NĀ ʻŌLELO AKAMAI A SOLOMONA 23 - Ka Baibala Hemolele

MOKUNA XXIII.

¹ ¶ I kou noho ʻana iho e ʻai pū me ke aliʻi, E noʻonoʻo pono i nā mea i mua ou;

² A e kau i ka pahi ma kahi i moni ai, Ke pōloli ʻoe.

³ Akā, mai ʻiʻini aku ʻoe i kāna mau mea ʻono; He wahi ʻai hoʻopunipuni nō ia.

⁴ ¶ Mai hoʻoikaika i waiwai aʻe; E hōʻole i kou naʻauao iho.

⁵ E kau anei ʻoe i kou mau maka ma ka mea e ʻole ana? No ka mea, e hana ʻiʻo nō ia mea i mau ʻēheu nona iho; Me he ʻaeto lā e lele aku ai i ka lewa.

⁶ ¶ Mai ʻai ʻoe i ka ʻai a ka mea maka ʻino; Mai ʻiʻini aku ʻoe i kāna mau mea ʻono;

⁷ No ka mea, e like me ia i noʻonoʻo ai ma kona naʻau, pēlā nō ia; “E ʻai ʻoe, ʻeā, a e inu ʻoe!” wahi āna iā ʻoe, Akā, ʻaʻole me ʻoe kona naʻau.

⁸ ʻO ka māmala ʻai āu i moni iho ai e luaʻi hou aku ʻoe; A e lilo wale kāu mau ʻōlelo ʻoluʻolu.

⁹ ¶ Mai haʻi aku ʻoe i nā pepeiao o ka mea lapuwale; No ka mea, e hoʻowahāwahā ʻo ia i ka pololei o kāu ʻōlelo.

¹⁰ ¶ Mai hoʻoneʻeneʻe aʻe ʻoe i nā mokuna ʻāina kahiko; Ma nā kīhāpai o ka poʻe makua ʻole, mai komo ʻoe.

¹¹ No ka mea, ʻo kā lākou Hoʻōla he mana nō kona; Nāna nō e hoʻoponopono i waena o lākou a me ʻoe.

¹² E hāliu aʻe i kou naʻau i ke aʻo ʻia mai, A me kou mau pepeiao hoʻi i nā ʻōlelo e naʻauao ai.

¹³ ¶ Mai waiho ʻoe i ka hoʻoponopono ʻana i ke keiki; No ka mea, inā e haua ʻoe iā ia me ka lāʻau, ʻaʻole ia e make.

¹⁴ E haua ʻoe iā ia me ka lāʻau, A e hoʻopakele i kona ʻuhane i ka lua.

¹⁵ ¶ E kuʻu keiki ē, inā e naʻauao kou naʻau, E hauʻoli ʻiʻo nō ka naʻau oʻu;

¹⁶ E ʻoliʻoli ʻiʻo koʻu mau pūhaka, Ke haʻi aku kou mau lehelehe i nā mea pololei.

¹⁷ ¶ Mai huāhuā kou naʻau i ka poʻe hewa; Akā, e noho mau ʻoe me ka makaʻu iā Iēhova a pō ka lā.

¹⁸ No ka mea, e hiki ʻiʻo mai nō ka hope; A e pio ʻole ana nō kou manaʻolana.

¹⁹ E hoʻolohe mai ʻoe, e kaʻu keiki, e hoʻonaʻauao iho, E hoʻopololei i kou naʻau ma ke ala.

²⁰ Mai noho pū ʻoe me ka poʻe inu waina; Me ka poʻe hoʻopalupalu i ko lākou kino iho.

²¹ No ka mea, ʻo ka mea ʻona a me ka mea pākela ʻai, e ʻilihune auaneʻi ʻo ia; A no ka palaualelo e komo kekahi i nā weluwelu.

²² ¶ E hoʻolohe i kou makua kāne ka mea nāna mai ʻoe; Mai hoʻowahāwahā ʻoe i ka luahine ʻana o kou makuahine.

²³ E kūʻai lilo mai i ka ʻoiaʻiʻo, mai kūʻai lilo aku; I ka naʻauao hoʻi a me ke aʻo ʻia mai a me ka ʻike.

²⁴ ¶ E hauʻoli nui ka makua kāne o ka mea pono; ʻO ka mea i hānau mai nāna ke keiki naʻauao, he ʻoliʻoli nō kona.

²⁵ E hauʻoli nō kou makua kāne a me kou makuahine, E ʻoliʻoli hoʻi ka mea nāna ʻoe i hānau mai.

²⁶ ¶ E kuʻu keiki, e hāʻawi mai iaʻu i kou naʻau, E nānā mai hoʻi kou mau maka i koʻu ʻaoʻao.

²⁷ No ka mea, he ʻauwaha hohonu ka wahine hoʻokamakama, He lua ʻino hoʻi ka wahine ʻē.

²⁸ ʻO ia kai hoʻohālua, me he pōā lā, Hoʻonui ʻo ia i ka lawehala ʻana i waena o nā kānaka.

²⁹ ¶ Iā wai lā ka uē ʻana? Iā wai lā ka pōʻino? Iā wai lā ka hakakā? Iā wai lā ka nuku wale ʻana? Iā wai lā nā palapū loaʻa wale? Iā wai lā nā maka ʻulaʻula?

³⁰ I ka poʻe e hoʻomau ana ma ka waina, I ka poʻe e hele ana e ʻimi i ka waina i kāwili ʻia.

³¹ Mai nānā ʻoe i ka waina i kona ʻulaʻula ʻana, I kona ʻaleʻale ʻana ma ke kīʻaha, I kona hū ʻana a maikaʻi.

³² Ma hope iho, e nahu mai me he nahesa lā, A e pā mai me he moʻo niho ʻawa lā.

³³ E nānā auaneʻi kou maka i nā wāhine ʻē, A e haʻi aku kou naʻau i nā mea ʻino.

³⁴ E lilo ana ʻoe me he mea lā i moe iho ma waenakonu o ka moana, E like hoʻi me ka mea i hoʻomoe iā ia iho ma kahi ʻoiʻoi loa o ke kia moku.

³⁵ “Pepehi mai lākou iaʻu, ʻaʻole au i ʻeha, Hahaua mai lākou iaʻu, ʻaʻole au i ʻike iho; Āhea lā au e ala ai? E ʻimi hou aku nō au ia mea.”