NĀ ʻŌLELO AKAMAI A SOLOMONA 26 - Ka Baibala Hemolele

MOKUNA XXVI.

¹ ¶ E like me ka hau i ke kau, E like me ka ua i ka wā e ʻohi ai, Pēlā i kū ʻole ai ka hanohano i ka mea lapuwale.

² E like me ka zepora e ʻauana ana, E like me ka derora e lele ana, Pēlā ka pōʻino, ʻaʻole ia e hiki wale mai.

³ I mea hahau no ka lio, i kaula waha no ka hoki, I lāʻau hahau hoʻi no ke kua o nā mea lapuwale.

⁴ Mai ʻōlelo aku i ka mea lapuwale e like me kona naʻaupō ʻana, O like ʻoe me ia.

⁵ E ʻōlelo nō i ka mea lapuwale e like me kona naʻaupō ʻana, O naʻauao ʻo ia i kona maka iho.

⁶ ʻO ka mea ʻoki aʻe i nā wāwae a loaʻa iā ia ka pōʻino, ʻO ia kai kauoha aku i nā manaʻo ma ka lima o ka mea lapuwale.

⁷ E lawe aku i nā wāwae o ka mea ʻoʻopa, A me ka ʻōlelo nane mai loko aʻe o ka waha o ka poʻe lapuwale.

⁸ E like me ka nākiʻi ʻana i ka ʻiliʻili ma ka maʻa a paʻa, Pēlā ka hāʻawi ʻana i ka hanohano no ka mea lapuwale.

⁹ ʻO ka mea ʻoiʻoi e ʻō ana i ka lima o ka mea ʻona, ʻO ia ka ʻōlelo nane ma ka waha o ka poʻe lapuwale.

¹⁰ ʻO ka mea nui nāna i hana nā mea a pau, ʻO ia ka mea nāna e hoʻopaʻi i ka mea lapuwale a e hoʻopaʻi hoʻi i ka poʻe lawehala.

¹¹ E like me ka ʻīlio i hoʻi hou aku i kona luaʻi, Pēlā ka mea naʻaupō e hoʻi hou ana i kona lapuwale.

¹² Ua ʻike anei ʻoe i ke kanaka naʻauao i kona manaʻo iho? He lana ka manaʻo no ka mea naʻaupō ʻaʻole nona.

¹³ ʻĪ aʻela ka mea palaualelo, “He liona ma ke ala! He liona i waena o ke kuamoʻo!”

¹⁴ ʻO ka luli ʻana o ke pani ma kona ʻami, ʻO ia ka mea palaualelo ma kona moena.

¹⁵ Hoʻokomo ka mea palaualelo i kona lima i loko o ke pā, A he mea kaumaha iā ia ke hāpai hou aʻe ia i kona waha,

¹⁶ He naʻauao loa ka mea palaualelo i kona manaʻo iho, Ma mua o nā kānaka ʻehiku e hōʻike ana i ka ʻoiaʻiʻo.

¹⁷ ʻO ka mea lālau i ka ʻīlio ma nā pepeiao, Ola ka mea e māʻalo ana, a lawe pū i ka hakakā pili ʻole iā ia.

¹⁸ E like me ka mea e hoʻoleilei ana i nā ihe wela, a me nā pua a me ka make;

¹⁹ Pēlā ke kanaka e hoʻopunipuni ana i kona hoa noho, ʻĪ aʻela hoʻi, “ʻAʻole anei he pāʻani koʻu?”

²⁰ I ʻole ka wahie, e pio nō ke ahi, I ʻole ka mea holoholo ʻōlelo, pau ka hakakā.

²¹ ʻO ka nānahu i nā nānahu wela, a me ka wahie i ke ahi, ʻO ia ke kanaka huhū e hoʻokonokono ana i ka hakakā.

²² ʻO nā ʻōlelo a ka mea holoholo ʻōlelo, Ua like nō ia me nā ʻōlelo pāʻani, Komo i lalo naʻe ia a i loko lilo o ka ʻōpū.

²³ ʻO ke kālā maʻemaʻe ʻole i hoʻopili ʻia me kahi pōhue, ʻO ia nā lehelehe e alohaloha ana me ka naʻau ʻino.

²⁴ ʻO ka mea inaina, hūnā ʻo ia ma kona mau lehelehe, A i loko ona iho i waiho ai ʻo ia i ka hoʻopunipuni.

²⁵ Inā i ʻoluʻolu kāna ʻōlelo, mai manaʻoʻiʻo aku iā ia; No ka mea, ʻehiku mau mea ʻino i loko o kona naʻau.

²⁶ ʻO ka mea i hūnā ʻia kona inaina i ka hoʻopunipuni, E hōʻike ʻia kona hewa i mua o ke anaina kanaka.

²⁷ ʻO ka mea ʻeli i ka lua, ʻo ia ke hāʻule i laila; ʻO ka mea ʻolokaʻa i ka pōhaku, e hoʻi hou mai ia ma luna ona.

²⁸ ʻO ke elelo wahaheʻe, ʻo ia ke inaina aku i ka mea pōʻino ma laila; ʻO ka waha malimali, ʻo ia ke hana i ka mea e make ai.