NĀ ʻŌLELO AKAMAI A SOLOMONA 24 - Ka Baibala Hemolele

MOKUNA XXIV.

¹ ¶ Mai kuko ʻoe i ka ʻaoʻao o nā kānaka hewa, ʻAʻole makemake hoʻi e noho pū me lākou.

² No ka mea, noʻonoʻo aʻela ko lākou naʻau i ka mea e make ai, A no ka ʻino hoʻi ko lākou lehelehe e kamaʻilio ai.

³ ¶ Ma ke akamai i kūkulu ʻia ai ka hale, Ma ka naʻauao hoʻi ia i hoʻokūpaʻa ʻia ai.

⁴ Na ka ʻike e hoʻopiha ʻia ai nā keʻena, I nā waiwai a pau, he maikaʻi nō a he nani hoʻi.

⁵ ¶ ʻO ke kanaka naʻauao, he ikaika nō ia; E māhuahua ana nō ka ikaika o ke kanaka ʻike.

⁶ No ka mea, ma ka noʻonoʻo nui ʻoe e kaua aku ai, A he ola nō ma ka nui o ka poʻe kūkākūkā pū.

⁷ ¶ He kiʻekiʻe loa ka naʻauao ma luna o ka mea naʻaupō; ʻAʻole e ʻoaka kona waha ma ka ʻīpuka.

⁸ ¶ ʻO ka mea noʻonoʻo e hana hewa aku, E kapa ʻia aku ia he mea hana kolohe.

⁹ ʻO ka manaʻo lapuwale, he hewa ia; A he hoʻopailua i nā kānaka ka mea hoʻowahāwahā.

¹⁰ ¶ Inā pauaho ʻoe i kou lā pōpilikia, ʻUʻuku wale nō kou ikaika.

¹¹ ¶ Inā e hoʻokaʻulua ʻoe e hoʻopakele i ka poʻe i hana paʻa ʻia e make, A me ka poʻe e kokoke ana i ka pepehi ʻia mai;

¹² Inā e ʻī aʻe ʻoe, “Ē, ʻaʻole mākou i ʻike”; ʻAʻole anei e noʻonoʻo mai ka mea nāna e kaupaona nā naʻau? A ʻo ka mea hoʻi nāna e mālama i ka ʻuhane, ʻaʻole anei ʻo ia e ʻike? ʻAʻole anei ʻo ia e hoʻopaʻi i ke kanaka e like me kāna hana ʻana?

¹³ ¶ E kuʻu keiki, e ʻai iho ʻoe i ka meli; no ka mea, he maikaʻi ia; A i ka waihona meli hoʻi he ʻono ia i kou waha;

¹⁴ Pēlā hoʻi ka ʻike ʻana i ka naʻauao i kou ʻuhane; A i loaʻa iā ʻoe, a laila he hope, A ʻo kou manaʻolana ʻaʻole ia e pohō.

¹⁵ ¶ Mai hoʻohālua, e ke kanaka hewa, ma ka hale o ka mea pono; Mai pōā aku ʻoe ma kona wahi e moe ai.

¹⁶ No ka mea, ʻehiku nō ka hāʻule ʻana o ka mea pono, a ala hou mai nō; ʻO ka poʻe hewa, e hina nō lākou i loko o ka pōʻino.

¹⁷ ¶ I ka hāʻule ʻana o kou ʻenemi, mai hauʻoli ʻoe, I kona hina ʻana hoʻi mai ʻoliʻoli kou naʻau;

¹⁸ O ʻike mai Iēhova he hewa ia i kona mau maka, A e hoʻohuli ʻo ia i kona huhū mai ona aku.

¹⁹ ¶ Mai ukiuki ʻoe no ka poʻe hewa, ʻAʻole hoʻi e kuko i ka noho ʻana o ka poʻe hana ʻino.

²⁰ No ka mea, ʻaʻohe uku maikaʻi no ka mea hewa; ʻO ke kukui o ka poʻe hewa, e pio ana nō ia.

²¹ ¶ E kuʻu keiki, e makaʻu aku iā Iēhova, a me ke aliʻi; Me ka poʻe lolelua ka naʻau, mai launa aku.

²² No ka mea, e hikiwawe mai ko lākou pōʻino; A ʻo ka make ʻana o lāua a ʻelua, ʻo wai ka mea ʻike aku?

²³ ¶ Na ka poʻe naʻauao hoʻi kēia mau mea; ʻO ka manaʻo kapakahi ma ka hoʻokolokolo ʻana, ʻaʻole i pono ia.

²⁴ ʻO ka mea ʻōlelo aku i ka mea hewa, “He pono nō ʻoe”; E hōʻino aku nō nā kānaka iā ia, E hoʻowahāwahā hoʻi nā lāhui kanaka iā ia.

²⁵ Akā, he ʻoluʻolu ko ka poʻe i aʻo aku, E hiki mai hoʻi iā lākou ka pōmaikaʻi ʻiʻo.

²⁶ E honi ʻia aku nā lehelehe ʻO ka mea ʻōlelo aku ma ka pololei.

²⁷ ¶ Ma waho e hoʻomākaukau ai i kāu hana, A e hoʻoponopono nou iho ma ke kula; A ma hope iho, e kūkulu aʻe i kou hale.

²⁸ ¶ Mai lilo hala ʻole ʻoe i hōʻike kūʻē i kou hoa noho; ʻAʻole hoʻi e hoʻopunipuni me kou mau lehelehe.

²⁹ Mai ʻōlelo ʻoe, “E like me ia i hana mai ai iaʻu, pēlā au e hana aku ai iā ia; E hoʻopaʻi aku au i ke kanaka e like me kāna hana ʻana.”

³⁰ ¶ Ma ke kīhāpai o ka mea palaualelo i māʻalo ai au, Ma ka pā waina hoʻi o ke kanaka noʻonoʻo ʻole;

³¹ Aia hoʻi, ulu paʻapū aʻela ka pua kala, Uhi maila ma luna ona nā kākalaioa, ʻO kona pā pōhaku hoʻi, ua hiolo ihola ia.

³² Nānā akula au, hālalo ihola koʻu naʻau; ʻIke ihola au, a loaʻa iaʻu ke aʻo ʻia mai.

³³ “He moe iki aʻe, he hiamoe iki aʻe, He pelu hou iki aʻe i nā lima a hiamoe”;

³⁴ A e hiki mai kou ʻilihune me he kanaka hele lā, A me kou nele e like me ke kanaka kaua.