NĀ ʻŌLELO AKAMAI A SOLOMONA 7 - Ka Baibala Hemolele

MOKUNA VII.

¹ ¶ E kuʻu keiki ē, e mālama ʻoe i kaʻu mau ʻōlelo, E waiho pū hoʻi i kaʻu kauoha me ʻoe.

² E mālama ʻoe i kaʻu kauoha i ola ʻoe, A me koʻu kānāwai hoʻi, e like me ke kiʻi ʻōnohi o kou mau maka.

³ E hāwele ʻoe ia mau mea ma kou mau manamana lima, E kākau hoʻi ia mau mea ma ka papa o kou naʻau.

⁴ E ʻī aʻe ʻoe i ka naʻauao, “ʻO ʻoe nō koʻu kaikuahine”; E kapa aku ʻoe i ka ʻike, he hoalauna;

⁵ I mālama ʻia ʻoe i ka wahine ʻē, I ka malihini hoʻi i hoʻomalimali mai me kāna ʻōlelo.

⁶ ¶ No ka mea, ma ka puka o koʻu hale, Ma koʻu puka makani, nānā akula au;

⁷ ʻIke ihola au i waena o ka poʻe noʻonoʻo ʻole, ʻIke ihola hoʻi au ma waena o ka poʻe ʻōpiopio, I kekahi kanaka uʻi manaʻo ʻole.

⁸ Hele aʻela ia ma ke ala e kokoke ana i kona huina, Hele aʻela ʻo ia ma ke kuamoʻo e hiki aku ai i kona hale;

⁹ I ke ahiahi, i ka napoʻo ʻana o ka lā, I ke aumoe, i ka pōʻeleʻele;

¹⁰ Aia hoʻi, hālāwai pū me ia kekahi wahine, Ua kāhiko hoʻokamakama ʻia; Ua maʻalea kona naʻau.

¹¹ (He walaʻau kona a me ka hoʻolohe ʻole, ʻAʻole noho kona mau wāwae ma kona hale iho.

¹² I kekahi wā ma waho ʻo ia, I kekahi wā aʻe ma ke alanui, A hoʻohālua ʻo ia ma nā huina a pau.)

¹³ ʻApo ihola kēlā iā ia a honi ihola, Me ka maka hilahila ʻole, ʻī akula iā ia,

¹⁴ “He mau mōhai aloha koʻu; I kēia lā nō, mōhai akula au i kaʻu mea i hoʻohiki ai.

¹⁵ “No laila, i hele mai nei au e hālāwai me ʻoe, E ʻimi hoʻi iā ʻoe, a ua loaʻa iho nei.

¹⁶ “Hohola ihola au i koʻu wahi moe me ke kapa, Me ke kapa ʻōniʻoniʻo hoʻi mai ʻAigupita mai.

¹⁷ “Kōpīpī ihola au i koʻu wahi moe I ka mura, a me ka ʻaloe, a me ke kinamona.

¹⁸ “Inā kāua i māʻona i ke aloha a hiki i kakahiaka, E leʻaleʻa kāua i ke aloha.

¹⁹ “No ka mea, ʻo ke kāne, ʻaʻole ia ma kona hale, Ua hele ʻo ia ma kahi lōʻihi ʻē aku.

²⁰ “Lawe ʻo ia i ka ʻeke kālā ma kona lima, A piha ka mahina, a laila, e hoʻi mai ʻo ia i kona hale.”

²¹ Ua paʻa kēlā i ka nui o kāna ʻōlelo maʻalea; Ua lilo hoʻi ʻo ia i ka malimali ʻana o kona mau lehelehe.

²² Ukali koke ʻo ia ma hope ona, E like me ka hele ʻana o ka bipi i kona wahi e make ai; E like hoʻi me ka naʻaupō i hoʻopaʻi ʻia mai ma ka lāʻau kūpeʻe;

²³ A ʻō akula ka pua i kona ake, E like me ka lele ʻana o ka manu i ke pahele, ʻAʻole ona ʻike no kona ola ia.

²⁴ ¶ ʻĀnō lā, e nā keiki, e hoʻolohe mai iaʻu, E maliu mai ʻoukou i ka ʻōlelo a koʻu waha.

²⁵ Mai huli aʻe kou naʻau ma kona ʻaoʻao; Mai hele hewa ʻoe ma kona alanui.

²⁶ No ka mea, manomano ka poʻe i hina iā ia me ka ʻeha, Nā mea ikaika hoʻi, ua pau iā ia i ka make.

²⁷ Ma kona hale ke ala e hiki ai i ka pō, E iho ana i lalo i ka make.