NĀ ʻŌLELO AKAMAI A SOLOMONA 28 - Ka Baibala Hemolele

MOKUNA XXVIII.

¹ ¶ Hoʻoheʻe wale ka mea hewa, ʻaʻohe mea e hahai ana; ʻO ka poʻe pono hoʻi, wiwo ʻole lākou me he liona lā.

² No ka hewa o ka ʻāina, nui nō ko laila poʻe aliʻi; A ma ke kanaka noʻonoʻo a ʻike hoʻi e paʻa lōʻihi ana nō ia.

³ ʻO ke kanaka ʻilihune e hoʻokaumaha ana i ka poʻe ʻilihune, ʻO ia ka ua e hoʻopau ana i ka ʻai a pau.

⁴ ʻO ka poʻe haʻalele i ke kānāwai, hoʻomaikaʻi nō lākou i ka mea hewa; ʻO ka poʻe mālama hoʻi i ke kānāwai, kūʻē aku nō i ua poʻe lā.

⁵ ʻAʻole i ʻike ka poʻe ʻaiā i ka hoʻopono; A ʻo ka poʻe ʻimi iā Iēhova, ʻike nō i nā mea a pau.

⁶ E aho ka mea ʻilihune ke hele ʻo ia ma ka pololei, I ka mea waiwai i hoʻokekeʻe i kona ʻaoʻao.

⁷ ʻO ka mea mālama i ke kānāwai, he keiki naʻauao ia; ʻO ka hoa no ka poʻe hoʻokai wale, ʻo ia kai hoʻohilahila i kona makua kāne.

⁸ ʻO ka mea hoʻonui i kona waiwai ma ka uku kuala a me ke kāʻili wale, E hoʻoʻiliʻili ʻo ia ia mea na ka mea e aloha aku i ka poʻe ʻilihune.

⁹ ʻO ka mea hāliu aku i kona pepeiao ʻaʻole hoʻolono i ke kānāwai, E hoʻopailua ʻia kāna pule.

¹⁰ ʻO ka mea kaʻi hewa aku i ka poʻe pololei ma ka ʻaoʻao hewa, Ma kona lua iho ʻo ia e hāʻule ai; A ʻo ka poʻe pololei hoʻi, e ili mai ka maikaʻi no lākou.

¹¹ Ua naʻauao nō ke kanaka waiwai i kona manaʻo iho; Akā, ʻo ka mea ʻilihune a naʻauao hoʻi, ʻo ia kai ʻike aku iā ia.

¹² I ka hauʻoli ʻana o ka poʻe pono, nui ka hanohano; A i ke kū ʻana aʻe o ka poʻe hewa, ua hūnā ʻia ke kanaka.

¹³ ʻO ka mea hūnā i kona hewa iho, ʻaʻole ʻo ia e pōmaikaʻi; Akā, ʻo ka mea hōʻoia a haʻalele hoʻi, e aloha ʻia mai ʻo ia.

¹⁴ Pōmaikaʻi ke kanaka ke mau aku kona makaʻu; ʻO ka mea hoʻopaʻakikī i kona naʻau, e hāʻule ʻo ia i ka pōpilikia.

¹⁵ ʻO ka liona uō a me ka bea holoholo, ʻO ia ke aliʻi hewa ma luna o nā kānaka ʻilihune.

¹⁶ ʻO ke aliʻi naʻauao ʻole, nui kona hoʻokaumaha ʻana; ʻO ka mea hoʻowahāwahā i ka makeʻe waiwai, e lōʻihi nō kona mau lā.

¹⁷ ʻO ke kanaka hewa i ke koko o kekahi, E holo ʻo ia i ka lua; mai keʻakeʻa kekahi iā ia.

¹⁸ ʻO ka mea hele pololei e ola ʻo ia; ʻO ka mea hoʻokekeʻe i kona ʻaoʻao, e hāʻule koke nō ia.

¹⁹ ʻO ka mea mahi i ka ʻāina e māʻona ʻo ia i ka ʻai; ʻO ka mea hoʻopili mea ʻai ma hope o ka poʻe lapuwale e piha ʻo ia i ka ʻilihune.

²⁰ ʻO ke kanaka hōʻoiaʻiʻo, nui wale kona mau mea e pōmaikaʻi ai; ʻO ka mea holo kikī ma hope o ka waiwai, ʻaʻole e ʻole kona hala.

²¹ ʻO ka manaʻo ʻana i ko ke kanaka kino, ʻaʻole ia he maikaʻi; No kahi ʻāpana ʻai e lawehala nō ua kanaka lā.

²² ʻO ka mea hoʻoikaika ma ka waiwai, he maka ʻino kona, ʻAʻole ʻo ia e ʻike ʻo ka ʻilihune kāna mea e loaʻa ai.

²³ ʻO ka mea aʻo aku i ke kanaka, ma hope iho e loaʻa iā ia ka lokomaikaʻi ʻia mai, Ma mua o ka mea malimali me kona alelo.

²⁴ ʻO ka mea kāʻili wale i kā kona makua kāne a me kā kona makuahine, Me ka ʻī ʻana aʻe, “ʻAʻole ia he hewa,” ʻO ia ka hoa no ka pepehi kanaka.

²⁵ ʻO ka mea i haʻaheo ka naʻau, ʻo ia kai hoʻokonokono i ka hakakā; ʻO ka mea paulele iā Iēhova e lako loa ʻo ia.

²⁶ ʻO ka mea paulele i kona naʻau iho, ʻo ia ka mea naʻaupō; ʻO ka mea hele ma ka naʻauao, e hoʻopakele ʻia ʻo ia.

²⁷ ʻO ka mea hāʻawi wale na ka mea ʻilihune, ʻaʻole ʻo ia e nele; A ʻo ka mea i uhi aʻe i kona mau maka, e nui kona hōʻino ʻia mai.

²⁸ I ke kū ʻana o ka poʻe hewa, ua hūnā ke kanaka iā ia iho; A make lākou, a laila māhuahua ka poʻe pono.