NĀ ʻŌLELO AKAMAI A SOLOMONA 29 - Ka Baibala Hemolele

MOKUNA XXIX.

¹ ¶ ʻO ke kanaka i aʻo pinepine ʻia a hoʻopaʻakikī hoʻi i kona ʻāʻī, E make koke nō ia, ʻaʻole mea e ola ai.

² I ka lehulehu ʻana o ka poʻe pono, hauʻoli nā kānaka; A i ke aliʻi ʻana o ka mea hewa, ʻulono aʻela nā kānaka.

³ ʻO ke kanaka e ake ana i ka naʻauao, hoʻohauʻoli ʻo ia i kona makua kāne; ʻO ka mea launa aku me nā wāhine hoʻokamakama, hōkai wale aku ʻo ia i kāna waiwai.

⁴ Ma ka hoʻopono, e hoʻokūpaʻa ai ke aliʻi i ka ʻāina; ʻO ka mea lawe i nā makana, ʻo ia ke hoʻohiolo iho.

⁵ ʻO ke kanaka malimali aku i kona hoa noho, ʻO ia kai hohola i ka hei no kona mau wāwae.

⁶ Punihei ʻia ke kanaka hewa ma kona hewa iho; Hauʻoli nō ka mea pono me ka ʻoliʻoli.

⁷ ʻIke aku nō ka mea pono i ka pilikia o ka poʻe ʻilihune; A ʻo ka mea hewa, ʻaʻole ona manaʻo e ʻike aku.

⁸ ʻO ka poʻe hoʻowahāwahā, hoʻohihia lākou i ke kūlanakauhale; ʻO ka poʻe naʻauao, pale aʻe lākou i ka huhū.

⁹ Inā e hoʻopaʻapaʻa ke kanaka naʻauao, me ke kanaka hewa, He huhū paha kona, he ʻakaʻaka paha, ʻaʻohe ʻoluʻolu iki.

¹⁰ ʻO ka poʻe puni koko, inaina aku lākou i ka mea pololei; ʻImi hoʻi ka poʻe hoʻopono i ke ola nona.

¹¹ Hoʻopuka mai ka mea naʻaupō i kona manaʻo a pau; Noho mālie hoʻi ka mea naʻauao a ma hope aku.

¹² Inā e hāliu aʻe ke aliʻi i ka ʻōlelo wahaheʻe, Pau loa kāna poʻe kauā i ka hana hewa.

¹³ ʻO ka mea ʻilihune, a ʻo ke kanaka hoʻokaumaha e hālāwai pū lāua; Na Iēhova e hoʻomālamalama i nā maka o lāua a ʻelua.

¹⁴ ʻO ke aliʻi e hoʻoponopono ana i ka poʻe ʻilihune ma ka ʻoiaʻiʻo, E paʻa mau loa nō kona noho aliʻi.

¹⁵ ʻO ka lāʻau hahau, a me ke aʻo ʻia mai, hāʻawi nō i ka naʻauao; A ʻo ke keiki waiho wale ʻia, ʻo ia ke hoʻohilahila i kona makuahine.

¹⁶ I ka māhuahua ʻana o ka poʻe hewa, māhuahua nō ke kolohe; E ʻike hoʻi ka poʻe pono i ko lākou hāʻule ʻana.

¹⁷ E haua i kāu keiki, a nāna ʻoe e hoʻomaha mai; E lilo nō ia i mea e ʻoliʻoli ai kou ʻuhane.

¹⁸ I ʻole ke aʻo ʻia mai, hele hewa nā kānaka; A ʻo ka mea mālama i ke kānāwai, pōmaikaʻi ʻo ia.

¹⁹ Ma ka ʻōlelo wale ʻana, ʻaʻole e aʻo ʻia mai ke kauā; No ka mea, inā paha i ʻike, ʻaʻole ia e pane mai.

²⁰ Ua ʻike anei ʻoe i ke kanaka wikiwiki i ka ʻōlelo? Ua lana ka manaʻo no ka mea naʻaupō ʻaʻole nona.

²¹ ʻO ka mea hoʻohiwahiwa i kāna kauā mai kona wā ʻuʻuku mai, Ma hope iho, e lilo ʻo ia i keiki nāna.

²² ʻO ke kanaka huhū, ʻo ia kai hoʻokonokono i ka hakakā, A ʻo ka mea inaina wale, nui aʻela kona hewa.

²³ ʻO ka haʻaheo o ke kanaka, ʻo ia ka mea nāna ia e hoʻohaʻahaʻa iho; E pili hoʻi ka hanohano i ka mea haʻahaʻa ka naʻau.

²⁴ ʻO ka mea lawe pū me ka ʻaihue, inaina aku ʻo ia i kona ʻuhane iho; Ua lohe ʻo ia i ka hāʻiliʻili, ʻaʻole hoʻi i hōʻike aku.

²⁵ ʻO ka makaʻu i ke kanaka, he mea ia e hihia ai; ʻO ka mea paulele iā Iēhova ua palekana ʻo ia.

²⁶ Nui ka poʻe ʻimi i ka lokomaikaʻi ʻia mai e ke aliʻi, Akā, no Iēhova mai ka hoʻopono ʻana i ke kanaka.

²⁷ He mea hoʻopailua i ka poʻe pono ke kanaka hoʻopono ʻole; He mea hoʻopailua hoʻi i ka mea hewa, ka mea pololei ma kona ʻaoʻao.