KA HŌʻIKE ʻANA A IOANE KA HAIPULE 15 - Ka Baibala Hemolele

1 ʻEhiku ʻānela me nā ʻino ʻehiku.

MOKUNA XV.

¹ ¶ ʻIke akula au i kekahi hōʻailona hou ma ka lani, he nui a kupanaha loa, ʻehiku ʻānela me nā mea ʻino ʻehiku, hope loa; no ka mea, ma ia mau mea ua hoʻokō ʻia ko ke Akua inaina.

² ¶ A ʻike akula au, he mea ua like me ka moana aniani, i hui pū ʻia me ke ahi; a ʻo ka poʻe i lanakila ma luna o ka holoholona a me kona kiʻi, a me kona hōʻailona, a me ka heluna o kona inoa, e kū ana lākou ma luna o ka moana aniani, a iā lākou nā lira o ke Akua.

³ Mele maila lākou i ke mele a Mose, ke kauā a ke Akua a me ke mele a ke Keiki Hipa, e ʻōlelo ana, “He nui a he kupanaha loa kāu hana, E ka Haku, ke Akua Mana Loa; He pono a he ʻoiaʻiʻo kou mau ʻaoʻao, E ke Aliʻi o nā lāhui kanaka!

⁴ “ʻO wai ka mea e makaʻu ʻole iā ʻoe, e ka Haku, a e hoʻonani ʻole i kou inoa? No ka mea, ʻo ʻoe wale nō ka hemolele; «A e hele mai nō hoʻi ko nā ʻāina a pau, a e kukuli hoʻomaikaʻi i mua ou; No ka mea, ua maopopo ka pono o kou hoʻopaʻi ʻana».”

⁵ ¶ Ma hope o kēia mau mea, ʻike akula au, a ua wehe ʻia ka luakini o ka halelewa hōʻike, ma ka lani;

⁶ a puka maila nā ʻānela ʻehiku mai loko mai o ka luakini, me nā mea ʻino ʻehiku, ua ʻaʻahu ʻia i ka lole olonā aʻiaʻi keʻokeʻo, ua kāʻei ʻia ko lākou umauma i nā kāʻei gula.

⁷ Hāʻawi maila kekahi o nā mea ola ʻehā, na ka poʻe ʻānela ʻehiku i ʻehiku hue wai gula, ua piha i ka inaina o ke Akua, e ola mau ana ia ao aku ia ao aku.

⁸ Ua piha hoʻi ka luakini i ka uahi, mai ka nani mai o ke Akua a me ka mana ona; ʻaʻole i hiki i kekahi ke komo i loko o ka luakini, a pau i ka hoʻokō ʻia nā mea ʻino ʻehiku a kēlā poʻe ʻānela ʻehiku.