NĀ ʻŌLELO AKAMAI A SOLOMONA 9 - Ka Baibala Hemolele

MOKUNA IX.

¹ ¶ Kūkulu aʻela ka naʻauao i kona hale, Kālai ihola ʻo ia i kona mau kia ʻehiku.

² Kālua ʻo ia i kāna mau mea momona; Kāwili aʻela ʻo ia i kona waina; Hoʻomākaukau nō i kāna papa ʻaina.

³ Hoʻouna akula ʻo ia i kāna poʻe kauā wahine, E hea aku ma luna o nā wahi kiʻekiʻe o ke kūlanakauhale,

⁴ “ʻO wai ka mea naʻaupō? E huli mai ia i oʻu nei!” I ka mea noʻonoʻo ʻole hoʻi, ʻōlelo aʻela ʻo ia iā ia,

⁵ “Inā, e ʻai mai ʻoukou i kaʻu berena, E inu hoʻi i ka waina aʻu i kāwili ai.

⁶ “E haʻalele i ka poʻe manaʻo ʻole, i ola ʻoukou, E hele hoʻi ma ke ala o ka naʻauao.”

⁷ ¶ ʻO ka mea e aʻo aku i ke kanaka ʻaiā, E loaʻa iā ia ka hilahila; ʻO ka mea e aʻo aku i ka mea hewa, e loaʻa iā ia ka palaheʻa.

⁸ Mai aʻo aku i ke kanaka ʻaiā, O hoʻowahāwahā mai ʻo ia iā ʻoe; E aʻo aku i ka mea naʻauao, A e aloha mai ʻo ia iā ʻoe.

⁹ E hāʻawi na ka mea naʻauao, A e ʻoi mau ka naʻauao; E aʻo hoʻi i ka mea hoʻopono, A e māhuahua aʻela kona ʻike.

¹⁰ ʻO ka mole o ka naʻauao, ʻO ia ka makaʻu iā Iēhova; ʻO ka ʻike i ka Mea Hemolele, ʻO ia ka noʻonoʻo ʻana.

¹¹ No ka mea, ma oʻu nei, e māhuahua aʻe ai kou mau lā, A e nui ai hoʻi nā makahiki o kou ola ʻana.

¹² Inā e naʻauao ʻoe, e naʻauao nō ʻoe nou iho; Inā e hoʻowahāwahā ʻoe, ma luna ou wale nō ia mea.

¹³ ¶ ʻO ka wahine naʻaupō, he walaʻau kona; Ua manaʻo ʻole, ʻaʻole ʻo ia i ʻike i kekahi mea.

¹⁴ Noho nō ʻo ia ma ka puka o kona hale, Ma ka noho hoʻi ma kahi kiʻekiʻe o ke kūlanakauhale,

¹⁵ E hea aku i ka poʻe hele ma ke ala, Ka poʻe hele pololei ma ke alanui;

¹⁶ “ʻO wai ka mea manaʻo ʻole? E huli mai i oʻu nei”; I ka mea naʻaupō, ʻōlelo akula ʻo ia iā ia,

¹⁷ “Ua ʻono nō nā wai i ʻaihue ʻia, Ua mānanalo hoʻi ka berena ke ʻai malū.”

¹⁸ ʻAʻole naʻe i ʻike kēlā, ma laila ka poʻe make, Aia kona poʻe hoa ʻai i lalo loa i ka malu make.