KA HŌʻIKE ʻANA A IOANE KA HAIPULE 5 - Ka Baibala Hemolele

1 Ka buke paʻa, a me ka wepa ʻana.

MOKUNA V.

¹ ¶ ʻIke akula au ma loko o ka lima ʻākau o ka Mea e noho ana ma ka noho aliʻi, he buke ua palapala ʻia ma loko, a ma waho ua hoʻopaʻa ʻia i nā wepa ʻehiku.

² ʻIke akula au i ka ʻānela ikaika, e hea aʻe ana me ka leo nui, “ʻO wai ka mea pono ke wehe i ka buke, a e ʻākaʻa i kona mau wepa?”

³ ʻAʻole ma ka lani, ʻaʻole ma ka honua, ʻaʻole hoʻi ma lalo iho o ka honua, ka mea i hiki iā ia ke wehe i ua buke nei, ʻaʻole hoʻi ke nānā aku iā ia.

⁴ Uē nui ihola au, no ka loaʻa ʻole o ka mea pono e wehe a e heluhelu i ka buke, a e nānā hoʻi ma luna iho.

⁵ ʻĪ maila kekahi o nā lunakahiko iaʻu, “Mai uē ʻoe; aia hoʻi ua lanakila maila ka Liona o ka ʻohana a Iuda, ka Mamo a Dāvida, e wehe i ua buke nei, a e ʻākaʻa i kona mau wepa ʻehiku.”

⁶ A ʻike akula au ma ka noho aliʻi, a ma waena o nā mea ola ʻehā, a me nā lunakahiko, he Keiki Hipa e kū ana me he mea i pepehi ʻia lā, ʻehiku ona pepeiaohao, ʻehiku hoʻi ona maka; ʻo ia nā ʻUhane ʻehiku o ke Akua, i hoʻouna ʻia aku i ka honua a pau.

⁷ Hele maila ia, lawe ihola i ka buke, mai ka lima ʻākau aku o ka Mea e noho ana ma ka noho aliʻi.

⁸ A i kona lawe ʻana i ka buke, moe ihola nā mea ola ʻehā a me nā lunakahiko he iwakāluakumamāhā i mua o ke Keiki Hipa; he mau lira ko lākou a pau, a me nā hue gula, ua piha i nā mea ʻala, ʻo ia hoʻi nā pule a ka poʻe haipule.

⁹ Memele maila lākou i ke mele hou, e ʻōlelo ana, “Pono nō ʻoe ke lawe i ka buke, a e ʻākaʻa i kona mau wepa; No ka mea, ua pepehi ʻia ʻoe, a ua kūʻai mai ʻoe iā mākou no ke Akua me kou koko, Mai loko mai o nā ʻohana a pau, a me nā ʻōlelo, a me nā ʻāina, a me nā lāhui kanaka a pau.

¹⁰ “A ua hoʻolilo ʻoe iā mākou i poʻe aliʻi, a i poʻe kāhuna no ko mākou Akua; A iā mākou nō ke aupuni ma ka honua.”

¹¹ Nānā akula au, a lohe ihola i ka leo o nā ʻānela, he nui loa, a me nā mea ola, a me nā lunakahiko e anaina ana ma ka noho aliʻi: a ʻo ka helu ʻana iā lākou he haneri miliona a me nā tausani tausani;

¹² e ʻōlelo ana me ka leo nui, “E pono nō ke Keiki Hipa i pepehi ʻia, Ke loaʻa iā ia ka mana, a me ka waiwai, a me ke akamai, a me ka ikaika, a me ka nani, a me ka mahalo, a me ka hoʻomaikaʻi ʻia.”

¹³ A lohe akula au i nā mea a pau ma ka lani, a ma ka honua, a ma lalo iho o ka honua, a me nā mea a pau ma ka moana, a ma loko o ia mau mea, e ʻōlelo ana, “No ka Mea e noho ana ma ka noho aliʻi, no ke Keiki Hipa hoʻi, Ka hoʻomaikaʻi ia a me ka nani, a me ka hanohano, a me ka ikaika, ia ao aku, ia ao aku.”

¹⁴ ʻĪ maila nā mea ola ʻehā, “ʻĀmene.” Moe ihola nā lunakahiko he iwakāluakumamāhā, hoʻomana akula i ka Mea e ola mau ana ia ao aku, ia ao aku.