōlelo maila ʻo ia no kā ʻIseraʻela, “«Ua kīkoʻo aku au i kuʻu lima i ka lāhui kanaka hoʻokuli a me ka pākīkē, a pau loa aʻela ka lā».”