NĀ ʻŌLELO AKAMAI A SOLOMONA 22 - Ka Baibala Hemolele

MOKUNA XXII.

¹ ¶ He mea makemake ʻia ke kaulana ma mua o ka waiwai he nui; A ma mua hoʻi o ke kālā a me ke gula ka lokomaikaʻi ʻiʻo.

² Hālāwai pū ka poʻe waiwai a me ka poʻe ʻilihune; Na Iēhova lākou a pau i hana.

³ Nānā aʻela ka mea noʻonoʻo i ka ʻino, a hūnā iā ia iho; Hele wale aku hoʻi ka mea naʻaupō a hihia ʻo ia.

⁴ No ka naʻau haʻahaʻa, ka makaʻu iā Iēhova, Ka waiwai hoʻi a me ka hanohano a me ke ola.

⁵ Aia nā kākalaioa a me nā mea hihia ma ke ala o ka mea hele kekeʻe; ʻO ka mea mālama i kona ʻuhane, kaʻawale nō ʻo ia ia mau mea.

⁶ E aʻo aku i ke kamaliʻi i kona ʻaoʻao, A ʻelemakule ʻo ia, ʻaʻole ia e huli aʻe mai laila aku.

⁷ Noho aliʻi ka mea waiwai ma luna o ka poʻe ʻilihune, He kauā hoʻi ka mea hoʻopili wale na ke kanaka hāʻawi wale.

⁸ ʻO ka mea lūlū aku i ka hewa, e ʻohi ia i ka pōpilikia; Ua hoʻopau ʻia ka lāʻau hahau o kona huhū.

⁹ ʻO ka mea maka lokomaikaʻi, e hoʻomaikaʻi ʻia ʻo ia; No ka mea, ua hāʻawi wale ia i kekahi o kāna berena i ka mea nele.

¹⁰ E hoʻokuke aku i ka mea hoʻowahāwahā, a e kaʻawale aku hoʻi ka hoʻopaʻapaʻa; E pau hoʻi ka hakakā a me ka hoʻomāʻewaʻewa.

¹¹ ʻO ka mea makemake aku i ka naʻau maʻemaʻe, No ka lokomaikaʻi o kona mau lehelehe, e lilo ke aliʻi i hoaaloha nona.

¹² ʻO nā maka o Iēhova, mālama aku nō i ka ʻike, Hoʻohiolo ʻo ia i nā ʻōlelo a ka mea ʻaiā.

¹³ ʻŌlelo aʻela ka mea palaualelo, “He liona ma waho, E make auaneʻi au ma ke alanui!”

¹⁴ He lua hohonu ka waha o ka wahine hoʻokamakama, ʻO ka mea inaina ʻia e Iēhova, e hāʻule nō ia ma laila.

¹⁵ Ua paʻa ke kolohe i loko o ka naʻau o ke kamaliʻi, ʻO ka lāʻau hahau, ʻo ia ke hoʻohemo aʻe ia mea mai ona aku.

¹⁶ ʻO ka mea hoʻokaumaha i ka mea ʻilihune i mea e hoʻomāhuahua ai i kāna iho, A ʻo ka mea hāʻawi no ka mea waiwai, e nele ʻiʻo nō lāua a ʻelua.

¹⁷ ¶ E hāliu mai kou pepeiao a e hoʻolohe i nā ʻōlelo a ka poʻe naʻauao, A e ʻimi iho kou naʻau i koʻu ʻike.

¹⁸ No ka mea, he ʻoluʻolu nō ke mālama ʻoe ia mau mea i loko ou, E kūpono nō hoʻi i kou mau lehelehe;

¹⁹ I paulele ʻoe iā Iēhova, ʻO ia kaʻu i hōʻike ai iā ʻoe, iā ʻoe nō i kēia lā.

²⁰ ʻAʻole anei i palapala aku au iā ʻoe i nā maikaʻi, Ma nā ʻōlelo aʻo a me ka ʻike?

²¹ I hōʻike aku ai au iā ʻoe i ka ʻoiaʻiʻo o ka ʻōlelo pololei, I haʻi pololei aku ʻoe i ka poʻe i hoʻouna ʻia mai iā ʻoe.

²² ¶ Mai kāʻili wale ʻoe i kā ka mea ʻilihune no kona ʻilihune ʻana; ʻAʻole hoʻi e hoʻokaumaha i ka mea nele ma kahi o ka ʻīpuka;

²³ No ka mea, na Iēhova e hoʻoponopono no lākou, E hao mai ʻo ia i ka ʻuhane o ka poʻe i hao aku iā lākou.

²⁴ ¶ Mai hoʻolauna aku ʻoe me ka mea huhū, A me ke kanaka inaina hoʻi, mai hele pū ʻoe;

²⁵ O aʻo iho ʻoe i kona mau ʻaoʻao, A loaʻa i kou ʻuhane ka hihia.

²⁶ ¶ Mai hui aʻe ʻoe me ka poʻe paʻi aku i ka lima; ʻAʻole hoʻi me ka poʻe pānaʻi no ka ʻaiʻē.

²⁷ Inā ʻaʻole āu mea e hoʻokaʻa aku ai, No ke aha lā e lawe ʻia aku ai kou wahi moe mai lalo aku ou?

²⁸ ¶ Mai hōneʻeneʻe ʻoe i nā mokuna ʻāina kahiko, Nā mea a kou poʻe kūpuna i hoʻonoho ai.

²⁹ ¶ Ua ʻike anei ʻoe i ke kanaka miki ma kāna hana? E kū nō ia i mua o nā aliʻi, ʻAʻole ʻo ia e kū i mua o ka poʻe naʻaupō.