NĀ ʻŌLELO AKAMAI A SOLOMONA 4 - Ka Baibala Hemolele

MOKUNA IV.

¹ ¶ E hoʻolohe mai, e nā keiki, i ke aʻo ʻana a ka makua, E hāliu mai hoʻi e ʻike i ka naʻauao.

² No ka mea, he ʻike pono kaʻu e hāʻawi aku nei iā ʻoukou, Mai haʻalele ʻoukou i koʻu kānāwai.

³ No ka mea, he keiki nō wau a koʻu makua, He mālama ʻia, a he hānau kahi i mua o koʻu makuahine.

⁴ Aʻo maila ʻo ia, ʻī maila iaʻu, “E hoʻopaʻa kou naʻau i kaʻu ʻōlelo; E mālama hoʻi i kaʻu mau kauoha i ola ʻoe.

⁵ “E ʻimi i ka naʻauao, e ʻimi hoʻi i ka ʻike a loaʻa! Mai hoʻopoina, mai waiho wale i nā ʻōlelo a koʻu waha.

⁶ “Mai haʻalele ʻoe ia mea, a nāna ʻoe e mālama mai; E aloha ʻoe iā ia, a nāna ʻoe e kiaʻi mai.

⁷ “ʻO ka naʻauao ka mea nui, e ʻimi i ka naʻauao a loaʻa; Me nā mea a pau āu e ʻimi ai, E ʻimi pū i ka ʻike a loaʻa.

⁸ “E hoʻonani ʻoe iā ia, nāna ʻoe e hoʻokiʻekiʻe aʻe; E hoʻohanohano iā ʻoe i kou wā e hoʻopaʻa aku ai iā ia.

⁹ “E hāʻawi mai ia i lei aloha no kou poʻo; He lei hanohano hoʻi kāna e hāʻawi mai ai iā ʻoe.”

¹⁰ ¶ E hoʻolohe mai, e kuʻu keiki, e hoʻopaʻa i kaʻu ʻōlelo; A e nui aʻe hoʻi iā ʻoe nā makahiki o kou ola ʻana.

¹¹ E aʻo aku au iā ʻoe ma ka ʻaoʻao naʻauao, E kuhikuhi hoʻi au iā ʻoe ma ke ala pololei.

¹² I kou hele ʻana, ʻaʻole e hihia kou kapuaʻi; A inā e holo ʻoe ʻaʻole e hina.

¹³ E hoʻopaʻa ʻoe i ke aʻo ʻia mai, mai hoʻokuʻu ʻoe; E mālama ʻoe iā ia; no ka mea, he ola ia nou.

¹⁴ Ma ke alanui o ka poʻe hewa, mai hele ʻoe, Mai hele hoʻi ma ka ʻaoʻao o ka poʻe hewa.

¹⁵ E haʻalele ia wahi, mai māʻalo i laila, E huli aʻe mai ia wahi mai, a e hele aku.

¹⁶ No ka mea, ʻaʻole o lākou hiamoe, ke hana hewa ʻole aku; Ua lele hoʻi ka hiamoe, ke hoʻohina ʻole ʻia kekahi e lākou.

¹⁷ No ka mea, ʻai lākou i ka berena no ka hewa, Inu hoʻi lākou i ka waina no ke kāʻili wale.

¹⁸ Akā, ʻo ke ala o ka poʻe pono, ua like ia me ka mālamalama e ʻaʻā ana, E māhuahua mau ana i ke awakea loa.

¹⁹ ʻO ka ʻaoʻao o ka poʻe hewa, ua like ia me ka pouli; ʻAʻole i ʻike i ko lākou mea e hina ai.

²⁰ ¶ E kuʻu keiki ē, e hāliu mai i kaʻu ʻōlelo, I kaʻu ʻōlelo hoʻi e huli mai ai i ka pepeiao.

²¹ Mai noho a nalowale ia mai kou mau maka aku; E mālama ʻoe ia i loko o kou naʻau.

²² No ka mea, he ola ia no nā mea i loaʻa ai ia, He lāʻau hoʻōla hoʻi no ke kino a pau.

²³ E kiaʻi ʻoe i kou naʻau me ka mālama loa; No ka mea, no loko o laila ka wai puna o ke ola.

²⁴ E waiho aku ʻoe i ka waha wahaheʻe wale, E haʻalele loa hoʻi i nā lehelehe hoʻopunipuni.

²⁵ I nānā pono aʻe kou mau maka, I pololei hoʻi kou mau lihilihi ma mua ou.

²⁶ E hoʻopololei aʻe i ke ala no kou mau kapuaʻi, A e pololei hoʻi kou hele ʻana a pau.

²⁷ Mai huli aʻe ʻoe i ka lima ʻākau ʻaʻole hoʻi i ka lima hema; E huli naʻe kou wāwae mai ka hewa aku.