NĀ ʻŌLELO AKAMAI A SOLOMONA 6 - Ka Baibala Hemolele

MOKUNA VI.

¹ ¶ E kuʻu keiki, inā e hoʻohiki ʻoe e pānaʻi no kou hoalauna, Inā i paʻi kou lima me ka malihini,

² A i puni ʻoe i ka ʻōlelo a kou waha, A i punihei ʻoe i ka ʻōlelo a kou waha.

³ ʻĀnō lā, e kuʻu keiki, e hana ʻoe i kēia, i pakele, I kou lilo ʻana i ka lima o kou hoalauna; Ō hele, e hoʻohaʻahaʻa iā ʻoe iho, e hoʻolauleʻa i kou hoalauna.

⁴ Mai hāʻawi i ka hiamoe i kou mau maka, ʻAʻole hoʻi e pipili kou mau lihilihi;

⁵ E hemo aku ʻoe me he dia lā mai loko aʻe o ka lima, A e like hoʻi me ka manu mai ka lima aʻe o ke kūhea manu.

⁶ ¶ E ka mea hiamoe, e hele ʻoe i ka ʻanonanona, E nānā i kona ʻaoʻao a e hoʻonaʻauao iho

⁷ ʻAʻohe aliʻi iā ia, ʻAʻole haku, ʻaʻole hoʻi luna kānāwai;

⁸ Hoʻāhu nō ʻo ia i kāna ʻai i ke kau, I ka wā e ʻohi ai, hōʻiliʻili ʻo ia i kāna mea ʻai.

⁹ E ka mea hiamoe, pehea ka lōʻihi o kou hiamoe ʻana? Āhea lā ʻoe e ala mai ai mai kou hiamoe ʻana mai?

¹⁰ “He moe iki aʻe, he hiamoe iki aʻe, He pelu hou iki aʻe i ka lima a hiamoe”;

¹¹ A e hiki mai kou ʻilihune me he kanaka hele lā, A me kou nele e like me ke kanaka kaua.

¹² ¶ ʻO ke kanaka ʻaiā, ʻo ke kanaka hewa, Hele nō ʻo ia me ka waha hoʻopunipuni.

¹³ ʻIʻimo ʻo ia me ka maka, aʻo aku ʻo ia me ka wāwae, Kuhikuhi ʻo ia me kona manamana lima;

¹⁴ He kolohe nō ma kona naʻau, Noʻonoʻo ʻino ʻo ia i nā lā a pau, Hoʻokonokono ʻo ia i ka hakakā.

¹⁵ No laila, e loʻohia koke mai ʻo ia e ka make; E haʻihaʻi koke ʻia ʻo ia, ʻaʻole mea nāna e hoʻōla.

¹⁶ ¶ ʻO kēia mau mea ʻeono, he mau mea e inaina mai ai ʻo Iēhova; ʻEhiku hoʻi e hoʻopailua ai ʻo kona naʻau.

¹⁷ ʻO nā maka kiʻekiʻe, ʻo ke elelo wahaheʻe, A me nā lima hoʻokahe koko hala ʻole,

¹⁸ ʻO ka naʻau e ʻimi ana i nā manaʻo kolohe, A me nā wāwae e holo kikī ana i ka hewa,

¹⁹ ʻO ka mea hōʻike hoʻopunipuni e hana ana i ka wahaheʻe, A me ka mea hoʻokonokono i ka hakakā ma waena o nā hoahānau.

²⁰ ¶ E kuʻu keiki, e mālama ʻoe i ke kauoha a kou makua kāne, Mai haʻalele hoʻi i ke kānāwai o kou makuahine.

²¹ E hāwele mau ʻoe i mau mea ma kou naʻau, E nākiʻi ʻoe ia mau mea ma kou ʻāʻī.

²² I kou hele ʻana, ʻeā, e kaʻi aku ia iā ʻoe; I kou moe ʻana e kiaʻi ʻo ia ma luna ou; I kou ala ʻana i luna, ʻo ia ke kamaʻilio pū me ʻoe.

²³ No ka mea, he kukui ke kauoha, He mālamalama ke kānāwai, ʻO ka ʻaoʻao o ke ola ʻo ia ke aʻo ʻana e naʻauao ai;

²⁴ I mālama ʻia ʻoe i ka wahine ʻino, I ka malihini i hoʻomalimali me kona elelo.

²⁵ Mai kuko aku i kona maikaʻi ma loko o kou naʻau, ʻAʻole hoʻi e punihei ʻia e kona mau lihilihi.

²⁶ No ka mea, no ka wahine hoʻokamakama, E nele ke kanaka a i ka ʻāpana ʻai; Hoʻohālua nō ka wahine moekolohe i ka ʻuhane i minamina ʻia.

²⁷ E lawe anei ke kanaka i ke ahi ma kona poli, ʻAʻole hoʻi e wela kona kapa?

²⁸ Inā e hele ke kanaka ma nā nānahu e ʻaʻā ana, ʻAʻole anei e wela kona kapuaʻi?

²⁹ Pēlā ka mea e komo aʻe ana i ka wahine a kona hoalauna; ʻAʻole e ʻāpono ʻia nā mea hoʻopā iā ia.

³⁰ ʻAʻole i hoʻowahāwahā ʻia ka ʻaihue i kona ʻaihue ʻana, Inā he mea ia e māʻona ai kona pōloli.

³¹ Akā, i loaʻa ʻo ia, e uku pāhiku nō, E hāʻawi ʻo ia i ka waiwai a pau o kona hale.

³² ʻO ka mea moekolohe me ka wahine, ʻaʻole ona naʻauao; ʻO ka make o kona ʻuhane kāna i hana ai.

³³ E loaʻa iā ia ka ʻeha a me ka hoʻowahāwahā ʻia mai. ʻAʻole hoʻi e holoi ʻia kona mea e hilahila ai.

³⁴ No ka mea, ʻo ka lili, ʻo ia ko ke kanaka mea e ukiuki ai; ʻAʻole ʻo ia e hoʻopakele i kona lā e hoʻopaʻi aku ai.

³⁵ ʻAʻole ʻo ia e manaʻo mai i ka uku; ʻAʻole hoʻi ʻo ia e ʻoluʻolu, ke hāʻawi mai ʻoe i nā makana he nui.