NĀ ʻŌLELO AKAMAI A SOLOMONA 5 - Ka Baibala Hemolele

MOKUNA V.

¹ ¶ E kuʻu keiki, e hoʻolohe mai i koʻu naʻauao, E hāliu mai hoʻi kou pepeiao i koʻu ʻike;

² I mālama ʻoe i ke aʻo ʻia mai, E hoʻopaʻa hoʻi kou mau lehelehe i ka ʻike.

³ No ka mea, ʻo nā lehelehe o ka wahine hoʻokamakama he meli ia e kulu ana, A ua ʻoi aku ka paheʻe o kona waha i ko ka ʻaila.

⁴ Akā, ua ʻawahia kona hope, e like me ka lāʻau ʻawaʻawa, ʻOiʻoi hoʻi e like me ka pahi kaua ʻoi lua.

⁵ Ke iho ihola kona mau wāwae i ka make, E pili ana hoʻi kona mau kapuaʻi i ka lua.

⁶ I ʻole ʻoe e noʻonoʻo i ke ala o ke ola, He loli wale kona noho ʻana i ʻole ʻoe e ʻike aku.

⁷ ¶ ʻĀnō lā, e nā keiki, hoʻolohe mai iaʻu, Mai hāliu aʻe mai ka ʻōlelo aku a kuʻu waha.

⁸ E hoʻoneʻeneʻe loa aku i kou hele ʻana mai ona aku, Mai hoʻokokoke aku ʻoe i ka puka o kona hale;

⁹ O hāʻawi ʻoe i kou nani i nā mea ʻē, A me kou mau makahiki hoʻi i ka mea aloha ʻole;

¹⁰ O lako hoʻi nā mea ʻē i kou mau mea maikaʻi; A me nā hale o ka malihini i kāu waiwai;

¹¹ A uē ʻoe i kou hope, I ka pau ʻana o kou ʻiʻo a me kou kino;

¹² A e ʻōlelo hoʻi, “Auē koʻu inaina aku i ka ʻike! A me ka hoʻowahāwahā ʻana o koʻu naʻau i ke aʻo ʻia mai!

¹³ “ʻAʻole au i hoʻolohe i ka leo o kaʻu mau kumu, ʻAʻole hoʻi i hāliu aku koʻu pepeiao i ka poʻe i aʻo mai iaʻu!

¹⁴ “Mai noho au ma nā hewa a pau loa, Ma waena o ke anaina a me ka ʻaha kanaka.”

¹⁵ ¶ E inu ʻoe i ka wai no loko aʻe o kou pūnāwai, A i nā waikahe hoʻi no loko aʻe o kou kahawai.

¹⁶ E hū aku i waho kou mau loko wai, A kahe nā ʻauwai ma nā alanui.

¹⁷ Nāu wale iho nō lākou, ʻAʻole na ka poʻe malihini pū me ʻoe.

¹⁸ E hoʻomaikaʻi ʻia kou pūnāwai; A e ʻoliʻoli ʻoe me ka wahine o kou wā uʻi.

¹⁹ He dia aloha ia a me ka ʻibeka ʻoluʻolu; E māʻona ʻoe i nā lā a pau i kona mau waiū, E ana mau ʻoe i kona aloha.

²⁰ No ke aha lā e ʻona ʻoe, e kuʻu keiki, i ka wahine ʻē, A e ʻapo ʻoe i ka wahine a haʻi ma kou umauma?

²¹ No ka mea, e kau pono ana nā maka o Iēhova i ka ʻaoʻao o ke kanaka, E ʻike ana nō hoʻi i kona mau ʻaoʻao a pau.

²² E puni ka mea hewa i kona hala iho, E hei ʻia hoʻi ʻo ia i ka hei o kona hewa iho.

²³ E make ʻo ia me ke aʻo ʻole ʻia mai; A e hele hewa ʻo ia i ka nui o kona naʻaupō ʻana.