NĀ ʻŌLELO AKAMAI A SOLOMONA 20 - Ka Baibala Hemolele

MOKUNA XX.

¹ ¶ He mea henehene ka waina, he walaʻau nui hoʻi ka mea e ʻona ai; ʻO nā mea a pau i puni ma laila, ʻaʻole i naʻauao.

² He uō ʻana me he liona lā, ka weliweli i ke aliʻi; ʻO ka mea hoʻonāukiuki iā ia, hōʻeha nō ʻo ia i kona ʻuhane iho.

³ He mea nani nō ke kanaka, ke hoʻōki i ka hoʻopaʻapaʻa; Akā, e huhū nō nā mea lapuwale a pau.

⁴ ʻAʻole e mahi ʻai ka mea palaualelo no ke anu; A e mākilo ʻo ia i ka wā e ʻohi ai, ʻaʻole e loaʻa.

⁵ He wai hohonu, ka ʻōlelo aʻo i loko o ko kānaka naʻau; Na ke kanaka naʻauao e uhuki aʻe.

⁶ E haʻi aku ka nui o nā kānaka i ko lākou pono iho; ʻO ke kanaka hana ʻoiaʻiʻo, iā wai lā i loaʻa ai ia?

⁷ ʻO ka mea hele ma kona pololei, he mea pono ʻo ia; E hoʻomaikaʻi ʻia hoʻi kāna poʻe keiki ma hope ona.

⁸ ʻO ke aliʻi e noho ana ma ka noho hoʻokolokolo, Hoʻoʻauheʻe ʻo ia i nā hewa a pau me kona mau maka.

⁹ ʻO wai lā ke hiki e ʻōlelo aku, “Ua hoʻomaʻemaʻe au i koʻu naʻau? Ua kaʻawale au i koʻu hewa?”

¹⁰ He anapaona pālua a he ana pālua no nā mea ʻē aʻe, He hoʻopailua iā Iēhova ia mau mea ʻelua.

¹¹ Ua ʻike ʻia ke keiki ma ka hana ʻana, Inā paha he maʻemaʻe, a he pololei kāna hana.

¹² ʻO ka pepeiao lohe, a ʻo ka maka nānā, Na Iēhova nō i hana ia mau mea ʻelua.

¹³ Mai makemake ʻoe i ka hiamoe o lilo ʻoe i mea nele; E wehe aʻe i kou mau maka, a e māʻona i ka ʻai.

¹⁴ “He ʻino, he ʻino,” wahi a ka mea kūʻai mai; A i kona hele ʻana aku, a laila, haʻanui ʻo ia.

¹⁵ Aia he gula a me nā pōhaku maikaʻi he nui wale; Akā, ʻo ka mea nani loa, ʻo ia ka lehelehe ʻike.

¹⁶ E lawe ʻoe i ke kapa o kekahi ke pānaʻi ʻo ia no ka malihini, A no nā malihini hoʻi e lawe i kekahi waiwai āna.

¹⁷ Ua ʻono i ke kanaka ka ʻai no ka wahaheʻe; A ma hope iho, e piha kona waha i ke one.

¹⁸ Ua paʻa ka manaʻo ma ke kūkākūkā pū ʻana; Ma ka noʻonoʻo pololei hoʻi e kaua aku ai.

¹⁹ ʻO ka mea holoholo ʻōlelo, hōʻike aku ʻo ia i nā mea i hūnā ʻia; Mai launa aku me ka mea hoʻomalimali me kona mau lehelehe.

²⁰ ʻO ka mea hāʻiliʻili aku i kona makua kāne a me kona makuahine, E pio kona kukui i ke ʻōnohi o ka pouli.

²¹ ʻO ka hoʻoilina i loaʻa mua ma ke kāʻili wale, ʻO kona hopena, ʻaʻole e pōmaikaʻi ʻia,

²² Mai ʻōlelo aʻe ʻoe, “E hoʻopaʻi aku au i ka hewa”; E kakali ʻoe iā Iēhova, nāna nō ʻoe e kōkua mai.

²³ He hoʻopailua iā Iēhova nā anapaona pāpālua; ʻO ke kaupaona hoʻopunipuni ʻaʻole i pono ia.

²⁴ Na Iēhova mai ka hele ʻana o ke kanaka; Pehea hoʻi e hiki ai i ke kanaka ke ʻike i kona ʻaoʻao iho?

²⁵ He mea hihia i ke kanaka, ke hoʻohiki naʻaupō, “I ka mea hemolele!” A ma hope iho o ka hoʻohiki ʻana, a laila noʻonoʻo.

²⁶ Hoʻopuehu aʻe ke aliʻi akamai i ka poʻe hewa, Hoʻokaʻa ʻo ia i ke kaʻa ma luna o lākou.

²⁷ ʻO ke kukui o Iēhova, ʻo ka hanu ia o ke kanaka, E komo ana ma nā wahi a pau o ka ʻōpū.

²⁸ Na ka lokomaikaʻi a me ka ʻoiaʻiʻo e mālama mai i ke aliʻi; Ua paʻa hoʻi kona noho aliʻi i ka lokomaikaʻi.

²⁹ ʻO ka ikaika ka mea e kaulana ai nā kānaka uʻi; ʻO ke poʻo hina ka mea e nani ai ka ʻelemakule.

³⁰ ʻO ka pahu ʻana o ka maʻi he mea hoʻomaʻemaʻe i ka ʻino; ʻO ka haua hoʻi, i ko loko o ka ʻōpū.