NĀ ʻŌLELO AKAMAI A SOLOMONA 25 - Ka Baibala Hemolele

MOKUNA XXV.

¹ ¶ Eia nō hoʻi nā ʻōlelo akamai a Solomona, na nā kānaka o Hezekia ke aliʻi o kā Iuda i kākau hou iho.

² ¶ He mea nani i ke Akua ke hūnā i kekahi mea; He mea nani hoʻi i nā aliʻi ke ʻimi aku.

³ ʻO ka lani he kiʻekiʻe, ʻo ka honua he hohonu, A ʻo ka naʻau o nā aliʻi, he mau mea ʻike ʻole ʻia.

⁴ E hoʻokaʻawale aku i ka lepo o ke kālā, A e puka mai kekahi ipu no ka mea hoʻoheheʻe.

⁵ E hoʻokaʻawale aku i ka mea hewa mai ke alo aku o ke aliʻi, A e paʻa iho nō kona noho aliʻi ma ka pono.

⁶ Mai hoʻokiʻekiʻe aʻe i mua o ke aliʻi, A ma kahi o ka poʻe koʻikoʻi mai kū aʻe ʻoe.

⁷ No ka mea, he maikaʻi ke ʻōlelo ʻia mai iā ʻoe, “E piʻi mai ʻoe i ʻaneʻi,” Ma mua o kou hoʻohaʻahaʻa ʻia mai i mua o ke aliʻi, Ka mea a kou mau maka i nānā aku ai.

⁸ ¶ Mai hikiwawe aku ʻoe i ka hakakā, No ka mea, he aha kāu e hana ai ma hope aku, Ke hoʻohilahila mai kou hoa noho iā ʻoe?

⁹ Me kou hoa noho ʻoe e hoʻopaʻapaʻa aku ai, Mai hōʻike aku i ka mea iā haʻi;

¹⁰ O henehene mai iā ʻoe ka mea lohe, ʻAʻole e pau ka ʻōlelo ʻino mai nou.

¹¹ ¶ ʻO nā ʻōhiʻa gula ma nā kiʻi kālā, ʻO ia ka hua ʻōlelo i ʻōlelo ʻia i ka wā pono.

¹² He apo pepeiao gula, a he mea gula maʻemaʻe e nani ai, ʻO ia ka hoʻonaʻauao ʻana i ka pepeiao hoʻolohe.

¹³ E like me ke anu o ka hau i ka wā e ʻohi ai, Pēlā ka ʻelele ʻoiaʻiʻo i ka mea nāna ia e hoʻounauna aku; Hōʻoluʻolu ʻo ia i ka ʻuhane o kona mau haku.

¹⁴ ʻO nā ao a me ka makani ua ʻole, ʻO ia ke kanaka e haʻanui ana no ka makana hoʻopunipuni.

¹⁵ Ma ka hoʻomanawanui i hoʻohuli ʻia ai ke aliʻi, ʻO ke elelo akahai ke uhaʻi aku i ka iwi.

¹⁶ Ua loaʻa anei iā ʻoe ka meli? E ʻai iho e like me ka pono nou, O hoʻokūkū ʻoe ia mea a e luaʻi aku ia.

¹⁷ Ua oki kou wāwae i ka hele i ka hale o kou hoa noho, O luhi ʻo ia iā ʻoe a e inaina mai nō hoʻi.

¹⁸ ʻO ka hāmare a me ka pahi kaua a me ka pua ʻoiʻoi, ʻO ia ke kanaka hōʻike wahaheʻe no kona hoa noho.

¹⁹ ʻO ka niho i haʻi ʻia, ʻo ka wāwae ʻōkupe, ʻO ia ka paulele ʻana i ka mea lohe ʻole i ka wā pōpilikia.

²⁰ ʻO ka mea lawe aku i ke kapa i ka wā anu, A ʻo ka vīnega hoʻi ma ka paʻakai, ʻO ia ke mele aku i ke mele i ka mea naʻau kaumaha.

²¹ Inā pōloli kou ʻenemi, e hāʻawi aku iā ia i ka ʻai, Inā i make wai ia, e hoʻohāinu iā ia i ka wai;

²² Pēlā nō ʻoe e kau aku ai i nā nānahu wela ma luna o kona poʻo, A na Iēhova ʻoe e uku mai.

²³ ʻO ka makani ʻākau, pale aku ia i ka ua, A ʻo ka maka huhū hoʻi i ke elelo ʻakiʻaki.

²⁴ E aho ka noho ʻana ma kahi kihi o luna o ka hale, ʻAʻole me ka wahine nuku wale ma ka hale kanaka.

²⁵ ʻO ka wai huʻihuʻi i ka mea make wai lā, ʻO ia ka ʻōlelo hōʻoluʻolu mai ka ʻāina lōʻihi ʻē mai.

²⁶ He pūnāwai lepolepo, a he wai puna pilopilo, ʻO ia ka mea pono e hāʻule ana i mua o ka mea hewa.

²⁷ ʻO ka ʻai ʻana i ka meli a nui, ʻaʻole ia he maikaʻi, Pēlā hoʻi ka ʻimi ʻana i ke kaulana nui loa.

²⁸ ʻO ke kūlanakauhale hiolo, ʻaʻohe pā, ʻO ia ke kanaka hoʻomalu ʻole i kona ʻuhane iho.