NĀ ʻŌLELO AKAMAI A SOLOMONA 30 - Ka Baibala Hemolele

MOKUNA XXX.

¹ ¶ He mau wahi ʻōlelo a ʻAgura ke keiki a Iake. He wānana; na ke kanaka i hōʻike mai iā ʻItiʻela; iā ʻItiʻela lāua me ʻUkala.

² ʻO wau ka mea hūpō loa o nā kānaka, ʻAʻole oʻu wahi noʻonoʻo kanaka.

³ ʻAʻole i loaʻa iaʻu ka naʻauao, ʻAʻole hoʻi oʻu ʻike i ka Mea Hemolele.

⁴ ʻO wai ka mea i piʻi aʻe i ka lani, a i iho mai hoʻi? ʻO wai ka mea i hoʻoʻiliʻili i ka makani ma kona lima? ʻO wai ka mea i hoʻopaʻa i nā wai ma kona ʻaʻahu? ʻO wai ka mea i hoʻonoho i nā welelau a pau o ka honua? ʻO wai hoʻi kona inoa, ʻo wai ka inoa o kāna keiki? E hōʻike mai paha ʻoe.

⁵ ¶ Pau loa nā hua ʻōlelo a ke Akua i ka maʻemaʻe; ʻO ia ka pale kaua i ka poʻe paulele aku iā ia.

⁶ Mai hui aʻe ʻoe i kekahi mea me kāna mau hua ʻōlelo, O aʻo mai ʻo ia iā ʻoe, a e lilo ʻoe i mea wahaheʻe.

⁷ ¶ ʻElua mau mea aʻu i noi aku ai iā ʻoe, Mai ʻauʻa ʻoe ma mua o koʻu make ʻana.

⁸ ʻO ka lapuwale, a ʻo ka wahaheʻe, E hoʻokaʻawale aʻe mai oʻu aku nei; Mai hāʻawi mai iaʻu i ka ʻilihune, ʻaʻole hoʻi i ka waiwai; E hānai mai iaʻu i ka ʻai kūpono noʻu;

⁹ O hoʻokūkū ʻai au, a hōʻole aku hoʻi, Me ka ʻī ʻana, “ʻO wai lā ʻo Iēhova?” O ʻilihune hoʻi au a ʻaihue iho, A hoʻohiki ʻino i ka inoa o koʻu Akua.

¹⁰ ¶ Mai hoʻopiʻi ʻoe i ke kauā i mua o kona haku, O hoʻoʻino mai ʻo ia iā ʻoe, a e lilo ʻoe i lawehala.

¹¹ ¶ ʻO kekahi hanauna, hōʻino nō i ka makua kāne, ʻAʻole hoʻi i hoʻomaikaʻi i ka makuahine.

¹² ʻO kekahi hanauna hoʻi, he maʻemaʻe ia i ko lākou maka iho, ʻAʻole hoʻi i holoi ʻia ka paumāʻele.

¹³ ʻO kekahi hanauna, hoʻokano loa nā maka o lākou! Hoʻokiʻekiʻe hoʻi nā lihilihi o lākou.

¹⁴ ʻO kekahi hanauna, he mau pahi kaua ko lākou niho, He mau pahi hoʻi ko lākou mau kuʻi. E ʻai ana i ka poʻe ʻilihune mai ka honua aku, A ʻo ka poʻe nele hoʻi i waena o nā kānaka.

¹⁵ ¶ He mau kaikamāhine ʻelua kā ka omo koko, E ʻī ana, “E ʻHōmai,’ e ʻHōmai,’ ʻeā.” ʻEkolu nō mea piha ʻole, ʻEhā hoʻi, ʻaʻole e ʻōlelo mai, “Ua ana!”

¹⁶ ʻO ka lua, ʻo ka ʻōpū pā; A ʻo ka honua i mauʻu ʻole i ka wai; A ʻo ke ahi, ʻaʻole āna ʻōlelo mai, “Ua nui!”

¹⁷ ʻO ka maka i hoʻowahāwahā i kona makua kāne, A hōʻole hoʻi ʻaʻole e mālama i kona makuahine, E kiko iho ka poʻe koraka o ke awāwa ia mea, A e ʻai iho nō ka poʻe ʻaeto ʻōpiopio.

¹⁸ ¶ ʻEkolu mau mea kupanaha loa iaʻu, ʻEhā hoʻi, ʻaʻole au i ʻike iho.

¹⁹ ʻO ka ʻaoʻao o ka ʻaeto ma ka lewa; ʻO ka ʻaoʻao o ka nahesa ma luna o ka pōhaku; ʻO ka ʻaoʻao o ka moku i waena o ka moana; A ʻo ka ʻaoʻao o ke kanaka me ka wahine puʻupaʻa

²⁰ Pēnēia ka ʻaoʻao o ka wahine hoʻokamakama, ʻAi ihola ʻo ia a holoi i kona nuku, A ʻōlelo aʻe, “ʻAʻole au i hana hewa.”

²¹ ¶ ʻEkolu mau mea e haunaele ai ka honua, ʻEhā hoʻi e hiki ʻole ai ke hoʻomanawanui:

²² ʻO ke kauā ke lilo i aliʻi; ʻO ka mea lapuwale ke māʻona i ka ʻai;

²³ ʻO ka wahine huhū wale ke mare ʻia ʻo ia; A ʻo ke kauā wahine he hoʻoilina o kona haku wahine.

²⁴ ¶ ʻEhā mau mea liʻiliʻi loa ma ka honua nei, A ua akamai loa nō naʻe:

²⁵ ʻO ka poʻe ʻānonanona, he poʻe ikaika ola lākou, Hoʻomākaukau nō naʻe i ke kau i kā lākou ʻai;

²⁶ ʻO ka poʻe rābita, he poʻe nāwaliwali lākou, Ma nā pōhaku hoʻi i hana ai i ko lākou mau hale;

²⁷ ʻO ka poʻe ʻūhini, ʻaʻole o lākou aliʻi, Hele papa nō hoʻi lākou.

²⁸ ʻO ka moʻo, lālau nō ʻo ia me kona mau lima, Aia nō ia ma nā hale hanohano o ke aliʻi.

²⁹ ¶ ʻEkolu mau mea, i maikaʻi ka hele ʻana, ʻEhā hoʻi i maikaʻi ke hele aʻe.

³⁰ ʻO ka liona ka mea ikaika loa o nā holoholona, ʻAʻole hoʻi ʻo ia e huli aʻe mai ke alo aku o lākou a pau;

³¹ ʻO ka ʻīlio hahai, a ʻo ke kao kāne hoʻi, A ʻo ke aliʻi, hiki ʻole ke kūʻē iā ia.

³² ¶ Inā he lapuwale ʻoe i kou hoʻokiʻekiʻe ʻana, Inā paha he manaʻo ʻino kou, e kau ana ka lima ma ka waha.

³³ Ma ka hoʻoluliluli ʻana i ka waiū e puka mai ai ka bata, Ma ka ʻuī ʻana i ka ihu e kahe mai ai ke koko; A ma ka hōʻoiʻoi ʻana i ka huhū e puka mai ai hoʻi ka hakakā.