NĀ ʻŌLELO AKAMAI A SOLOMONA 31 - Ka Baibala Hemolele

MOKUNA XXXI.

¹ ¶ Nā ʻōlelo a Lemuʻela ke aliʻi, ka wānana a kona makuahine i aʻo mai ai iā ia.

² ¶ He aha, e kaʻu keiki? He aha, e ke keiki a koʻu ʻōpū? He aha hoʻi, e ke keiki no koʻu hoʻohiki ʻana?

³ Mai hāʻawi aku i kou ikaika i nā wāhine, ʻAʻole hoʻi i kou ʻaoʻao i ka mea e make ai nā aliʻi.

⁴ ʻAʻole na nā aliʻi, e Lemuʻela ē, ʻAʻole na nā aliʻi e inu i ka waina, ʻAʻole hoʻi na ka poʻe ʻaialo e inu i ka mea ikaika;

⁵ O inu lākou a hoʻopoina i ke kānāwai, A kāpae i ka pono o ka poʻe pilikia.

⁶ E hāʻawi i ka mea ikaika i ka mea e make ana. A i ka waina hoʻi i ka poʻe i kaumaha ka naʻau.

⁷ E inu iho ʻo ia a e hoʻopoina i kona ʻilihune, ʻAʻole hoʻi e hoʻomanaʻo hou aʻe i kona mea kaumaha.

⁸ E ʻoaka ʻoe i kou waha no ka mea kuli, No ka hoʻopono i nā keiki makua ʻole a pau.

⁹ E ʻoaka ʻoe i kou waha, e hoʻoponopono ma ka pololei, E ʻimi hoʻi i ka pono no ka poʻe ʻilihune a me ka mea nele.

¹⁰ ¶ ʻO wai ka mea i loaʻa iā ia ka wahine noho pono? He waiwai ʻo ia i ʻoi aku i ko nā momi.

¹¹ Paulele iā ia ka naʻau o kāna kāne, ʻAʻole e nele ʻo ia i ka loaʻa ʻole.

¹² He maikaʻi nō kāna e hana ai iā ia ʻaʻole hoʻi he hewa, I nā lā a pau loa o kona ola ʻana.

¹³ ʻImi ʻo ia i ka hulu hipa a me ke olonā, ʻOluʻolu ʻo ia i ka hana me kona mau lima.

¹⁴ Ua like nō ia me nā moku kālepa, Mai kahi lōʻihi ʻē mai i loaʻa ai iā ia kāna ʻai.

¹⁵ I ka wanaʻao, ala ʻo ia a hāʻawi i ka ʻai na ko kona hale, A me ka mea e māʻona ai na kāna poʻe kauā wahine.

¹⁶ Noʻonoʻo ʻo ia i ka mahina ʻai a kūʻai lilo mai; Me ka hua o kona mau lima, kanu iho nō ʻo ia i ka māla waina.

¹⁷ Kāʻei ʻo ia i kona pūhaka me ka ikaika, Hoʻoikaika hoʻi ʻo ia i kona mau lima.

¹⁸ Hoʻāʻo ʻo ia i kona waiwai i maikaʻi ia; ʻAʻole i pio kona kukui i ka pō.

¹⁹ ʻŌ aku kona mau lima ma kahi e kau ai ke olonā, Lālau kona mau lima i ka mea milo lope.

²⁰ ʻŌ aku ʻo ia i kona mau lima i ka poʻe nele; Kīkoʻo ʻo ia i kona mau lima i ka poʻe ʻilihune.

²¹ ʻAʻole ona makaʻu e anu ko kona hale; No ka mea, pau ko kona hale i ke komo kapa ʻulaʻula.

²² Hana ʻo ia i nā kapa hoʻāliʻi nona iho; ʻO ke kilika a me ka mea ʻulaʻula, ʻo ia kona kāhiko ʻana.

²³ Ua ʻike ʻia kāna kāne ma nā ʻīpuka, I kona noho pū ʻana me nā lunakahiko o ka ʻāina.

²⁴ Hana ʻo ia i ka lole olonā maikaʻi, a kūʻai aku; Hāʻawi ʻo ia i nā kāʻei i ka poʻe kālepa.

²⁵ ʻO ka ikaika, a ʻo ka hanohano, ʻo ia kona kāhiko ʻana; E hauʻoli ʻo ia i ka manawa ma hope aku.

²⁶ ʻOaka ʻo ia i kona waha ma ka naʻauao; A ʻo ke aloha ʻo ia ke kānāwai o kona alelo.

²⁷ Kiaʻi ʻo ia i ka hele ʻana o ko kona hale, A ʻo ka ʻai no ka palaualelo, ʻaʻole ʻo ia e ʻai iho.

²⁸ Kū aʻe kāna mau keiki a hoʻomaikaʻi iā ia; ʻO kāna kāne hoʻi, mahalo ʻo ia iā ia.

²⁹ “Nui nā kaikamāhine i hana pono, A ua ʻoi aku ʻoe ma mua o lākou a pau.”

³⁰ He hoʻopunipuni ke aloha ʻia mai, he mea ʻole ka maka maikaʻi; ʻO ka wahine hoʻi i makaʻu iā Iēhova, ʻo ia ke hiʻilani ʻia.

³¹ E hāʻawi aku nāna i ka hua o kona mau lima; ʻO kāna mau hana, ʻo ia ke hiʻilani iā ia ma nā ʻīpuka.