NĀ ʻŌLELO AKAMAI A SOLOMONA 8 - Ka Baibala Hemolele

MOKUNA VIII.

¹ ¶ ʻAʻole anei i hea mai ka naʻauao? ʻAʻole anei i pane mai ka ʻike i kona leo?

² Ma luna o nā wahi kiʻekiʻe, ma ke ala, Ma kahi o nā alanui, kū aʻela ʻo ia.

³ Ma nā ʻīpuka, ma ke alo o ke kūlanakauhale, Ma nā wahi e komo ai, kāhea maila ʻo ia:

⁴ “Ke hea aku nei au iā ʻoukou, e nā kānaka; ʻO koʻu leo hoʻi i nā keiki a kānaka.

⁵ “E nā mea ʻike ʻole, e ʻike ʻoukou i ke akamai; E hoʻonaʻauao hoʻi ʻoukou, e ka poʻe naʻaupō.

⁶ “E hoʻolohe mai; no ka mea, e haʻi ana au i nā mea maikaʻi; ʻO ka ʻoaka ʻana hoʻi o koʻu mau lehelehe ma nā mea pono ia,

⁷ “No ka mea, e hōʻike mai kuʻu waha i ka ʻoiaʻiʻo; He mea hoʻopailua ka hewa i koʻu mau lehelehe.

⁸ “Ma ka pono nā ʻōlelo a pau a koʻu waha; ʻAʻole wahaheʻe, ʻaʻohe mea kekeʻe ma laila.

⁹ “Pau loa nō ia i ka pololei i ka mea naʻauao, Ua kūpono hoʻi i ka poʻe i loaʻa ka ʻike.

¹⁰ “E koho ʻoukou i ke aʻo ʻia mai, ʻaʻole ke kālā, A me ka ʻike hoʻi ma mua o ke gula maikaʻi.

¹¹ “No ka mea, ua maikaʻi ka naʻauao ma mua o nā momi; A ʻo nā mea i makemake ʻia a pau, ʻaʻole i like me ia,

¹² ¶ “ʻO wau hoʻi, ʻo ka naʻauao, ke pili nei i ke akamai, Ua loaʻa iaʻu ka ʻike i nā mea e naʻauao ai.

¹³ “ʻO ka makaʻu iā Iēhova, ʻo ia ke inaina aku i ka hewa; ʻO ka haʻaheo, ʻo ka hoʻokiʻekiʻe, ʻo ka ʻaoʻao ʻino, ʻO ka waha ʻaʻaka, ʻo ia kaʻu i hoʻowahāwahā aku ai.

¹⁴ “Iaʻu ka ʻike a me ke akamai; ʻO wau nō ka noʻonoʻo, iaʻu hoʻi ka ikaika.

¹⁵ “Ma oʻu nei nō e noho aliʻi ai nā aliʻi, A e kau aku ai nō hoʻi nā kaukaualiʻi i ke kānāwai pono.

¹⁶ “Ma oʻu nei nō hoʻi e hoʻomalu ai nā kiaʻāina, A me nā aliʻi, a me nā luna kānāwai a pau o ka honua.

¹⁷ “He aloha koʻu i ka poʻe e aloha mai iaʻu; ʻO ka poʻe ʻimi pono mai, ʻo lākou ke loaʻa iaʻu.

¹⁸ “Me aʻu ka waiwai a me ka hanohano; ʻO ka waiwai e mau ana hoʻi a me ka pono.

¹⁹ “Ua maikaʻi koʻu hua ma mua o ke gula a me ke gula maikaʻi; He mea koho ʻia hoʻi ka waiwai ma oʻu nei ma mua o ke kālā.

²⁰ “Ma ke ala o ka pono kaʻu e alakaʻi ai, Ma waena hoʻi o nā alanui o ka hoʻopono;

²¹ “I hoʻoili au i ka waiwai no ka poʻe aloha mai iaʻu, A e hoʻopiha au i ko lākou waihona waiwai.

²² ¶ “Na Iēhova nō wau i kinohou o kona noho ʻana, Ma mua o kāna hana ʻana i ka wā kahiko.

²³ “Mai ka pō mai ua hoʻonoho ʻia au, Mai kinohi mai, ma mua hoʻi o ka honua.

²⁴ “I ka wā i ʻole ai nā wahi hohonu, ua hānau nō au, I ka wā i ʻole ai nā pūnāwai i piha i ka wai.

²⁵ “Ma mua o ka hoʻonoho ʻana i nā mauna, Ma mua o nā kuahiwi ua hānau au;

²⁶ “ʻAʻole hoʻi ʻo ia i hana i ka honua a me nā kula, A me kahi huna lepo iki o ka honua.

²⁷ “I kona hohola ʻana i ka lani, ʻo wau nō kekahi ma laila, I kona kau ʻana i ke kānāwai ma luna o ka hohonu;

²⁸ “I kona hoʻolewalewa ʻana i nā ao ma luna, I kona hoʻonoho ʻana i nā pūnāwai o ka hohonu;

²⁹ “I kona kau ʻana i ke kānāwai no ka moana, I ʻole e hū wale aku nā kai ma mua ona; I kona hoʻokumupaʻa ʻana i ka honua;

³⁰ “A laila, ʻo wau pū kekahi me ia me he keiki hiwahiwa lā; ʻO kona ʻoliʻoli nō au i kēlā lā i kēia lā, E hauʻoli mau ana hoʻi i mua o kona alo;

³¹ “E hauʻoli ana i nā wahi i noho ai nā kānaka o ka honua ona; ʻO koʻu ʻoliʻoli nui hoʻi, aia me nā keiki a kānaka.

³² ¶ “ʻĀnō lā, e nā keiki, e hoʻolohe mai iaʻu; Pōmaikaʻi ka poʻe i mālama mai i koʻu ʻaoʻao.

³³ “E hoʻolohe mai i ke aʻo ʻana a e hoʻomanaʻo iho, Mai pale aʻe ʻoukou.

³⁴ “Pōmaikaʻi ke kanaka ke lohe mai i kaʻu, He kiaʻi hoʻi ʻo ia, i koʻu mau puka i kēlā lā i kēia lā, Ke kakali hoʻi ʻo ia ma nā kia o koʻu mau puka.

³⁵ “No ka mea, ʻo ka mea oʻu i loaʻa ai, ua loaʻa iā ia ke ola, E loaʻa hoʻi iā ia ka lokomaikaʻi ʻia mai e Iēhova.

³⁶ “Akā, ʻo ka mea i hana ʻino mai iaʻu, ua pepehi ʻo ia i kona ʻuhane iho; ʻO ka poʻe inaina mai iaʻu ʻo ia kai koho i ka make.”