NĀ ʻŌLELO AKAMAI A SOLOMONA 27 - Ka Baibala Hemolele

MOKUNA XXVII.

¹ ¶ Mai ʻoliʻoli wale ʻoe no ka lā ʻapōpō, No ka mea, ʻaʻole ʻoe i ʻike i ka mea a kekahi lā e hoʻopuka mai ai.

² Na ka mea ʻē e hoʻomaikaʻi mai iā ʻoe, ʻaʻole na kou waha iho; Na ka malihini hoʻi, ʻaʻole na kou mau lehelehe iho.

³ Koʻikoʻi ka pōhaku, kaumaha hoʻi ke one; Akā, ʻo ka inaina o ka mea naʻaupō, ua kaumaha ia ma mua o ia mau mea ʻelua.

⁴ He aloha ʻole ka inaina, he mea make ka huhū, ʻO wai lā hoʻi e hiki ke kū i mua o ka huāhuā?

⁵ Maikaʻi ke aʻo maopopo ʻana, Ma mua o ke aloha i hūnā ʻia.

⁶ Maikaʻi ka hōʻeha ʻia mai e ka hoaaloha, He nunui hoʻi ka honi ʻana o ka ʻenemi.

⁷ Hehi nō ka mea māʻona i ka waihona meli; Akā, i ka mea pōloli lā, ua ʻono nā mea ʻawaʻawa a pau.

⁸ E like me ka manu i ʻauana aʻe mai kona pūnana aku, Pēlā ke kanaka e ʻauana ana mai kona wahi aku.

⁹ ʻO ka ʻaila a me ka mea ʻala, hoʻohauʻoli ia i ka naʻau; Hōʻoluʻolu hoʻi ka hoaaloha o kekahi mea ma ka ʻōlelo ʻoiaʻiʻo.

¹⁰ ʻO kou hoalauna a me ka hoalauna o kou makua kāne, mai haʻalele ʻoe; ʻAʻole hoʻi e komo aku i ka hale o kou hoahānau i kou manawa pōpilikia; Maikaʻi ka mea e noho kokoke ana, ma mua o ka hoahanau ma kahi lōʻihi aku.

¹¹ E kuʻu keiki ē, e naʻauao hoʻi ʻoe i ʻoliʻoli koʻu naʻau, I ʻōlelo aku au i ka mea hōʻino mai iaʻu.

¹² ʻO ka mea noʻonoʻo lā, ʻike ʻē ʻo ia ma mua i ka pōʻino a hūnā iā ia iho; Hele wale aku hoʻi ka poʻe nanea a hihia ihola.

¹³ E lawe i ka ʻaʻahu o ka mea nāna e hoʻopānaʻi no ka malihini, E lawe hoʻi i uku nona no ka wahine ʻē.

¹⁴ ʻO ka mea hoʻomaikaʻi aku i kona hoa noho me ka leo nui, I kona ala ʻana i ke kakahiaka nui, E lilo ia i mea pōʻino nona.

¹⁵ ʻO ke kulu mau ʻana i ka lā ua, A me ka wahine nuku wale, ua like.

¹⁶ ʻO ka mea hoʻonalowale i kāna, hoʻonalowale nō ia i ka makani, A me ka ʻaila o kona lima ʻākau e pā mai ana.

¹⁷ Hoʻokala kahi mea hao i kekahi mea hao, Hoʻokala hoʻi ke kanaka i ka maka o kona hoalauna.

¹⁸ ʻO ka mea mālama i ka lāʻau fiku, ʻo ia ke ʻai i kona hua; ʻO ka mea mālama hoʻi i kona haku e hoʻonani ʻia ʻo ia.

¹⁹ Ma ka wai, he helehelena e kū ana i kahi helehelena, Pēlā hoʻi ka naʻau kanaka i kekahi kanaka.

²⁰ ʻO ka lua a me ka hohonu, ʻaʻole i piha, A ʻo nā maka o ke kanaka ʻaʻole nō e māʻona.

²¹ He ipu hoʻoheheʻe no ke kālā, a he kapuahi no ke gula, Pēlā ke kanaka i mua o kona mahalo ʻia mai.

²² Inā e kuʻi ʻoe i ka mea naʻaupō ma ka papa wili ʻai, ʻO ia pū me ka ʻai i ka pōhaku kuʻi, ʻAʻole loa e hemo aʻe kona naʻaupō ʻana mai ona aku.

²³ ¶ E ʻike pono ʻoe i ke ʻano o kāu poʻe hipa, E nānā hoʻi i ke ʻano o kāu poʻe holoholona;

²⁴ No ka mea, ʻaʻole e mau ana ka waiwai; ʻO ka pāpale aliʻi hoʻi, ʻo ia mau anei ia i nā hanauna a pau?

²⁵ Kupu mai ka weuweu, ʻikea mai ka mauʻu, A e ʻohi ʻia ana ka mea ulu o ka mauna.

²⁶ ʻO nā keiki hipa nō kou kapa komo, ʻO ka poʻe kao kāne ke kumu kūʻai no ka ʻāina

²⁷ A e nui ka waiū kao no kāu ʻai ʻana, No ka ʻai ʻana hoʻi o ko ka hale ou, A he ola nō kou poʻe kauā wahine.