NĀ ʻŌLELO AKAMAI A SOLOMONA 21 - Ka Baibala Hemolele

MOKUNA XXI.

¹ ¶ He mau ʻauwai ka naʻau o ke aliʻi, i loko o ka lima o Iēhova, Nāna e hoʻokahe aʻe e like me kona makemake.

² ʻO nā ʻaoʻao a pau o ke kanaka, ua pololei ia i kona maka iho, Hoʻāʻo aʻela ʻo Iēhova i nā naʻau.

³ ʻO ka hana ʻana i ka pono a me ka pololei, Ua makemake ʻia e Iēhova ma mua o ka mōhai.

⁴ ʻO ka maka haʻaheo, ʻo ka naʻau hoʻokiʻekiʻe, ʻO ka pōmaikaʻi ʻana hoʻi o ka poʻe hewa he pono ʻole nō ia.

⁵ ʻO ka manaʻo o ka mea hana mau, pili nō ia i ka lako; ʻO ko ka mea wikiwiki wale, pili nō ia i ka nele.

⁶ ʻO ka ʻimi ʻana i ka waiwai ma ke elelo wahaheʻe, He ʻōpala i hoʻopuehu ʻia e ka poʻe e ʻimi ana i ka make.

⁷ ʻO ke kāʻili wale o ka poʻe hewa, e kāʻili aku ia iā lākou; No ka mea, hōʻole lākou, ʻaʻole e hana ma ka hoʻopono.

⁸ He kekeʻe ka ʻaoʻao o ke kanaka, a he ʻano ʻē hoʻi; ʻO ka mea maʻemaʻe hoʻi, ua pololei kāna hana.

⁹ E aho ka noho ma ke kihi ma luna o ka hale, ʻAʻole hoʻi me ka wahine hakakā ma ka hale kanaka.

¹⁰ ʻO ka ʻuhane o ka mea hewa, makemake nō ia i ka hewa; ʻAʻole ona lokomaikaʻi mai i kona hoa noho.

¹¹ Ma ka hoʻopaʻi ʻia mai o ka mea hoʻowahāwahā, e hoʻonaʻauao ʻia ai ka mea ʻike ʻole; I ke aʻo ʻana aku i ka mea akamai, e loaʻa nō iā ia ka ʻike.

¹² Noʻonoʻo nui ka mea pono i ka hale o ka mea hewa; Ua hoʻokahuli ʻia ka poʻe hewa no ka hana hewa ʻana.

¹³ ʻO ka mea i papani i kona pepeiao i ka uē ʻana o ka mea nele, E hea aku nō ʻo ia, ʻaʻohe mea e hoʻolohe mai.

¹⁴ ʻO ka makana malū, pale aʻe nō ia i ka huhū; Pēlā hoʻi ka makana poli i ka inaina ikaika.

¹⁵ He ʻoliʻoli i ka mea pono ke hana ma ka pololei; He make nō ko ka poʻe hana hewa.

¹⁶ ʻO ke kanaka hele hewa mai ka ʻaoʻao aʻe o ka naʻauao, E noho nō ʻo ia ma ke anaina o ka poʻe malu make.

¹⁷ ʻO ka mea makemake i ka leʻaleʻa, e ʻilihune auaneʻi ia, ʻO ka mea makemake i ka waina a me ka ʻaila, ʻaʻole ia e waiwai.

¹⁸ Pani ka mea hewa i ka hakahaka no ka mea pono; Pēlā ka mea lawehala no ka mea pololei.

¹⁹ E aho ka noho ʻana ma ka wao akua, ʻAʻole me ka wahine huhū a me ka hakakā.

²⁰ Aia ka waiwai i makemake ʻia a me ka ʻaila ma ka hale o ka mea naʻauao; A ʻo ke kanaka lapuwale, moni ihola ʻo ia ia mea.

²¹ ʻO ka mea hahai ma hope o ka pono, a me ka lokomaikaʻi, E loaʻa iā ia ke ola a me ka pono a me ka nani.

²² Piʻi aʻe ka mea naʻauao ma luna o ke kūlanakauhale o ka poʻe ikaika, Hoʻohiolo ʻo ia i ka ikaika a lākou i paulele ai.

²³ ʻO ka mea mālama i kona waha a me kona alelo, ʻO ia kai hoʻopakele i kona ʻuhane i ka pōpilikia.

²⁴ ʻO ka “Haʻaheo,” ʻo ka “Hoʻokano,” ʻo ka “Hoʻowahāwahā,” ʻO ia ka inoa o ka mea hana ma ka huhū ikaika.

²⁵ ʻO ka makemake o ka mea palaualelo ʻo ia kona mea e make ai; No ka mea, hōʻole kona mau lima i ka hana.

²⁶ Kuko wale aku nō ia a pō ka lā; Hāʻawi aku hoʻi ka mea pono me ka ʻauʻa ʻole.

²⁷ ʻO ka mōhai o ka poʻe hewa, he hoʻopailua ia; Ua ʻoi aku hoʻi ka hewa, ke lawe ʻo ia ia mea me ka manaʻo ʻino.

²⁸ ʻO ka mea hōʻike wahaheʻe, e make nō ia; ʻO ke kanaka hoʻolohe, ʻo ia ke ʻōlelo mau.

²⁹ Hoʻopaʻakikī ke kanaka hewa i kona maka; ʻO ka mea pololei hoʻi, hoʻopololei ʻo ia i kona ʻaoʻao.

³⁰ ʻAʻohe akamai, ʻaʻohe noʻonoʻo; ʻAʻole hoʻi ʻōlelo aʻo e hiki ai ke kūʻē aku iā Iēhova.

³¹ Ua hoʻomākaukau ʻia ka lio no ka lā e kaua ai; Akā, iā Iēhova nō ka hoʻopakele ʻana.