NĀ ʻŌLELO AKAMAI A SOLOMONA 3 - Ka Baibala Hemolele

MOKUNA III.

¹ ¶ E kuʻu keiki, mai haʻalele ʻoe i koʻu kānāwai, E waiho hoʻi i kaʻu mau kauoha ma kou naʻau.

² No ka mea, ʻo ia ka mea e nui ai nā lā a me nā makahiki o kou ola ʻana, A ʻo ka malu hoʻi e hāʻawi ʻia iā ʻoe.

³ I ʻole e haʻalele iā ʻoe ka lokomaikaʻi a me ke aloha; E hāwele ia mau mea ma kou ʻāʻī; E kākau hoʻi ma ka papa o ka naʻau.

⁴ Pēlā e loaʻa ai ka lokomaikaʻi a me ka ʻike ʻoiaʻiʻo, I mua o Iēhova a me nā kānaka.

⁵ E paulele iā Iēhova me kou naʻau a pau; Mai hilinaʻi hoʻi ma kou naʻauao iho.

⁶ Ma kou ʻaoʻao a pau iā ia nō ʻoe e nānā aku ai, A nāna nō e hoʻopololei i kou hele ʻana.

⁷ Mai hoʻoakamai ʻoe ma kou manaʻo iho; E makaʻu iā Iēhova a e haʻalele i ka hewa.

⁸ ʻO ia ke ola no kou mau olonā, A me ka lolo no kou mau iwi.

⁹ E hoʻonani iā Iēhova ma kou waiwai, A me nā hua mua o nā mea a pau i loaʻa ai iā ʻoe;

¹⁰ A laila, e hoʻopiha ʻia kou waihona waiwai a hū, E hū aʻe kāu mau mea kaomi waina i ka waina hou.

¹¹ E kuʻu keiki, mai hōʻole ʻoe i ke aʻo ʻia mai e Iēhova; Mai pauaho ʻoe i kona hoʻoponopono ʻana mai.

¹² No ka mea, ʻo ka mea a Iēhova i aloha ai ʻo ia kāna i paʻipaʻi mai, Me he makua lā i ke keiki āna i makemake ai.

¹³ ¶ Pōmaikaʻi ke kanaka ke loaʻa iā ia ka naʻauao, A ʻo ke kanaka hoʻi i mākaukau i ka ʻike.

¹⁴ No ka mea, ua ʻoi aku ka waiwai o ia mea ma mua o ke kālā, A ʻo ke kūʻai ʻana hoʻi ma mua o ke gula.

¹⁵ Ua maikaʻi ʻo ia ma mua o nā momi; A ʻo nā mea a pau āu e makemake ai, ʻaʻole e like me ia ka maikaʻi.

¹⁶ Aia ma kona lima ʻākau ka lōʻihi o nā lā; A ma kona lima hema ka waiwai a me ka hanohano.

¹⁷ ʻO kona mau ʻaoʻao he mau ʻaoʻao ʻoluʻolu nō, Ua pau hoʻi kona mau alanui i ka maluhia.

¹⁸ ʻO ia ka lāʻau o ke ola no ka poʻe e hoʻopaʻa ana iā ia, Pōmaikaʻi hoʻi ka mea e ʻapo ana iā ia.

¹⁹ Ma ke akamai i hoʻokumu iho ai ʻo Iēhova i ka honua; A ma ka ʻike i kau aku ai i ka lani.

²⁰ Ma kona ʻike hoʻi i wāwahi ʻia ai nā wahi hohonu, A ninini mai nō nā ao i ka ua.

²¹ E kuʻu keiki ē, mai huli ʻē aku kou mau maka; E hoʻopaʻa i ka naʻauao a me ka ʻike.

²² He ola nō ia no kou ʻuhane, He hanohano nō ia i kou ʻāʻī.

²³ A laila, e hele makaʻu ʻole ʻoe ma kou ala, A ʻo kou wāwae hoʻi, ʻaʻole ia e palaha.

²⁴ I kou moe ʻana, ʻaʻole ʻoe e makaʻu; E moe iho nō ʻoe, a e ʻoluʻolu kou hiamoe ʻana.

²⁵ Mai weliweli ʻoe i ka mea e makaʻu ai ke hikilele mai, ʻAʻole hoʻi i ka luku ʻana o ka poʻe hewa ke hiki mai.

²⁶ No ka mea, ʻo Iēhova nō kou mea e paulele ai, E mālama nō ʻo ia i kou wāwae i ʻole nō e hei ʻia.

²⁷ ¶ Mai ʻauʻa ʻoe i ka maikaʻi i ka mea e pono ai ia, Ke hiki i kou lima ke hana aku.

²⁸ Mai ʻōlelo ʻoe i kou hoa noho, “Ō hele ʻoe a hoʻi mai, ʻapōpō e hāʻawi aku au,” Ke waiho wale ia mea iā ʻoe.

²⁹ Mai ʻimi hala ʻoe i kou hoa noho, No ka mea, ke noho lā ʻo ia ma ou lā me ka maluhia.

³⁰ Mai hoʻopaʻapaʻa hala ʻole ʻoe me ke kanaka, Inā ʻaʻole ʻo ia i hana hewa aku iā ʻoe.

³¹ Mai hoʻohālike ʻoe me ke kanaka huhū, Mai koho hoʻi ʻoe i kekahi ʻaoʻao ona.

³² No ka mea, he mea hoʻopailua ka ʻaiā iā Iēhova, ʻO ka poʻe pololei ʻo ia kona poʻe hoa kūkā.

³³ ʻO ka hōʻino o Iēhova aia ma ka hale o ka mea hewa, Hoʻopōmaikaʻi ʻo ia i kahi noho ai ʻo ka poʻe pono.

³⁴ E hoʻowahāwahā mai ʻo ia i ka poʻe hoʻowahāwahā; E hāʻawi mai ʻo ia i ka lokomaikaʻi i ka poʻe i haʻahaʻa ka naʻau.

³⁵ E ili mai ka hanohano no ka poʻe naʻauao; ʻO ka hoʻokiʻekiʻe ʻia mai o ka poʻe hewa, he mea hilahila ia.