KA HŌʻIKE ʻANA A IOANE KA HAIPULE 3 - Ka Baibala Hemolele

1 Ka ʻōlelo no ka ʻekalesia ma Saredeisa, a ma Piladelapeia a me Laodikeia.

MOKUNA III.

¹ ¶ “E palapala aku ʻoe i ka ʻānela o ka ʻekalesia ma Saredeisa: Ke ʻī mai nei ka Mea iā ia nā ʻUhane ʻehiku o ke Akua, a me nā hōkū ʻehiku, penei: ‘Ua ʻike nō au i kāu hana ʻana, he inoa kou ma ke ola; akā, ua make ʻoe.

² ‘E makaʻala a e hoʻoikaika i nā mea i koe, nā mea ʻaneʻane make; no ka mea, ʻaʻole i loaʻa iaʻu kāu mau hana he pono ʻiʻo i mua o ke Akua.

³ ‘E hoʻomanaʻo hoʻi i nā mea āu i loaʻa ai, a i lohe ai hoʻi, a e mālama aku, a e mihi. A i ʻole ʻoe e makaʻala, ʻeā, e hele aku au i ou lā, me he ʻaihue lā, ʻaʻole hoʻi ʻoe e ʻike i koʻu hora e hiki aku ai iā ʻoe.

⁴ ‘He mau inoa nō naʻe kou ma Saredeisa, ʻaʻole i hoʻohaumia lākou i ko lākou mea ʻaʻahu; e hele pū lākou me aʻu, ma ke keʻokeʻo; no ka mea, ua pono lākou.

⁵ ‘ʻO ka mea lanakila, e hoʻoʻaʻahu ʻia ʻo ia i ka ʻaʻahu keʻokeʻo; ʻaʻole hoʻi au e holoi aku i kona inoa mai loko aku o ka Buke o ke Ola; akā, e hōʻoiaʻiʻo aku nō au i kona inoa i mua o koʻu Makua, a i mua o kona poʻe ʻānela.

⁶ ‘ʻO ka mea pepeiao lā, e hoʻolohe ia i ka mea a ka ʻUhane e ʻōlelo nei i nā ʻekalesia.’

⁷ ¶ “E palapala aku ʻoe i ka ʻānela o ka ʻekalesia ma Piladelepia: Ke ʻī mai nei ka Mea hoʻāno, ka Mea ʻoiaʻiʻo, ʻo ka Mea iā ia ke kī o Dāvida, ʻo ka Mea wehe, ʻaʻohe mea nāna e pani mai; a pani hoʻi ʻo ia, ʻaʻohe mea nāna e wehe:

⁸ ‘Ua ʻike nō au i kāu hana ʻana; aia hoʻi, ua waiho au i ka puka i mua ou, e hāmama ana, ʻaʻohe mea nāna ia e pani; no ka mea, he wahi ikaika iki kou, a ua mālama ʻoe i kaʻu ʻōlelo, ʻaʻole i hōʻole i koʻu inoa.

⁹ ‘Aia hoʻi, e hoʻolilo aku au i hale hālāwai o Sātana, i ka poʻe i ʻōlelo iā lākou iho, he poʻe Iudaio, ʻaʻole kā, ua wahaheʻe lākou; e hana aku nō au iā lākou, a e hele mai lākou a e kukuli hoʻomaikaʻi i mua o kou wāwae, a e ʻike auaneʻi lākou, ʻo wau nō kai aloha aku iā ʻoe.

¹⁰ ‘No ka mea, ua mālama ʻoe i ka ʻōlelo o koʻu ahonui, naʻu nō hoʻi e mālama aku iā ʻoe i ka hora o ka hoʻowalewale, i kokoke nō e hiki mai ma luna o ko ke ao nei a pau, e hoʻāʻo i ka poʻe e noho lā ma ka honua.

¹¹ ‘E hele koke mai nō wau; e mālama ʻoe i kāu mea i loaʻa ai, o lawe aku auaneʻi kekahi i kou lei aliʻi.

¹² ‘ʻO ka mea lanakila, e hoʻolilo nō au iā ia i kia ma loko o ka luakini o koʻu Akua, ʻaʻole hoʻi ia e puka hou i waho. A e palapala wau ma luna ona i ka inoa o koʻu Akua, a me ka inoa o ke kūlanakauhale o koʻu Akua, ʻo Ierusalema hou, ʻo ka mea i iho mai mai loko mai o ka lani, mai koʻu Akua mai; a me koʻu inoa hou kekahi.

¹³ ‘ʻO ka mea pepeiao lā, e hoʻolohe mai ia i ka mea a ka ʻUhane e ʻōlelo nei i nā ʻekalesia.’

¹⁴ ¶ “E palapala aku ʻoe i ka ʻānela o ka ʻekalesia ma Laodikeia: Ke ʻī mai nei ka ʻĀmene, ka Hōʻike hoʻopono a me ka ʻoiaʻiʻo, ke Poʻo o nā mea a ke Akua i hana ai:

¹⁵ ‘Ua ʻike nō au i kāu hana ʻana, ʻaʻole ʻoe i anu, ʻaʻole hoʻi i wela. Ua makemake au iā ʻoe e anu, a i ʻole, e wela nō.

¹⁶ ‘Akā; no ka mea, ua pumahana wale nō ʻoe, ʻaʻole i anu, ʻaʻole hoʻi i wela; no laila e luaʻi aku auaneʻi au iā ʻoe, mai koʻu waha aku.

¹⁷ ‘No ka mea, ke ʻōlelo mai nei ʻoe, “Ua waiwai au, ua ahu ʻia kuʻu ukana, ʻaʻole oʻu wahi hemahema iki.” ‘ʻAʻole hoʻi ʻoe i ʻike, ua pōpilikia ʻoe, a ua pōʻino, a ua hune, a ua makapō a me ke kapa ʻole.

¹⁸ ‘Ke aʻo aku nei au iā ʻoe, e kūʻai me aʻu i ke gula i hoʻomaikaʻi ʻia i ke ahi, i waiwai ʻiʻo ʻoe; a i ʻaʻahu keʻokeʻo, i ʻaʻahu ʻia ʻoe, i ʻike ʻole ʻia mai ka hilahila o kou ʻōlohelohe ʻana; a i lāʻau mākole e hamo ai i kou mau maka, i ʻike ʻoe.

¹⁹ ‘ʻO nā mea aʻu i aloha ai, ʻo ia kaʻu i aʻo aku ai, a i paipai ai hoʻi. No ia mea, e hoʻoikaika, a e mihi hoʻi.

²⁰ ‘Aia hoʻi, ke kū nei au ma ka puka e kīkēkē ana; inā lohe kekahi i koʻu leo, a wehe i ka puka, e komo aku au i ona lā, a e ʻai pū au me ia, a ʻo ia pū me aʻu.

²¹ ‘ʻO ka mea lanakila, e hāʻawi nō au iā ia, e noho pū me aʻu ma koʻu noho aliʻi, me aʻu i lanakila ai, a ua noho pū me koʻu Makua ma kona noho aliʻi.

²² ‘ʻO ka mea pepeiao lā, e hoʻolohe mai ia i ka mea a ka ʻUhane e ʻōlelo nei i nā ʻekalesia.’”